Kaike Standard Traslation
प्रे 18
पावल कोरिन्थग
आलै पावल एथेन्स सहरलै भिदा राह्राह् कोरिन्थ सहरग होई। नुई पोन्तसग छ्युङ्नान अकिलास मिह्न्न तीपा यहूदी धोबो। नु जेँन मिसा प्रिस्किलान ङ्याबो इतालियालै स्वापा ङ्याह्, तैङर्वाङिन सम्रात क्लौदियसजै पुरू यहूदीकाङ्मोः रोमलै गेग्गे वैफाम्पा ङ्याह्। पावल ख्युकाङ्मोः धोमः होई। च्योवालैम सिप रह्पान सिमि राह्राह् नु रे ख्युन ङ्याबोई छ्युङ्बो, रे धोन खेबो। तैङर्वाङिन ख्युन धोन पाल दोङ्नान ङ्याह्। पावल बात्तै नाह्न ल्हाः आराधनालयग वैवै यहूदीव रे ग्रीकवन ङ्याबो खाथू खेँ रे ङ्युरुमग मनाई खेचे फाङ्ङ,
जब सिलास रे तिमोथी माकेदोनियालै स्वा ताप्पो, पावल भेला पुरू केह्ः ताह्फेम्मः बिताई खेँ, रे यहूदीकाङ्मोः येसुई मसिह जेङ्पा र्वार्वा नुई बयान बिन्यङ ङ्याह्। जेङ्नै जब ख्युई बिरोध खेखे नुन ल्हुई झाम जाःबो, तब नुई जेँन घोलाङ खारखार ख्युकाङ्मोः र्वाबो, “ङेन कह ङेनै थोप्पा छाराःयो, ङा निर्दोस ङिह्पा। तानधेरा ङा यहूदीन खोलोःन सिमिवन ङ्याबो वैनान ङ्यु।”
तब पावल ख्युकाङ्मोः ख्योवाख्योवा परमेस्वरन भक्ति खेनान तीतस युस्तस मिह्न्न यहूदीन खोलोःन सिमिन यिम होई। नुन यिम आराधनालयन रह्म्मै ङ्याह्। यहूदी आराधनालयन ङोत्वा हाकिम क्रिस्पस रे नुन पयार पुरूजै प्रभू बिस्वास खेबो, रे कोरिन्थीवन बर्ग लैजे पावलन केह्ः ङ्यानङ्यान बिस्वास खेबो, रे बप्तिस्मा वप्पो।
ती छान मङ्ग प्रभुई पावलग र्वाबो, “नङिना, जेङ्नै ङन केह्ः र्वायङ वया, रे तै मर्वारे नछ्योवा, तैङर्वाङिन ङा नान ङ्याबो ङिह्पा, रे सुई नाः आक्रमन खेखे नाप्पा दोङ तैनान मया, तैङर्वाङिन अन सहरग ङन लै सिमिव ङिह्पा।”1 आलै परमेस्वरन केह्ः सिमिकाङ्मोः लह्नैलह्नै पावल ती परा रे लाह् रून बेर ख्युन ङ्याबो कोरन्थीग छ्युङ्बो।
जब गलियोन अखैयान ङोत्वा हाकिम रह्बो, तब कोरन्थीन यहूदी पुरूव जोमजोम पावलन ङ्या आक्रमन खेबो, रे नू जुङजुङ अदालतग सप्पो, रे ख्युई झाम र्वाबो, “अन सिमिजै कानुन्न बिरोधग परमेस्वरन आराधना खेमः सिमिकाङ्मोः लम्पाई ङ्याह्।”
जब पावल र्वामः जाःपा ङ्याह्, तब गलियोनजै मन यहूदीकाङ्मोः र्वाबो, “यहूदी हो, यदि तेम्माई अन तयाः अन्याय आथबा अलः अपराधन ल्होई जेङ्न ता ङै ङेनकोन ल्होई स्हेः खेखे ङ्यान्चे लः राह्नान ङ्याह्। जेङ्नै बचनव, मिह्नव रे ङेन जेँनै कानुन्न झब रह्पान कारन ङेह् छोए ख्या। ङा झाम ल्होईवन न्याय दोङ्सुम मीपा।” आलै नुई ख्युकाङ्मोः अदालतन ङूलै धाम्बो। तब ख्यु पुरूजै यहूदी जोम्पुन ङोत्वा हाकिम सोस्थेनेसग जुङजुङ अदालतन ङू फ्याङ्बो। जेङ्नै गलियोनजै मन ल्होईन तये वास्ता मखेबो।
