Luka 9

Yesu atuma asandumwa siwe ikumi nebiri

(Mat 10:5-15; Mar 6:7-13)

1Lwire luuma, Yesu nianabuanyanya abemitsa bewe ikumi na babiri. Nianahabo maala na nyiki sehentsa abixwatsi byoshe nelamya abakoni. 2Nianatumabo kwepfula amwatsi wa bwami bwa Ongo nelamya abakoni. 3Nianabwirabo mbu: «Mwa luendo lwenyu, mutahekaa kiro na kindu. Mutahekaa ngóma, neri shaho, neri mbamba, neri faranga. Kintsi muuma mwime nianahekaho lukimba luuma. 4Mu kinsti nyumba yomukachumbikamo, ni mwaikalamo ihikira amango momwendetoka mwa mulungu umo. 5Na mu kintsi mulungu womutikokerwemo, ni mwatoka muo. Wetuwe, mwa mango amutoka muo ni mwa kunguta amupfupfu wali kwa bishando byenyu1. Ikyo kyendeba kaliho kwa bandu abo.» 6Niyo asandumwa ito saenda ni asitsuka mulungu ku mulungu. Sitsuka ahoshe ni asipfula aMwatsi Mubuya nelamya abakoni boshe.

Amyatsi ya Yesu yashatya abwenge bwa mwami Herote

(Mat 14:1-12; Mar 6:14-29)

7Herote, amukulukulu wa kyango kye Ngalilaya nianaumpfa abinwa byoshe ibyo. Abwenge buwe bushata, kubwishi bandu bauma niababula mbu, Yohana Murubiki yamepfuka. 8Na bandi niababula mbu amutahwa Eliya yamexuba, na bandi kandi mbu muuma mwa batahwa ba kwamira yamepfuka.

9Wetuwe, Herote nianabula mbu: «Ingye ngyenawene ngye nabulaa mbu bache amutwe wa Yohana. Tsene, inde uyu kandi yaniumpfako amyatsi yoshe iyi?» Kubwishi bwekyo, Herote nianaxonda kwangaxunga Yesu.

Yesu auutya bandu bihumbi bitano

(Mat 14:13-21; Mar 6:30-44; Yoh 6:1-14)

10Asandumwa sifuluka sitangira ipfulira Yesu abinwa byobabaa bamekola. Nianaenda nabo hale na bandu. Niabanaya kwa undi munda wa mulungu we Betesaita.

11Wetuwe abandu bacha luche kwali iyo, niabanamukulikira. Yesu nianakokerabo kushe nepfulirabo amyatsi kuluenda aBwami bwa Ongo. Na bobabaa balwere, alamyabo.

12Bwabere bwahara buoloba, asandumwa ikumi nebiri sa Yesu sihika harali kwemubwira mbu: «Waliha! hotuli hano hale na mutsi, kubwishi bwekyo, shaungabwirire abandu mbu bafuluke baye mwa mitsi yoiri hofi, baye na mwa bihya baxondemo maonchiro na bilyo.» 13Wetuwe Yesu nianabwirabo mbu: «Mwenabene muhebo bilyo.» Nabo, baxubya mbu: «Tuweteho ku mikati itano na fi ibiri. Auxonda mbu twenabene tuulire abandu boshe aba bo bilyo?» 14Abandu bobabaa aho babaa abashembashemba balume bihumbi bitano. Niyo Yesu abwira abemitsa bewe mbu: «Muikatse abandu mu bikanga bya bandu makumi atano.» 15Abemitsa baira ngakuno ko Yesu abwiraabo. Batyo, baikatsa abandu boshe. 16Yesu nianatsimba amikati itano na safi ibiri ito, alalamira mu mbingu, nebula mbu Ongo asinge. Inyuma kwaho, nianacha muyo, nianahayo abemitsa bewe kweabirayo abandu. 17Abandu boshe abo niabanalya newuuta. Abemitsa niabanatolerera amisialitsa, bauchutsa bitonga ikumi na bibiri.

Petero abula mbu Yesu ye Kirisitu

(Mat 16:13-19; Mar 8:27-30)

18Lwire luuma, Yesu abaa ahemera Ongo mu handu ha butomo na bemitsa bewe ni bali hamusike kuye. Nianabutsabo mbu: «Abandu aberebula mbu ingye ngyende?» 19Niabanamuxubitsa mbu: «Bauma aberebula mbu, iwe we Yohana Murubiki. Na bandi, mbu we mutahwa Eliya. Na bandi kandi mbu uli muuma mwa batahwa ba kwamira yamepfuka.» 20Niyo Yesu abutsabo mbu: «Nemwe amwerebula mbu ingyono ngyende?» Petero nianaxubya mbu: «Iwewe we Kirisitu we utumirwe ne Ongo.»

