Hunde Nouveau Testament
Luka 6
Yesu ye nina aSabato
(Mat 12:1-8; Mar 2:23-28)
Lwire luuma lwa Sabato, Yesu abaa atsuka mu maxwa ma ngano. Abemitsa bewe batangira ihulula bikumba bya ngano, bapfungapfungabyo mwa minwe sabo, babanelya asambeke1.
Bafarisayo bauma babutsabo mbu: «Esi! Kubwishi bwaki amukola kyokitalirene ikolwa mu lwire lwa Sabato?»
Yesu nianaxubitsabo mbu: «Mbeni Mutatsamwasoma kyo mwami Ndauti akolaa mwa mango, iye na bandu babaa ali nabo ni bakukwitse? Mbeni ataingiraa mwa nyumba ya Ongo2, nianatsimba mikati ya bandu babaa bametula Ongo. Mbeni atalyaayo, neha babaa ali kuuma nabo? Naho aMuomba wetu ni abwire kwa bakungu ba hekalu bonabeneho ni bobanalirene ilya ku mikati iri ngeyo3.» Yesu nianabwirabo kandi mbu: «Ingye Muala wa Mundu, ngye Nina aSabato.»
Yesu alamya mundu wa makonongola
(Mat 12:9-14; Mar 3:1-6)
Lundi lwire lwa Sabato, Yesu nianaingira mwa sinakoki, nianaiyisa abandu. Nomo mwabaa mulume muuma wa makonongola mwa minwe ya malyo. Abeyisa ba Muomba na Bafarisayo babaa bamuteire amesha, kwelola tikuno akalamya amulume uyo mu lwire lwa Sabato. Baira batyo kwebula mbu baate kinwa kyokyangatuma bamusongera. Wetuwe Yesu ni echi amianikire yabo. Nianabwira amulume wa makonongola mwa minwe mbu: «Batuka, imana hakatikati ka bandu.» Amulume uyo, nianabatuka neimana hakatikati ka bandu. Tsene, Yesu nianabwirabo mbu: «Anibabutsa, kihe kya Muomba wetu abwire mbu kilirene ikolwa mwa lwire lwa Sabato? Mbeni ikola bibuya neri ikola bibi? Ilamya mundu neri imwita?» Yesu nianasindera aboshi, nianabwira amundu uyo mbu: «Lambula aminwe yawe.» Nianalambula aminwe iwe, iba nelama. Wetuwe abeyisa ba Muombabo na Bafarisayo niabanatsibuka kutsibu. Niabanatangira ibutsabutsanya kobangaira Yesu.
Yesu alondola ndumwa ikumi ne biri
(Mat 10:1-4; Mar 3:13-19)
Mo biromo, Yesu nianauruka kwa kitwa kweya ihema Ongo. Bukya ni ahema. Bwabere bwamekya, Yesu nianabirangira abemitsa bewe, alondola mubo mo ikumi na babiri, alukabo mbu ndumwa: Simoni yo Yesu atolaa aretsina mbu ye Petero, ne Andereya mualabo, Yakobo, ne Yohana, ne Firipo, ne Baritolomayo, ne Matayo, ne Tomasi, ne Yakobo muala wa Alufayo, ne Simoni wa mwa kikanga kya baselote4, ne Yuta muala wa Yakobo, ne Yuta Isikariyote yahotaa Yesu.
Yesu aiisa abandu ne lamya abakoni
(Mat 4:23-25)
Yesu nianakima ampfuli kuuma na bemitsa bewe. Abere ahika mwa kibotebote, nianaimana. Ashinganamo mubuanano munene wa bemitsa bewe, na mubuanano munene kutsibu wa bandu abatoka mwa kyango kye Yuteya na mwa mulungu we Yerusalemu, na kwa munda wa milungu ye Tiro, ne Sitona, kwa musike wa ngetsi. Abandu abo bahikaa kweumpfiritsa Yesu na kwelamibwa amakoni mabo. Na bobabaa baundirwe na bixwatsi, nabo, Yesu nianalamyabo. Abandu boshe babaa ni abaxonda ipfula ku Yesu, kubwishi mwiye ni amutoka maala, nao ni amalamya aboshe.
