Luka 7

Yesu alamya amupfubulwa wa mukulukulu wa basura ba Baroma

(Mat 8:5-13)

1Yesu abere ameotola ineena abinwa byoshe ibyo kwa bandu bobabaa abamuumpfiritsa, nianaya mwa mulungu we Kaperenaumu. 2Mwa mulungu umo mwabaa ni muli mukulukulu muuma wa basura ba Baroma. Amukulukulu uyo, ni awete mukotsi yabaa atsiyire kutsibu. Amukotsi uyo, ni mukoni, naye ni ali ku lwepfa. 3Amukulukulu wa basura uyo aumpfaa kwa bandu abashambala kuluenda Yesu. Nianatumira Yesu yo bangumwa bauma ba Bayahuti mbu bamubwire mbu ahike alamye amupfubulwa uwe. 4Abangumwa abo babere bahika ho Yesu ali, niabanaitondoola kuye mbu: «Ninakuwetu, amundu uyu naye analirene umukolere kya kuhema, 5kureba anatsiyira aluanda lwetu. Na kandi, yatuhimbiraa asinakoki yetu.»

6Niyo Yesu aenda kuuma na bangumwa abo. Abere ahika hofi na nyumba ya mukulukulu wa basura, amukulukulu uyo nianalika bera bewe ira mwa Yesu kwemubwira mbu: «Ninakuwetu, utakiitamyaa kubwishi nitalirene ikukokere mwa nyumba yani. 7Na kubwishi bwekyo, shanixunga ngyewene ni nitalirene ihika youli. Wetuwe iwe, neena kinwa kiumaho na mukotsi wani akalama. 8Kureba nani niteekirwa na bakulukulu bani. Nani niwete ku basura boniteekire. Nikebwira muuma mbu ‹enda›, ni aenda. Nikekalihya na undi mbu ‹Wiche› naye ni awicha. Nikebwira mukotsi wani mbu: ‹Kola iki naye ni akolakyo.» 9Yesu abere ahulikya abinwa ibi nianashishalira amukulukulu wa basura uyo. Nianabindukira amubuanano wa mwimitse neneena mbu: «Anibabwira ku mwa kihuo kyoshe kye Isiraeri nitatsanaxungamo mundu yali na bwimire bungana ngobu.»

10Bo batumwaa babere bafuluka kwa mutsi, niabanashingana amupfubulwa ni amelama.

Yesu apfukya amwana wa muxumbakatsi

11Inyuma kwaho, Yesu nianaya mu mulungu muuma walukwa mbu Naini. Abemitsa bewe kuuma na mubuanano munene wa bandu baimitsanya naye. 12Abere axondehika hofi na lukyo lwa mupfunda wa mulungu, nianashingana bandu bobabaa bahete ndundwe ya mwana wa butsana kweya itayo. Amutsana uyo abaa mwana wa kyusha wa muxumbakatsi muuma. Bandu bangi ba kwa mutsi uko ni bahereketse amuxumbakatsi uyo. 13Ninakuwetu abere amuxunga, nianamupfira boncho bungi. Nianamubwira mbu: «Utakiliraa!» 14Yesu nianaipfunda hofi na sanduku nepfula kuyo na bandu bobabaa baheteyo batindira. Yesu niananeena mbu: «Wemutsana, anikubwira mbu, sisimuka!» 15Na mutsana yabaa amepfa, nianasisimuka. Nianaikala, abanetangira ineena. Yesu nianamufulukitsa nina.

16Abandu boshe abo batsimbwa na buba, batangiresingya Ongo mbu: «Mutahwa munene amehika mwa kati ketu! Ongo amehika itutabara twe bandu bewe!» 17Akinwa ikyo kye Yesu akolaa kishanchana mwa kihuo kyoshe kye Yuteya na mwa bindi bihuo byoshe bya mwa misike.

Yohana Murubiki alika bemitsa bewe ira mwa Yesu

(Mat 11:2-19)

18Abinwa byoshe ibyo, abemitsa ba Yohana, baya imupfulirabyo. Kubwishi bwekyo, Yohana nianabirangira babiri mwa bemitsa bewe. 19Nianalikabo ho Ninakuwetu ali, kwemubutsa mbu: «Mbeni iwe we Masiya yakendewicha neri tulindire undi?» 20Abemitsa abo bahika ho Yesu abaa ali. Bamubwira mbu: «Yohana Murubiki shatulika kwiwe mbu tukubutse mbu mbeni we Masiya yakendewicha, neri tulindire undi?»

21Mwa kashangi umo, Yesu nianalamya bandu bangi bobabaa abanubibwa na makoni, na birema na bobabaa baundirwe na bixwatsi. Nianaha bihumahumi bingi yo xumo yelola. 22Yesu nianaxubitsa abemitsa bobatumwaa ne Yohana mbu: «Muende, shamupfulire Yohana abinwa byoshe ibyo byomwamelolako neumpfa. Abihumahumi abilola, na bobaxuneera abaenda, na babentsi abakomibwa, na batwitwi abahulikya, na bapfu abapfùka, na bachene abapfulirwa aMwatsi Mubuya. 23Aashanirwe amundu yatendehetsa abwimire buwe mwingye.»