Yesu ashambala kuluenda alupfu na repfuka liwe

(Mat 16:20-28; Mar 8:30–9:1)

21Yesu nianahangirabo kutsibu mbu batahira bakepfulira mundu woshe woshe amwatsi uyo. 22Nianaxubebula mbu: «Ngye Muala wa Mundu, nishushire inubibwa lingi, netindwa na bangumwa na boshebakungu na beisa ba Muomba. Nikaitwa, na mwa lwire lwakashatu, nikapfuka.»

23Na kandi, Yesu nianabwira boshe mbu: «Amundu ali axonda inikulikira, ni ereiana yewene. Ni aikiritsa iheka amusalaba uwe kintsi lwire, niaba nenikulikira. 24Kubwishi, amundu yaxonda iufula abuingo buwe ni akahetsabo. Wetuwe, amundu yakahetsa abuingo buwe kubwishi bwangye, endeufulabo. 25Na kandi, amundu akeba na buxoki boshe bwa kihuo, wetuwe akeihetsa neibihya yewene, angaba na mungurukoki? Hatali! 26Kubwishi bwekyo, amundu yakanipfira xoni, nepfira abinwa byani byo xoni, ingye Muala wa Mundu nendemupfira xoni. Ibyo byendeba mwa mango nendehika mwa ngulu yani, nayo yo ngulu ya Tata kuuma na bamalaika bewe bakomire. 27Ko lune lutyo! Anibabwira, ku bandu bauma mu bo bali hano, batendepfa batechibaxunga kwa bwami bwa Ongo.»

Abusu bwa Yesu bwaihingya

(Mat 17:1-8; Mar 9:2-8)

28Kwabere kwametsuka biro abishembashemba munane, Yesu aneenire abinwa ibyo, nianatsimba Petero, ne Yohana, ne Yakobo. Nianaurukira kwa kitwa kuuma nabo kweya ihema Ongo. 29Abere ali yahema Ongo, abusu buwe buihingya na lukimba luwe luba lwa mweru kutsibu nebwengabwenga nga kisherya. 30-31Na mwa kyaka ikyo, mupfumbuka balume babiri, Musa ne Eliya. Abalume babiri abobabaa ni abasimola ne Yesu ku akamala amulimo uwe nepfira i Yerusalemu. 32Mwa kashangi umo, Petero na balikyabo ni bahotokire na tulo. Wetuwe, basisimuka, baxunga angulu ya Yesu, na balume babiri abo ni baimene hofi naye. 33Abalume babiri abo babere bamesiana ne Yesu, Petero nianamubwira mbu: «Mwiyisa, likwirire tuikale hano. Tuhimbeho mahema mashatu: liuma likaba rawe, na lindi likaba ra Musa, na lindi ra Eliya.» Petero abaa atechi kyabula. 34Petero abere akinali aneena atyo, niakunapfumbuka kipfu, kixwikabo. Abemitsa abo batsimbwa na buba kwexunga ko bamexwikwa na kipfu ikyo. 35Na mwa kipfu ikyo niamunaumpfibwa mulenge wabula mbu: «Uyu, ye Muala wani yo namekindelondola. Muneremuumpfira2!» 36Amulenge uyo, abere ameumpfibwa, abemitsa abo baxunga Yesu ni ameshiba yewene. Abinwa byoshe ibyo byobalolaako, niabanatsirira kubyo. Mwa biro byoshe umo, batabwirabyo kiro na mundu.

Yesu ahentsa kixwatsi

(Mat 17:14-18; Mar 9:14-27)

37Bwabere bwakya, Yesu na bemitsa bewe bashatu abo, bakima ampfuli. Na mubuanano munene wa bandu amuhikira. 38Mwa mubuanano umo, mundu muuma niananeena mu mulenge mule mbu: «Mwiyisa, anikuhema mbu unilolere ku muala wani. Kubwishi uyuho yena mwana muuma ni weteko! 39Akixwatsi akyeremuundira, ni kyamulakya, nemuhirianya kutsibu, na lufumba ni lwahuluka mwa bunu. Akixwatsi ikyo, kinamunubya kutsibu, kitabanemutokamo chuba. 40Nabwiraa abemitsa bawe mbu bahentse akixwatsi ikyo, wetuwe batashabakocha.»

