Kaike Standard Traslation
प्रे 19
पावल एफिससग
अपोल्लोस कोरिन्थ सहरग रातौ पावल एसिया छेत्रलै राह्राह् एफिससग स्वाबो। स्याह् नुई कान-कान चेलाकाङ्मोः धोबो। नुई ख्युकाङ्मोः र्वाबो, “जब ङेनजै बिस्वास खेपा तै ङेनजै पबित्र आत्मा देप्पाऊ?” ख्युई नू र्वाबो, “पबित्र आत्मा ङिह्पा र्वानान ता ङ्योअजै ताह्पाई मया।” आलै पावलजै ख्युकाङ्मोः र्वाबो, “तब ङेनजै सुन बप्तिस्मा वप्पा?” ख्युई र्वाबो, “यूहन्नान बप्तिस्मा।”
तब पावलजै र्वाबो, “यूहन्नाई बिम्पा बप्तिस्मा चन घ्योप्पान बप्तिस्मा ङ्याह्। नुन ङिक स्वानान्न सिमि, आथबा येसुन लाह्ः बिस्वास ख्या र्वार्वा नुई इस्राएली सिमिकाङ्मोः स्याङ्ङ।”
अन ल्होई ताह्ताह् ख्युई प्रभु येसुन मिह्नग बप्तिस्मा वप्पो। जब पावलजै ख्युन लाह्ः लाह् नाह्म्बो, तब पबित्र आत्मा ख्युन लाह्ः स्वाबो, रे ख्युई घङ-घङ ल्होईग ल्होई र्वाबो रे भबिस्यबानी खेबो। ख्यु क्वाईमाल्ला: चोलोङ्चा च्योङेपा ङ्याह्।
पावल यहूदी आराधनालयग जाःजाः लाह् सुमङीन बेर परमेस्वरन राज्यन भारेः ख्युन ङ्याबो मङिनङिन बहस खेबो रे सिमिकाङ्मोः हाको फानैफानै छ्युङ्बो। जेङ्नै जब कान-कानजै राह्ङद्या राह्राह् बिस्वास मखेबो, रे अन समुदायन बिरोधग मोङन ङू प्रभुन लम्न पत घोलोवा ल्होई र्वामः जाःबो, “तब पावल ख्युलम भाबो, रे चेलाकाङ्मोः ङ्याबो वव्वै तुरान्नसन स्कुलग खाथू खेमः जाःबो। अन धोन ङेह् परान बेर रह्पाई लुईपा, रे एसियान पुरू प्रदेसन बासिन्दाव, यहूदी रे यहूदीन खोलोःन सिमि ङ्योरुमजै प्रभुन केह्ः ङ्याम्बो।”
सिवान सन्तान
परमेस्वरजै पावलन ल्हालै राई मतैनान्न ताईलुवान धोनव खेबो, सिथाल कि रुमाल आथबा बर्खि नुन ल्होग ज्यारज्यार खङ्नानवन ङ्याबो वङ्ङ, रे ख्युन ल्होलै नाह्जा वैङ रे मु यङ गेङ्ङ। जेङ्नै कान-कान धेँवछोँ तूनान यहूदी फुकफाक खेनानजै मुई सेम्पाकाङ्मोः प्रभु येसुन मिह्न ङुरलै छ्यूईछ्यूई झाम र्वाबो, “पावलजै ताह्फेप्पा येसुलम ङा नाः आदेस बिन्चे।” स्याह् तीपा स्केवास मिह्न्न यहूदी प्रधान पुजारीन ङोह्जो नेह्पावजै झाःम धोन खेँ।
तब मुई झब बिमबिम ख्युकाङ्मोः र्वाबो, “येसू ङा स्योःनान, रे पावलग र्वार्वा ङा स्योःनान, जेङ्नै ङेन चन सु जेङ्पा?”