24Abandu bo Yohana alikaa, niabanafuluka. Niyo Yesu atangira ibwira amubuanano wa bandu kuluenda Yohana, mbu: «Mbeni mwayaa mwa bweru kweya ixungayoki? Mbeni lusheke lolutinganyibwa na muyaa? Ihi! 25Neri, inde yomwayaa ixungako? Mbeni mundu aimbere ngimba sikwirire? Ihi! Bobanaimbala ngimba skwirire na bobali mu buxoki, banaikala mwa manyumba ma bami. 26Kiki kyomwayeexungako? Mbeni Mutahwa? Naki! Anibabwira ku abaa mutahwa, ni alengyitse na mutahwa. 27Kuluenda Yohana uyo kokyaandikwaa mwa Maandiko Makomire mbu:

‹Muumphe! Nalika andumwa yani mbu ikuxondolere,

kwebula mbu ikutemulire anchira.1.›

28«Anibabwira imwe, ku mwa bandu boshi bobaliho kwa kihuo, mutali yalengyitse Yohana. Wetuwe amulere kutsibu mwa Bwami bwa Ongo yanamulengyitse.»

29Abandu boshe na bafutishi ba koli bobahulikyaa amyatsi wa Yohana bamenya ku Ongo anakola byobitunganene, baba nerubikwa naye. 30Wetuwe, aBafarisayo na beyisa ba Muomba, baitindira kuluenda ibo, kye Ongo abaa axonda ikolerabo. Kubatyo, baitinda irubikwa ne Yohana.

31Yesu nianabula kandi mbu: «Nikashushanya abandu ba mwa biro bino nende? Nende ye bashushire? 32Bashushene na bana baikere mwa mbua, abaumananga binwa mbu:

‹Twabatsihiraa murumbu, wetuwe, mutamutsinaa!

twabaimbiraa nyimbo kandi sa kiriro, wetuwe, mutaliraa!›

33«Kureba Yohana Murubiki ahikaa, abaa muhanga weihangira ilya, nexoma tifai, nemwe ni mwerebula mbu aundirwe na kixwatsi. 34Muala wa Mundu awichaa ni alya nexoma, nemwe amubula mbu: ‹Tsene kwa mundu uyu mukuhu na mutamitsi! Na mwira wa bafutishi ba koli na bandi bakotsi ba ntsambi›. 35Wetuwe abandu boshe bobaimirire abuteateanya bwa Ongo, baneremenya kwa buteateanya ubo butunganene.»

Yesu ashashira mukatsi muuma wa ntsambi

36Mufarisayo muuma nianalalika Yesu mbu ahike alye biryo mwamwe. Yesu nianaingira mwa nyumba ya mufarisayo uyo, nianaikala netangira ilya. 37Mwa mulungu umo mwabaa mukatsi muuma wa ntsambi. Amukatsi uyo nianaumpfao ku Yesu alya bilyo mwa nyumba ya mufarisayo. Nianaingiramo ni awete ku ngaha ye bale, yo iuchwire lungo lwa kichiro kinene. 38Nianaimana ira nyuma ku Yesu, hofi na bishando biwe ni alira. Na sandiro siwe seretotya abishando bya Yesu. Niyo amukatsi uyo erekababyabyo mwa mpfiri siwe. Nianakokera abishando bya Yesu nehakabyo lungo. 39aMufarisayo uyo yalalikaa Yesu abere axunga batyo, nianaibubukya mbu: «Amundu uyu ali mutahwa, nge angamenyire ku uhe mukatsi yamemupfulako na wa bwokoki, nge amemenya ku amukatsi uyu mukotsi wa ntsambi.»

40Yesu nianabwira aMufarisayo uyo mbu: «Simoni, niwete kinwa kye kubwira» Ne Simoni naye nianaxubya mbu: «Mwiyisa, neena.» 41Yesu nianabula mbu: «Kwabaa bandu babiri ni baindikirwe na mundu muuma. Muuma mubo ni aindikirwe tinari2 maana matano. Na undi ni aindikirwe tinari makumi atano. 42Kubwishi abandu babiri aba babaa batawete kyepfuha, yaindikaabo nianashashira ababiri. Eo! Inde mwa bandu babiri aba, yangatsiyira kutsibu nina asatinari?» 43Simoni nianaxubya mbu «Anianikira ku yashashirwaa mwinda munene.» Yesu nianamubwira mbu: «Wamexubya kushe.»

44Niyo Yesu akebera ira amukatsi ali, nianabwira Simoni mbu: «Utatsene kwa mukatsi uyu? Shaniingira mwa mwawe muno, utashauniha mechi meoya abishando. Wetuwe, amukatsi uyu, iye, shanikarabya abishando byani mwa ndiro siwe, nekababyabyo mwa mpfiri siwe. 45Utashaunikokera mwa mango shauniketsa. Wetuwe iye, ihuluka ho shaniingirira muno, atatangire alika ikokera abishando byani. 46Utashaunihaka mapfuta kwa mutwe wani, wetuwe iye, shanihaka lungo kwa bishando byani3. 47Kyokituma nikubwira ku nakiro asantsambi sa mukatsi uyu saluwa, nameshashirato. Kubatyo, amenibwerekya kwanitsiyire kutsibu. Wetuwe, yarameshashirwa bike, anatsiira like.» 48Nianabwira amukatsi mbu: «Namekushashira asantsambi sawe.»

49Bo babaa abalya kuuma naye, niabanatangira ibutsabutsanya mbu: «Esi! Munduki uyuno, yangashashira ntsambi?» 50Wetuwe Yesu nianabwira amukatsi mbu: «Abwimire bwawe bwamekuufula, iendere mu buholo.»