पावल एन्तिओखिया सहरग होल्पा
मन्न छाम्म पावल लैःन बेर कोरिन्थग छ्युङ्बो। तब थिक्कोवन ङ्याबो भिदा राह्राह् नु त्युन जहाजग सिरिया होई। नुन ङ्याबो प्रिस्किला रे अकिलास यङ ङ्याह्। तयाः लान रेनरुपाः नुई क्रिकियाग जेँन छम पप्पो।2 ख्यु एफिससग स्वा ताप्पो, आलै पावलजै अकिलास रे प्रिस्किलाः स्याह्ई ख्योवाबो, रे नुँह् चन ती आराधनालयग जाःजाः यहूदीवन ङ्याबो खाथू खेमः जाःबो। तब ख्युई नू हेँ खजिर्या छ्योवा र्वार्वा छ्याःफुल्तौ नुई मङ्याम्बो। ख्युन ङ्याबो भिदा रातौ नुई र्वाबो, “परमेस्वरन सम राङिन ङा ह्याङ ङेन ङ्याबो होलहोल स्वानान ङिह्पा।” तब नु त्युन जहाजग चपचप एफिससलै होई।
जब नु कैसरियाग ताप्पो, तब लाह्ः लिपलिप मन्दलिन सिमिकाङ्मोः दोदो नमस्ते खेखे एन्तिओखियाक्याँ होई। नुई स्याह् खजिर्या छ्युङ्छ्युङ् स्याह्लै गेग्गे गलातिया रे फ्रिगिया छेत्रन ठाउँव राह्राह् चेला पुरूवग हौसला भिनैभिनै घङ-घङ ठाउँग होई।
एफिसस रे कोरेन्थग अपोल्लोस
मन्नै भेला अलेक्जेन्द्रिया सहरग केह्पा अपोल्लोस मिह्न्न यहूदीदी एफिससग स्वाबो। नु यामयाम ल्होई र्वामः खाईम सिमि ङ्याह् रे नू पबित्रसास्त्रन लैः ग्यान ङ्याह्। नुई प्रभुन लम्न छोए देप्पा ङ्याह्, रे आत्माः स्याङ्स्याङ् येसुन भारेन ल्होईव लः खेखे र्वायङ लह्ङ्ङ। जेङ्नै नुई बप्तिस्मा बिन्नान्न यूहन्नान बप्तिस्मान ल्होई मात्र हाकोपा ङ्याह्। नु आराधनालयग मङिनङिन र्वामः जाःबो। जेङ्नै नुई र्वापा ल्होई ताह्ताह् प्रिस्किला रे अकिलासजै नू जेँन यिम सप्पो, रे परमेस्वरन लम्न धा झन लः खेखे बुझाई खेबो। अपोल्लोसजै अखैया छेत्रग वैसुम खेतौ बिस्वासी थिक्कोवजै नू स्याह् वया र्वार्वा हौसला बिम्बो, रे नू स्वीकारी ख्यायो र्वार्वा स्याह्न चेलाकाङ्मोः हौसला बिमबिम पत्र सर्बो। नुई स्याह् ताप्ताप् परमेस्वरन दयालम बिस्वास खेनानकाङ्मोः लै सहयोग खेबो। तैङर्वाङिन नुई पबित्रसास्त्रन बचनलम येसुई मसिह जेङ्पा र्वानान ल्होई थनथन पुरू यहूदीवन ङू तेम्माई झब भिनमतैनान दोङ्बो।
Source notes (2)
- Cross-reference यसै ४१:१०; ४३:५; यर १:८
- Cross-reference गन्ती ६:१८
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.