Skip to content
BibleKenya

Hunde Nouveau Testament

Luka 8

Abakatsi bo babaa banahereketsa Yesu

Inyuma kwaho, Yesu abaa ni atsuka mwa milungu na mwa mitsi ni ahubiri nepfulira abandu aMwatsi Mubuya wa Bwami bwa Ongo. Abaa kuuma na sandumwa siwe ikumi nebiri. Habaa hali kandi na bakatsi bauma babaa amehentsamo bixwatsi nelamya amakoni mabo. Mwa bakatsi umo ni muli Mariya, mwicha mwa mutsi we Makitala. Ne Mariya uyo ni yo Yesu ahentsaamo abixwatsi birinda. Ne Shani, muka Kusa. Ne Kusa uyo yabaa mwimanitsi wa bitwe bya mukulukulu Herote. Ni hali ne Susana na bandi bakatsi bangi. Abakatsi abo bobabaa banahana kwa bitwe byabo kweasikya Yesu na sandumwa siwe.

Amushinga wa mubibi

(Mat 13:1-9; Mar 4:1-9)

Bandu bangi babaa banatoka mwa milungu yoshe kwebuanana ho Yesu ali. Yesu nianachirabo amushinga uyu mbu: «Mundu muuma ayaa ibiba mbuto mwexwa liwe. Abere ali yabiba asambuto ito, mbuto siuma sitoera kwa musike wa nchira. Abandu balyatangato, na sanyonyi sa mwa kyanya silyato. Sindi mbuto sitoera ku mutaka wa mabale. Sabere samexuka, siuma kubwishi ni samehusha mechi mwa mutaka. Sindi mbuto niasinatoera mu biti bya mahwa. Asambuto ito sixuka kuuma na mahwa ayo maba nepfunderetsato. Wetuwe sindi mbuto, sitoera ku mutaka wa buinu. Sixuka, nehetako bikumba. Na kintsi kikumba, ni kiriko mbeke iana.» Yesu abere ameneena ibyo, nianalehya amulenge kandi, mbu: «Yawete matwi meumpfa, aumpfe!»

Abemitsa bewe niabanamubutsa mbu mbeni amushinga uyo abwire ate? Yesu nianaxubitsyabo mbu: «Imwe muherwe xumo yaremenya abinwa byobibishirwe bya bwami bwa Ongo. Wetuwe, abandi bandu ibo, alihema ni nerebwirabo mu mishinga kwebula mbu:

‹Basindere, wetuwe batilole

bahulikye, wetuwe batiumpfe1.›»

Yesu aanulira amushinga wa mubibi

(Mat 13:18-23; Mar 4:13-20)

Yesu nianabula kandi mbu: «Amushinga uyo abwire atya: Ambuto, kinwa kya Ongo. Na sambuto sosatoeraa kwa musike wa nchira sishushanyibwe na bandu bo banaumpfa akinwa kya Ongo. Inyuma kwaho, Shitani ni ahika itengyakyo mwa myete yabo, kwebula mbu bataimiriraa neufulwa. Asambuto sosatoeraa kwa mutaka wa mabale, sishushanyibwe na bandu bobanaumpfa akinwa kya Ongo neangirirakyo mu lumoo. Wetuwe akinwa ikyo ni kitisimike mwa myete yabo ngakuno milya. Ni baimirirakyo mu kashangi kakeho. Na mwa mango amyereko yahikirabo, ni basiya akinwa ikyo. Na sambuto sosatoeraa mu biti bya mahwa, sishushanyibwe na bandu bobanaumpfa akinwa iki kya Ongo. Wetuwe amiririkano na buxoki, na ntsiyi ya bindu bya kihuo kino, nabyo ni byerepfunderetsa akinwa ikyo mwa myete yabo. Kyokinatuma batabako bipfuma bikulire. Asambuto sosatoeraa kwa butaka buinu, ito, sishushanyibwe na bandu bobanaumpfa akinwa kya Ongo mu mwete mubuya na watunganene. Abo, bobanalanga akinwa ikyo mu ibeera nehikira ibako bipfuma.»

Amushinga wa retala

(Mar 4:21-25)

Yesu nianaxuba ineena mbu: «Hatali mundu yangawakya itala nepfunikiraro mu kitonga, neri kwehiraro mweshishi wa ngyingo. Wetuwe, ni ahanikaro ku kahango, kwebula mbu bo baingira mwa nyumba umo ni baxunga kwa kyaka. Abinwa byoshe byobibishirwe byendemenyibwa kyenene. Na binwa byoshe byobikolwa mu nama byendebixulwa kyenene.