मन मु ताह्पा सिमि ख्युन ल्हाः बोरैबेरै स्वाबो, रे यहूदी फुकफाक खेनान पुरूवग अधिनग नान्नान ख्युन ङिक जाःबो रे ख्यु मन यिमलै चत्याःपा रे नाप्पा राह्राह् ज्यार्बो। अन ल्होई एफिससग छ्युङ्नान, यहूदी रे यहूदीन खोलोःन सिमिकाङ्मोः पुरू क्युई रह्पा। आलै ख्यु पुरू ङिह्म्बो, रे प्रभु येसुन मिह्न्न प्रसङ्सा रह्बो। बिस्वास खेनानव लै स्वाबो, रे ख्युई खेपा जे-जेँन अलः धोनवन स्वीकार खेबो रे मन थम्बो। ख्युन बर्ग लै, सुवा-सुवाजै तन्तर मन्तर खेँ, जे-जेँन किताबव रूरू सप्पो, रे पुरून ङू कोःबो। कन हजार फेराङसुमथल मुलन सिक्का बराबर रह्पा। झामखेखे प्रभुन बचन फेलैफेलै होई, रे सक्तिसाली रह्बो।
एफिससग याल
अन घतनावन ङिक, पबित्र आत्मान हौसलाग पावलजै माकेदोनिया रे अखैयान लम राह्राह् यरूसलेम वैचेन निर्नय खेबो। नुई र्वाबो, “स्याह् ताप्मी ङा रोम वैत्वानान” नुन सेवा खेनानव ङेपा, तिमोथी रे इरास्तसग नुई माकेदोनियाः फेप्पो, जेङ्नै नुँह् खजिर्या एसिया प्रदेसगै छ्युङ्बो।
अन्तौ परमेस्वरन लम्न भारेः मिह्दा फाईरा रह्पा। देमेत्रियस मिह्न्न तीपा मुलन कु दोङ्नान सुनारजै आर्तेमिस आराधनालयन मुलन कत्याःम कत्याःम आराधनालयव दोङदोङ कु दोङ्नानकाङ्मोः धोन लै बिङ्ङ, तैङर्वाङिन अन धोनलै मिह्दा फाइदा रह्पा ङ्याह्। तब अजोवकाङ्मोः रे घङ अनलैम सिप रह्पान सिमिकाङ्मोः नुई रूरू र्वाबो, “भाइ हो, ङेनकाङ्मोः क्युई ङ्याह्, कि अनै ब्यपारलम ङी कमाई लः राँ। ङेनजै रङ्पाई ङ्याह् रे ताह्पाई ङ्याह्, कि एफिससग मात्र नङ्पा, जेङ्नै सोलोः एसिया प्रदेसग लाह्जै दोङ्पा ला तये नङ्पा र्वार्वा पावलजै लै सिमिवन मोङग लनलन बहकाई खेखे वप्पा ङ्याह्। झामखेखे ङिन धोन्न मात्र नङ्पा जेङ्नै मकेकुकेन किम चिमिचा ला आर्तेमिसन आराधनालयनै ङान्ज्यान राह्नान ङ्याह्, आलै एसिया रे सन्सारभरिन सिमिवजै तेनैतेनै स्वापान मकेकुकेन किम चिमिचा ला आर्तेमिसन पुजा यङ बन्द राह्नान ङ्याह्।”
अन ताह्ताह् ख्यु मिह्दा सुतूबो, रे “एफिसीवन आर्तेमिस मकेकुकेन किम जेङ्पा।” र्वार्वा फाईरा खेमः जाःबो। सहर पुरूग फाईरा मच्ची रह्बो रे ख्यु दीदी पावलन ङ्याबो लेन्नान्न फुरी माकेदोनिया छ्युङ्नान्न गायस रे अरिस्तार्खसगै जुङ्जुङ् रङ्गसालान झिङ पुरीपुरी वप्पो। पावल सिमिवन मोङग वैसुम खेबो, जेङ्नै चेलावजै नू वैमफाम्बो। एसियान हातिपा ङोत्वा सिमिव पावलन फुरी ङ्याह्। ख्युई पावलग रङ्गसालान झिङ नवया र्वार्वा ल्होन कोर्बो। तब ख्यु राँसा-राँसान ल्होई र्वायङ फाईरा खेमः जाःबो। तैङर्वाङिन अन मोङग फाईरा मच्ची रह्पा ङ्याह्, रे लै सिमिवजै ता ख्यु तैङ जोम्पा जेङ्पा अन यङ क्युई रह्पा मया। मोङन हातिपा सिमिवजै अलेजेन्दरग ङू साःबो, सू यहूदीवजै सोल्पा ङ्याह्। अलेजेन्दरजै लाह्जै लाःता खेखे तै मर्वारे छ्योवा र्वार्वा सिमिवन ङू जेँग सोमफान्चेन भिह्तु तयाः र्वासुम ङिह्पा र्वाबो। जेङ्नै ख्युई अन ता यहूदी जेअँ र्वानान क्युई राह्राह् पुरूजै केह्ः तीजै क्वाईमाल्ला घन्ता ङे “एफिसीवन आर्तेमिस मकेकुकेन किम जेङ्पा” र्वायङ फाईरा खेबो।
सहरन हाकिमजै सिमिकाङ्मोः छ्याःफाम्मी र्वाबो, “एफिससन सिमिव हो, एफिसीवन सहर चन किम आर्तेमिसन आराधनालय रे पान्नाङलै छार्पान नुन कुन रछेक जेङ्पा र्वानान ल्होई सुई क्युई मह्या तै? ङेन ख्युई ङिह्पा अन ल्होई च्याप मतैनान ङ्याह्, अन्नकारन ङेन छ्या त्वानान रे तये, घोल्वा धोन खेचे नङ्पा। तैङर्वाङिन ङेनकोजै सप्पान अन सिमिवजै आराधनालय खुपा मया रे ङिन लान ल्हुई यङ पप्पा मया। अन्नकारन यदि देमेत्रियस रे नुन ङ्याबो रह्पा कु दोङ्नान सिमिवन कान्न बिरोधग मुद्दा तयाः राङिन अदालतव पोङ्पा ङ्याह्, रे न्यायधीसव रे ङ्याह्, ख्यु राह्राह् सान बिरोधग मुद्दा ध्याःयो। जेङ्नै अन नङ्म घङै भारेः सोल्मः सम खेङिन ता अन्न फैसला जोम्पान निर्नय अन्सार राह्नान ङ्याह्, तैङर्वाङिन त्यान अन मोङन दोस ङिन लाह्ः स्वादरा र्वार्वा ङिन्चे ङ्याह्। तैङर्वाङिन अन कारन मीपान यालग ङि सु तेम्मा सु लबार र्वा मतैनान।” अकेः र्वार्वा नुई जोम्पाः भिदा खेबो।
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.