41Yesu nianaxubya mbu: «Mwe bandu ba lubuto luno mutainihirwa, na kandi muli bandu babi kutsibu. Nexubeikala nemwe neumpfiritsa abinwa byenyu ihikira kihe kianiro? Leta muala wawe hano!»

42Mwa kashangi amwana uyo abaa aipfunda hofi ne Yesu, akixwatsi kimubanda heshi, kiba nemuhirianya kutsibu. Wetuwe Yesu nianakemerakyo, alamya amwana, abanemufulukitsa ishe. 43Abandu boshe bashishala kwexunga amaala manene ma Ongo.

Yesu axubepfula amwatsi wa lupfu luwe

(Mat 17:22-23; Mar 9:30-32)

Abandu abo babere bakiri abashishalira abinwa byoshe byo Yesu abaa erekola, Yesu nianabwira abemitsa bewe mbu: 44«Mutee amatwi kushe. Muumpfe byaranixonde babwira: ‹Muala wa Mundu aterekwa mwa minwe sa bandu.›» 45«Wetuwe, abinwa byo Yesu abwiraabo, batamenya ko bibwire. Kubwishi byabaa bibishirwe kubo, niabanaubaha imubutsa ko bineenire.»

Inde ye mukulukulu mwa bwami bwa Ongo

(Mat 18:1-5; Mar 9:33-37)

46Abemitsa ba Yesu niabanaya buhaka kwexonda imenya ngakuno inde mubo ye mukulukulu. 47Yesu abaa ni ahara echi amianikire yabo. Ikyo kituma atsimba mwana mulere, nianamuhira hofi naye. 48Abanebwirabo mbu: «Kintsi yakokera amwana uyu mwetsina rani, ni amenikokera. Na kintsi yakanikokera, ni amekokera yanilikaa. Kureba amuke mwimwe, uyo ni ye mukulukulu.»

Yate mulenda wenyu ni ali kwa munda wenyu

(Mar 9:38-40)

49Niyo Yohana abula mbu: «Mwiyisa, twaxungaa ku mulume muuma ni ahentsa abixwatsi mwe tsina rawe. Wetuwe, tumuhangira kubwishi ni ate wa mwa kikanga kyetu.» 50Yesu nianabwirabo mbu: «Mutamuhangiraa, kubwishi yate mulenda wenyu, uyo ni ali kwa munda wenyu.»

Basamariya bauma batinda ikokera Yesu mwa mutsi wabo

51Abiro bya rekukumwa ra Yesu kweya mu mbingu byabaa byaxondehika. Kubwishi bwekyo, nianatsimba muanikire weya i Yerusalemu. 52Nianalika bandu bauma kwemuxondolera. Abandu abo, niabanaenda neingira mu mutsi muuma wa Basamariya kwemuxondera umo ichumbi. 53Wetuwe becha mwa mutsi umo batinda imukokera kubwishi ni ali mu luendo lweya i Yerusalemu3. 54Abemitsa bewe, Yakobo ne Yohana babere bamexunga batyo, babula mbu: «Ninakuwetu, wangatsiya mbu tuheme amuchanwa akime kwetenga mu mbingu ahwerekeretsebo?»

55Yesu nianakebera nekemerabo4. 56Mwa ntsindiro, Yesu na bemitsa bewe baya mu undi mutsi.

Abandu bo baxonda ikulikira Yesu

(Mat 8:19-22)

57Mwa kashangi Yesu na bemitsa bewe, babaa bakinali mwa nchira, mundu muuma nianamubwira mbu: «Nikenderekukulikira ahoshe houkendereya.»

58Yesu nianamuxubitsa mbu: «Amiterere iwete menda, na sanyonyi sa mwa kyanya siwete nyutu. Wetuwe Muala wa Mundu atawete buonchiro.»

59Yesu nianabwira undi mundu mbu: «Unikulikire.» Amundu uyo naye nianabula mbu: «Ninakuwetu, unihe rubu nitange naya ita tata.» 60Wetuwe, Yesu nianamubwira mbu: «Lika abapfu bereta abapfu babo. Wetuwe iwe, enda, shaupfulire abandu amwatsi wa kuluenda aBwami bwa Ongo.»

61Na undi mundu naye nianabula mbu: «Nenderekukulikira, wetuwe, Ninakuwetu, unihe rubu nitangenaya ilaa angumo yani.» 62Yesu nianamubwira mbu: «Amundu ametangira ihinga, ni atikikebere. Yakakola atyo, ni atalirene ikolera abwami bwa Ongo.»