Skip to content
BibleKenya

Hunde Nouveau Testament

Luka 10

Yesu atuma bandi bemitsa makumi alinda na babiri

Inyuma kwaho, Ninakuwetu nianaxubelondola bandi bandu makumi alinda na babiri1. Nianatumabo babiri babiri kwemuxondolera mu kintsi mulungu na kintsi handu habaa axonda iya yenawene. Nianabwirabo mbu: «Amyaka ierire mingi, wetuwe abaxotsi bobake. Kubwishi bwekyo, muheme nina amyaka mbu atume bandi baxotsi. Muende! Wetuwe muumpfe kasa: nabalika nga byana bya mbuli mwa kati ka sanyambwe. Mutahekaa faranga, neri shaho, neri bilyato. Ni mutiketse mundu mwa nchira.

«Na mu nyumba yosheyoshe yomukaingiramo, ni mwaketsa bechamo mbu: ‹Abuholo bube mwa nyumba muno.› Na mwa nyumba umo, muli mundu yaxonda buholo, abuholo bwenyu ubo ni bukaba kwiye. Butsira ulo, abuholo bwenyu ubo ni bwabafulukira. Ni mwaikalomo ni amulya nexoma byo becha umo bakabasheera, kubwishi amukotsi alirene ihabwa amushahara uwe. Ni mutitoke mu nyumba mbu mwaya mu indi. Na mu kintsi mulungu wo mukaingiramo, abandu bakebakokera, ni mwalya byo bakabasheera. Na bakoni bomukatimana mwa mulungu umo, ni mwalamyabo. Ni mwabwira na bechamo mbu: ‹abwami bwa Ongo bwahara hofi nemwe.› Wetuwe, kintsi mulungu womukaingiramo, bechamo batabakokere, ni mwaya mwa mbua yao neneena mbu: ‹Atubakungutira amupfupfu wa kwa mutsi wenyu washali kwa bishando byetu2. Wetuwe kyomumenyae, aBwami bwa Ongo bwahara hofi.› Anibabwira ku mwa lwire lwa recha lubancha, becha mulungu uyo bendechirwa lubancha lutsibu lulengitse lwa becha mwa mulungu we Sotoma3.»

Yesu atukanga amilungu yo itamwimirire

(Mat 11:20-24)

Yesu nianabula kandi mbu: «Mulyae mo becha mwa mulungu we Korasini! Mulyae mo becha mwa mulungu we Betesaita! Kureba, nakolire tushingishiro mwa kati kemwe. Na niri nakolaa atushingishiro uto mwa mulungu we Tiro na we Sitona, nge becha iyo, ibo, nge baimbalaa biunira neikala mu ipfu kwebwerekya ku bamehingya amiberere yabo. Kubwishi bwekyo, mwa lwire Ongo endechira abandu bo lubancha, becha Tiro ne Sitona bendechirwa lubancha lwangu irengya lwa becha Korasini ne Betesaita. Na mwe becha mwa mulungu we Kaperenaumu, amuanikira mbu mwendeurukibwa mu mbingu? Ihi! Mwendekimibwa i kutsimu.»

Na kandi, Yesu nianabwira abemitsa bewe mbu: «Amundu yabaumpfira, ingye ni ngye aumpfira. Wetuwe, yamebatinda, ingye ni ngyametinda. Na yamenitinda ingye, ni ametinda Ongo yanilikaa.»

Abemitsa makumi alinda na babiri bafuluka

Hanyuma, abemitsa makumi alinda na babiri abo bafuluka ni bamoire kutsibu. Babula mbu: «Ninakuwetu, binabe na bixwatsi, twabere tuli atuhentsabyo mwe tsina rawe, ni byakola nga ko shatubwirabyo.» Kubatyo, Yesu nianabwirabo mbu: «Shanixunga Shitani ni atoa kwetenga mu mbingu ngakuno kisherya. Muumpfe kushe! Nabahere maala mehima Shitani. Kunchi, mwa maala ayo munerelyatanga nchoka na biratsi. Hatakiri kindu kyo kyendebaira kubi kandi. Wetuwe mutamoaa kubwishi abixwatsi abikola byamubwirabyo. Wetuwe, mumoe kubwishi amatsina menyu mamekinda iandikwa mu mbingu.»

Yesu amoa

(Mat 11:25-27; 13:16-17)

Mwa kashangi umomoho, Yesu nianamoa kutsibu mwa maala ma Mutima Akomire. Niananeena mbu: «Tata, iwe we Nina ambingu! Na kihuo, anikusingya kubwishi abinwa ibyo wabishaabyo kwa bateateanya na basomi. Wetuwe, wamexwikulirabyo abana. Naki Tata, obyoshe ibi bitengire mweshasha rawe.

«Tata amehira abindu byoshe mwa minwe sani. Hatali mundu yanichi ingye, ngye Muala, ali ateho Tata. Hatali na mundu yechi Tata ali ate ingye ngye Muala, na mundu woshewoshe yonixonda mbu amumenye.»