Ngashani na lutuki
(Mat 5:1-12)
Yesu nianasindera abemitsa bewe, abwirabo mbu:
Muashanirwe mwe bachene
kureba abwami bwa Ongo bwenyu.
Muashanirwe imwe momupfire nchala tsene,
kureba mwendeuutyibwa.
Muashanirwe, imwe momulira tsene,
kureba mwendesheka.
Muashanirwe, imwe, mwa mango abandu abababaa neicha kwimwe, nebakamba, nebatera
kubwishi bwa Muala wa Mundu.
Mwa mango abinwa ibyo byenderebahikira, muneremoa neshaaluka, kureba Ongo ababikirire luhembo lunene mu mbingu. Batyo ko aboshekulitsa babaa bananubya abatahwa5.
Wetuwe mulyae mwe baxoki, kureba mwaotwere chirwa mikocho yenyu.
Mulyae mwe muuutire tsene, kureba mwendekukutsa;
Mulyae mwe musheka tsene, kureba mwendeba mu kiriro netoya mixonya.
Mulyae imwe, mwa kashangi abandu boshe ababahalilitsa,
kureba batyo kwa Boshekulitsa babobabaa banahalilitsa abatahwa babesi.
Muneretsiira abalenda benyu
(Mat 5:38-48; 7:12)
Yesu nianaxuba ibula mbu: «Wetuwe, momunihulikya anibabwira mbu: ‹Muneretsiyira abalenda benyu, ni mwa kolera bibuya bobababaire. Bobabatukanga, munerehema Ongo aashanirebo. Na bobabanubya munerehemerabo Ongo. Amundu akekubanda luhyu kwe tema, ni wamubindulira alindi tema. Na mundu akekunyaa arekoti rawe, ni wamulika aheke na shimishi. Mundu woshewoshe yakuhema kindu, ni wamuhakyo. Na yakunyaa abindu byawe, ni utibule mbu akufulukitsebyo.›» Kyomuxonda mbu abandi bandu babakolere, nemwe ni kyomwakolerabo.
«Mukeneretsiyiraho bobabatsiyire, ni muwete simeki? Ni hatali. Banabe na bakotsi ba santsambi banatsiyira bobatsiyirebo. Ni mungaba mukerekolera kibuya bobabakolera bibuya, ni muli na simeki? Ni hatali. Na bakotsi ba santsambi banakolerana batyo. Kandi, mukeneresombyaho bomwichi ku bangabapfuha, ni muli na simeki? Na bakotsi ba santsambi banerekunesombyanya ni bainihire ipfuhwa biwabo.
«Wetuwe, imwe, muneretsiyira abalenda benyu, nekolerabo bibuya. Ni mweresombyabo, butsira iba neene repfuhwa. Batyo, mwendehabwa luhembo lunene, mwendeba bana ba Ongo Nina-mu-mbingu. Kureba, iye, anakolera bibuya bobatasima na bakotsi ba bibi. Munerepfirana boncho ngakuno ko ixo wenyu anabapfirabo.»
Ni mutiereayira abandi bandu yo busha
(Mat 7:1-5)
Yesu nianaxubebula mbu: « Muterechira abandi bandu bo lubancha, nemwe ni yomuterechirwalo. Ni muterepfumaula abandi bandu, nemwe ni yomutenderepfumaulwa. Mutereanchira balikyenyu abibi, nemwe ni yomutendereanchirwabyo. Munerehana, nemwe ni yomukenderehabwa. Na kyomukenderehabwa kyokyendelengwa kushe, netsindairwa, nehirianyibwa neuchutsa asashaho senyu neshesheka. Komunerelengera abandi bandu, nemwe komwenderelengerwa.»