«Kunchi, mukohye kwa binwa byomuhulikya mo biro muno. Kubwishi amundu yawete kindu yanahabwa kindi. Wetuwe, yatawete ku kati kasibya endenyawa na kairemba iba nako.»

Baala babo Yesu ne nina

(Mat 12:46-50; Mar 3:31-35)

Lwire luuma, baala babo Yesu ne nina baya imuxunga. Wetuwe batakocha ihika harali kubwishi bwa mubuanano wa bandu. Abandu babwira Yesu mbu: «Nyoko na baala benyu baimene ha mbuwa, abaxonda ikuxunga.» Wetuwe, Yesu nianaxubitsabo mbu: «Mali na baala betu, ni bo banahulikya akinwa kya Ongo nekola ngakuno ko kibwire.»

Yesu atsitsa muhusi

(Mat 8:23-27; Mar 4:35-41)

Lwire luuma, Yesu nianaurukira mu bwato kuuma na bemitsa bewe. Nianabwirabo mbu: «Tushabukire kwa undi mushirya wa ngetsi.» Niabanaenda. Babere bali yo bapfuama, Yesu nianaya tulo. Mu kashalimo, muhusi munene nianaikubita kwa ngetsi. Amechi niamanatangira iingira mwa bwato, niabanaingira mu kikuba kyexonda ishenda. Abemitsa bewe niabanaipfunda hofi naye, niabanamusisimula mbu: «Mwiyisa, Mwiyisa, twapfa!»

Yesu nianasisimuka, nianakemera amuhusi, na muhusi nianatsira na mechi nao mawika. Niyo Yesu abutsa abemitsa bewe mbu: «Abwimire bwenyu buli hai?» Niabanatsimbwa na buba neshishala kutsibu. Niabanabutsabutsanya mbu: «Munduki uyu? Kubwishi anabe na muyaa na muhusi akemerabyo, nabyo, abikola nga kwa bula!»

Yesu ahentsa bixwatsi mwa mundu

(Mat 8:28-34; Mar 5:1-20)

Inyuma kwaho, Yesu na bemitsa bewe bashabuka angetsi basheeka abwato bwabo kwa musike wa kihuo kya Bakerasi, kweshirya wa kyango kye Ngalilaya. Yesu, abere akimira hashi, mundu muuma wa mwa mulungu uyo nianaya ikorana naye. Na mundu uyo abaa aundirwe na bixwatsi. Na mu biro bingi ni atakiimbala ngimba. Ni atakiikala mu nyumba, wetuwe kwa masinda ni kwahara anaishibanira. Amundu uyo, abere axunga Yesu, nianailakira kutsibu, neiuma mwa bishando biwe neneena mu mulenge mule mbu: «Ee! Yesu, Muala wa Ongo Nina mu mbingu, Aunixondakoki? Anikuhema, utaninubyaa!» Abulaatyo kubwishi Yesu abaa ni amemuhentsamo akixwatsi. Akixwatsi ikyo kyabaa kinamuundira ngendo nyingi. Nakiro mbu, abandu babaa banamusibika mu bulebule na mu byuma mbu atangecheshaa, wetuwe iye, ni anahutulangabyo. Na kixwatsi ikyo, kyabaa kinamutwala hohataba bandu.

Yesu nianabutsa amundu uyo mbu: «Aretsina rawe wende?» Naye nianamuxubitsa mbu: «Aretsina rani ngye ‹Tuli bangi.›» Aneenaa batyo, kubwishi ni aundirwe na bixwatsi bingi. Abixwatsi ibyo, niabinaitondoola ku Yesu mbu atahentseraabyo mwa shehenamu.

Na handu aho, habaa hali kihyo kinene kya ngulube ni abikerera kwa kitwa. Abixwatsi ibyo, niabinaitondoola ku Yesu mbu ahebyo rubu lweingira mwa biololomo. Nianahabyo rubu. Kubatyo, abixwatsi ibyo niabinatenga mwa mundu uyo neingira mwa ngulube ito. Na kihyo kyoshe kya biololo ibyo, niakinakima chuba kwa kitwa neiuma mwa ngetsi, kiba netsika mwa mechi.

Na basumba ba sangulube ito, babere bamexunga ku byobyametsuka, niabanalibita chuba mwa mulungu na mwa bihya kwepfulirao abandu. Na bandu niabanaya ixunga kyokyameba. Babere bamehika ho Yesu ali, bashingana amundu yarametokamo abixwatsi ni aikere mwa bishando bya Yesu, ni ahara imbere, naye ni amefulukya abwenge. Abandu abo niabanaubaha. Na bandu bobaixungiraa ku byobyabaa byametsuka, bapfulirao abandi kwa amundu uyo yabaa aundirwe na bixwatsi ku amelamibwa. Na bandu boshe ba mwa kihuo kya Bakerasi batsimbwa na buba bungi. Na kubwishi bwekyo, babwira Yesu mbu atokerebo mwa kihuo kyabo. Niyo Yesu auruka mwa bwato, kwefuluka.