Niyo Yesu akebera ya bemitsa bewe bali, nebwirabo bonabene mbu: «Amesha momaxunga ku byomulolako maashanirwe! Anibabwira batahwa bangi na bami bangi bashashaa ixunga kwa binwa ibyo byomuxungako, wetuwe bataxungaa kubyo. Babanexonda iumpfa ku byo muumpfa ibi wetuwe bataumpfa kubyo.»

Mushinga wa Musamariya mubuya

Inyuma kwaho, mwiisa muuma wa Muomba nianabatuka kweereka Yesu. Nianamubutsa mbu: «Mwiyisa, niirende kwebula mbu nibe na buingo bwa biro byoshe?» Yesu nianamuxubitsa mbu: «Bate ko baandikire mwa Muomba? Unereumpfao ute mwa mango ausomao?» Amwiyisa wa Muomba uyo nianamuxubitsa mbu: «Uneretsiyira Ninakuwetu Ongo mwa mutima wawe woshe, na mwa mwete wawe woshe, na mwa nyiki sawe soshe, na mwa bwenge bwawe boshe. Uneretsiyira kandi na muhuwene wawe ngakuno kounaitsiyira wonawene4.» Niyo Yesu amubwira mbu: «Wamexubya kushe! Unerekola nga ko wameneena, nawe wendebaho.»

Wetuwe, amwiisa uyo wa Muomba abaa axonda iibwerekya ku ayaitse. Niyo abutsa Yesu mbu: «Nende ye mulikyetu?» Yesu nianamuxubitsa mbu: «Mundu muuma atengaa i Yerusalemu kwekimira mwa mulungu we Yeriko. Abere akinali mwa nchira nianahendwa na bashamutsi. Abashamutsi abo bamunyaa abyoshe byabaa aweteko, niabanamuhirako mihumbo, baiendera, bamusia ni ali ku lwepfa.

«Niakunapfumbuka mukungu muuma wa hekalu ni akima mwa nchira iyo. Abere axunga kwa mundu uyo yashahumbwa, nianatsuka hamusike kuye, neiendera.

«Mulawi5 muuma naye nianahika. Abere axunga kwa mundu yashahumbwa, nianatsuka hamusike kuye aba neyiendera.

«Mwa ntsindiro, niakunahika Musamariya muuma naye ni ali mu luendo. aMusamariya uyo ninahika ha mundu yashahumbwa ali. Abere amuxunga, nianamupfira bwoncho kutsibu. Nianaipfunda hofi naye, nianamushakirira abihulu kwepfubulirako tifai na mapfuta, abanefukirabyo. Nianamukukumira kwa punda iwe nemutwala mwa nyumba ya reonchitsamo abaeni kwemulanga umo. Bwabere bwakya, nianahulukya tinari ibiri6, nianahato nina anyumba aba nemubwira mbu: ‹Langa amundu uyu. Na sindi tinari seukaongerera kwemulanga, nendekupfuhato nafuluka.›»

Niyo Yesu abutsa amwiisa wa Muomba mbu: «Mwa bandu bashatu aba, inde yauxunga ku yabaa mulikyabo amundu uyo yarahumbwaa na bashamutsi?» Na mwiisa uyo wa Muomba uyo nianaxubya mbu: «Yamupfiraa abwoncho.» Niyo Yesu amubwira mbu: «Enda, nawe unerekola utyo.»

Yesu atangula Marita ne Mariya

Mwa mango Yesu na bemitsa bewe babere bakinali mwa luendo, niabanaingira mu mutsi muuma. Mukatsi muuma mbu ye Marita, nianamukokera mwa nyumba iwe. Marita uyo abaa na mwali wabo yalukwa mbu ye Mariya. Mariya uyo nianaikala hamusike wa bishando bya Ninakuwetu ni ahulikya akinwa kiwe. Wetuwe Marita, iye abaa ni ahekeranya amirimo ya mwa nyumba. Nianahikira Yesu, amubutsa mbu: «Ninakuwetu, Arenisiira amulimo wo mwali wetu mulere anisiirire litalikubwiraki? Umubwire ahike aniasikye.»

Ninakuwetu nianamuxubitsa mbu: «Eh Marita! Auhekeranya neitamya na mirimo mingi. Wetuwe, kindu kiumaho kibuya kyo kirengitse abyoshe. Ne Mariya, iye, ameixowa kindu kyo kikwirire kutsibu, nekyo atibanyawekyo.»

Source notes (6)
  1. Footnote Hali bindi bitabo byo biahwire bandu makumi alinda.
  2. Footnote Soma Luka 9:5.
  3. Footnote Soma Ndangiro 19:24-28.
  4. Footnote Soma Muubuko 6:5; Balawi 19:18.
  5. Footnote Mulawi: aBalawi babaa bandu ba lubuto lwa Israeli bo babaa banaasikya shebakungu kwa mulimo wa hekalu ra Ongo. Soma Muancho 3:1-13.
  6. Footnote Tinari ibiri: sabaa faranga sepfuha mukotsi mushahara wa mibitsi ibiri.

Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.