Yesu ninaxubechirabo aundi mushinga uyu mbu: «Mbeni, akihumahumi kyangakocha iendya kindi kihumahumi? Kikekola kityo, abibiri ni bikatoera mu kiribu. Amwiya atangalengya amwiyisa uwe. Wetuwe kintsi mwiya yashaotola iiyisibwa kushe, ni endeba ngakuno amwiyisa uwe.
«Kubwishi bwaki aulola kwa kati kokali mwa lisha ra munyakyenyu, wetuwe, ni utalaire kwa ngingi ya muti yoiri mwa lisha rawe? Wangakocha ute ute ibwira munyakyenyu mbu: ‹Munyakyetu, nilike nitengye akati kokali mwa lisha rawe›, naho ni utalaire kwa ngingi ya muti yoiri mwa lisha rawe? Shetulimi tubiri iwe! Tengya kasa angingi ya muti yoiri mwa lisha rawe, ni yowangakocha ilola kushe, netengya akati kokali mwa lisha ra munyakyenyu.»
Kintsi muti aneremenyerwa kwa bipfuma byao
(Mat 7:24-27; 12:33-35)
Yesu nianabula kandi mbu: «Hatali muti mubuya wangakocha ihetako bipfuma bibi, neri muti mubi wangakocha ihetako bipfuma bibuya. Kintsi muti anamenyerwa kwa bipfuma byao. Abandu batahanula bipfuma bya tini neri bipfuma bya musabibu ku miti ya mahwa. Kwonoko, amundu mubuya anereneena binwa bibuya byobitenga mwa mbikyo yiwe mbuya. Na mundu mubi naye, anereneena binwa bibi byobiuchwire mwa mbikyo yiwe nyibi. Kubwishi, abunu bwa mundu bunereneena byobiuchwire mwa mbikyo ya mwete uwe.»
Mushinga wa manyumba mabiri
(Mat 7:24-27)
Yesu nianabula kandi mbu: «Kubwishi bwaki amwereniluka mbu: ‹Ninakuwetu, Ninakuwetu›, ni mutamukola byonibabwira? Nikababwerekya amundu yaniimitsa, neumpfa abinwa byani, nekola nga kobibwire mbu: «ashushanyibwe na mundu yahimbaa nyumba. Nianatima kasa kutsibu nehika kwa lukanga. Na kwa lukanga uko, kwahiraa amusingi wahimbaako anyumba. Kwabere kwamewa mpfula ya kiti, alwichi nialunauchula, na ngukutsi niainaibanda kwa nyumba uko. Wetuwe, anyumba iyo itakunuka, kureba yabaa ni isimikire.» Wetuwe, ula yaumpfa abinwa byani butsira ikola nga kobibwire, ashushire mundu yahimbaa nyumba yiwe kwa mutaka butsira musingi. Alwichi lwabere lwameuchula, angukutsi niainaibanda kwa nyumba uko. Mu kashalimo, niainakunuka, neshambukala ayoshe.»
Source notes (5)
- Footnote Mwa kihuo kye Isiraeli, amundu anairaa aketsuka mwixwa ali apfire nchala, abaa anapfuna kwa myaka yoieriremo nelya kuyo. Areira batyo, bwabaa bute bwitsi. Soma Muubuko 23:26.
- Footnote Nyumba ya Ongo: Mwa kianiro kya mwami Ndauti, ahekalu yabaa itatsayahimbwa mwa mulungu we Yerusalemu.
- Footnote Soma 1Samwere 21:2-7; Balawi 24:9.
- Footnote Abaselote: babaa kikanga kya Baisiraeli, kyo kyabaa kinalwa kwetengya akihuo kyabo mwa bupfubulwa bwa Baroma.
- Footnote Soma 2Bianiro 36:16; Mikolere 7:52.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.