Amundu yashatokamo abixwatsi, ayitondoola ku Yesu mbu aende kuuma naye. Wetuwe, Yesu nianamufulukya, amubwira mbu: «Fuluka kwa wawe, shaupfulire abandu abyoshe byo Ongo amekukolera.»

Amundu uyo, nianaenda mwa mulungu woshe ni apfulirao abandu byo Yesu amemukolera.

Yesu apfukya mwali wa Yairo nelamya mukatsi muuma

(Mat 9:18-26; Mar 5:21-43)

Yesu abere ali yafuluka, bandu bangi bahika imukokera kubwishi aboshe babaa ni bamulindire. Mwa mango umo, mulume muuma, yalukwa mbu ye Yairo nianahika. Ne Yairo uyo abaa mwimanitsi wa sinakoki. Nianapfukama mwa mbere sa Yesu neitondoola kuye mbu aingire mwa mwe, kureba mwali abaa ni ali ku lwepfa. Abaa mwana uwe wa kyusha, yashembashemba myaka ikumi nebiri.

Yesu abere ali yaya ira mwa Yairo, mubuanano munene wa bandu bereenda ni abamupfundeeretsa. Mwa mubuanano umo, mwabaa mukatsi muuma ni amebanda myaka ikumi nebiri ni alwere bukoni bwehetsa shiama. Abaa amemala abitwe biwe byoshe kwepfuha abanganga2. Wetuwe, atalamibwa na kiro na muuma mubo. Amukatsi uyo nianapfumbuka ira nyuma ku Yesu, aba neata kwa mupfungo wa lukimba luwe. Na mwa kashangi umoho, abukoni buwe bwarehetsa ashiama niabunalama.

Yesu nianabutsa mbu: «Inde yamenipfulako?» Abandu boshe baiana mbu batamupfulireko. Niyo Petero amubwira mbu: «Esi! Mwiyisa, utatsene kwa mubuanano wa bandu bakutsungwireko nekupfundeeretsa?» Wetuwe, Yesu nianabula mbu: «Hali mundu yamenipfulako, kubwishi nameumpfa ngakuno amaala amahuluka mwingye.»

Amukatsi uyo abere amexunga kwamekengulwa, nianaenda ho Yesu ali ni atitimana. Nianapfukama mwa mbere siwe. Apfulao mwa kati ka bandu boshe kyoshakituma amupfulako, na ko shalamibwa mwa kashangi umomoho. Yesu nianamubwira mbu: «Mwali wani, abwimire bwawe bwamekulamya. Iendere mu buholo.»

Yesu abere akinali aneena, niakunahika mundu yatoka ira mwa Yairo amukulukulu wa sinakoki, amubwira mbu: «Waliha, mwiisa, utakiitamyaa, hatakiriki!» Yesu abere ameumpfao, abwira Yairo mbu: «Utaubahaa, unaimiriraeho, mwali wawe elama.»

Yesu nianahika ha mwa Yairo. Atatsiya mbu undi mundu aingire mwa nyumba kuuma naye, bali bate abemitsa bewe, Petero ne Yohana, ne Yakobo, na babuti ba mwana uyo. Abandu boshe babaa ni abalira neikungutanga kubwishi bwa lupfu lwa mwananyere uyo. Wetuwe, Yesu nianabula mbu: «Mutaliraa, kubwishi amwananyere uyu atapfire, wetuwe, anaonchireho.» Abandu babere baumpfa ko Yesu abula batyo, niabanamusheka kubwishi ibo ni bechi kwa amwananyere uyo amekinda ipfa. Wetuwe Yesu nianatsimba kwa minwe ya mwananyere uyo, nianamubirangira mu mulenge mule mbu: «We mwananyere, sisimuka!»

Amwananyere uyo, nianaxuba ifulukya amutima, abanebatuka. Yesu nianabwira abandu mbu bahe amwananyere uyo yo bilyo. Ababuti ba mwananyere uyo niabanashishala kutsibu. Yesu nianakurabo amatwi mbu batendebwira mundu woshewoshe byobyametsuka.

Source notes (2)
  1. Footnote Soma Isaya 6:9.
  2. Footnote Abaa amemala abitwe biwe byoshe kwepfuha abanganga: Bitabo biuma bya kwa mira bya Kikiriki bitawete abinwa ibyo. Soma Mariko 5:26.

Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.