Hunde Nouveau Testament
Yohana 9
Yesu alamya akihumahumi
Yesu abere ali yatsuka mwa nchira umo, nianaxungamo mundu yabutwaa ni kihumahumi. Abemitsa ba Yesu niabanamubutsa mbu: «Mwiyisa, kubwishi bwaki amundu uyu abutwaa ni kihumahumi? Mbeni ni kubwishi bwa ntsambi iwe yewene neri ya babuti bewe?» Yesu nianaxubya mbu: «Amundu uyu atabutwaa ni kihumahumi mbu kubwishi bwa ntsambi iwe, neri ya babuti bewe. Wetuwe abutwaa ni kihumahumi kwebula mbu amikolere ya Ongo ixungwe mwiye. Tulirene ikola amirimo yola anilikaa bukinatsene, kubwishi akiro akiwicha kyo mundu atangakocha ikolamo. Mwa mango nikinali kwa kihuo, ngye kyaka kya kihuo.» Yesu abere ameotola ineena abinwa ibyo, nianachira hashi, niananyuka mwa mate na lutaka mo kakyondo, nianahakako kwa mesha ma kihumahumi, nemubwira mbu: «Enda yaukarabe mwa busu kwa kishima kye Silowamu», Silowamu rebula mbu: Yamelikwa Niyo akihumahumi ikyo kyaya ikaraba mwa busu, niakinafuluka ni akilola! Abahuwene bewe na bobabaa bahanga bemuxunga ali ahemeretsa, niabanabula mbu: «Mbeni ate amundu uyu yabaa anaikala hashi ni ahemeretsa?» Bauma berebula mbu: «Naki, iye.» Na bandi mbu: «Ihi, mundu yamushushire.» Wetuwe yenawene niananeena mbu: «Ngye iye.» Niyo bamubutsa mbu: «Amesha mawe malamibwaa mate?» Nianaxubitsabo mbu: «Amundu yo alukwa mbu ye Yesu anyukaa ka kyondo ahakireko kwa mesha mani, niananibwira mbu yanikarabe mwa busu kwa kishima kye Silowamu. Nani nianinaya ikaraba. Nabere mbwanifuluka ni nihara anilola.» Nabo niabanamubutsa kandi mbu: «Amundu uyo ali hai?»
aBafarisayo balolota akihumahumi
Akihumahumi kyokyalamibwaa niabanatwalakyo kwa Bafarisayo. Na lwire lo Yesu anyukaamo alutaka mu mate, nelamya amundu uyo lwabaa lwire lwa Sabato. Kubwishi bwekyo, aBafarisayo nabo niabanabutsa amundu uyo nga alolaa ate. Naye nianaxubya mbu: «Mundu muuma anihakaa ka kyondo kwa mesha. Nayire karaba. Tsene anilola.» Bafarisayo bauma babula mbu: «Amundu yakolaa ikyo atatengire ira mwa Ongo kubwishi atatsimbire kweteeko ra lwire lwa Sabato.» Wetuwe na bandi niabanaxubya mbu: «Mundu wa ntsambi angakochate ikola kalolero kali ngakuno aka?» Niakunapfumbuka buhaka bweababo bikanga bibiri. aBafarisayo niabanabutsa akihumahumi kandi mbu: «Nawe aubula ute kuluenda amundu yo yakulamyaa amesha?» Nianaxubya mbu: «Amundu uyo mutahwa.» Wetuwe abakulukulu ba Bayahuti babaa batabaxonda iimira kwabaa kihumahumi na ku tsene ahara alola. Ikyo kituma babirangira ababuti bewe nebutsabo mbu: «Mbeni amundu uyu ye mwana wenyu yomubula mbu abutwaa ni kihumahumi? Tsene kiki kyokituma alola?» Ababuti bewe niabanaxubyitsabo mbu: «Itwe twichi ku uyu mwana wetu na kwabutwaa ni kihumahumi. Wetuwe tsene tutechi kyokituma alola, na yamulamyaa amesha tutamwichi. Ahara mundu atsene. Mumubutse yenawene, naye akabaxubitsa.» Ababuti bewe baneenaa batyo kubwishi ni abaubaha abakulukulu ba Bayahuti. Abakulukulu abo babaa ni bameikiritsanya ku amundu yakabula mbu Yesu ye Kirisitu, ni ahentsibwa mwa sinakoki. Ikyo kyokyatumaa ababuti ba mundu uyo baneena mbu: «Ahara mundu atsene, mumubutse!» Niyo abakulukulu ba Bayahuti babirangira kandi ngendo ya kabiri amundu yabaa kihumahumi nemubwira mbu: «Ha Ongo yo ngulu! Itwe twichi ku uyo mundu wa ntsambi.» Iye nianaxubya mbu: «Ali angaba mundu wa ntsambi, ingye nitechi. Ninechi kinwa kiumaho kwingye nabaa kihumahumi, na tsene anilola.» Niabanamubutsa kandi mbu: «Iye akukoleraaki? Amesha mawe alamyaao ate?» Naye nianaxubya mbu: «Nameotola ibabwira, wetuwe mutamuxonda iumpfa. Kubwishi bwaki amuxonda mbu nibabwire kandi? Nemwe amuxondeba bemitsa bewe?» Niabanamukamba mbu: «Iwe we mwimitsa uwe! Itwe tuli bemitsa ba Musa. Twichi ku Ongo aneenaa ne Musa. Wetuwe ha mundu uyu atenga, tutechiho.» Naye nianaxubitsabo mbu: «Lola ku kinwa kingana kyeshishatsa, mutechi yatenga naho amelamya amesha mani! Twichi ku Ongo atahulikya mahemo ma bandu ba ntsambi. Wetuwe anahulikya abandu bobamumpfire xoni, nekola ngakuno kwaxonda. Ihuluka mira, tutatangire twaumpfa hobaneena mbu hali mundu yabutwaa ni kihumahumi yalamibwaa amesha. Ali amundu uyo atatengire ira mwa Ongo, nge atakochitse ikola ikyo.» Niabanamuxubyitsa mbu: «Iwe uli mundu wa ntsambi kushekushe ihuluka abubutwa bwawe! Auxonda ituiyisa?» Niabanamuhentsa mwa sinakoki.
Yabaa kihumahumi aimirira Yesu
Yesu nianaumpfao ku yabaa kihumahumi amehentsibwa mwa sinakoki. Yesu abere akorana naye, nianamubutsa mbu: «Uimirire Muala wa Mundu?» Amundu uyo nianamuxubitsa mbu «Ninakuwetu, unibwire Muala wa Mundu yende nge namwimirira.» Yesu nianamubwira mbu: «Iwe wameotola imulolako, na kandi iye yashambala nawe.» Niyo amundu uyo aneena mbu: «Ninakuwetu, niimirire.» Naye nianaimanikira Yesu. Inyuma kwaho, Yesu niananeena mbu: «Namewicha kwa kihuo kwecha lubancha, kwebula mbu abihumahumi bilole, na bobatsene bahume.» Bafarisayo bauma bobabaa kuuma naye babere baumpfa abinwa ibyo, niabanamubutsa mbu: «Mbeni aubula mbu itwe tuli bihumahumi?» Yesu nianaxubyitsabo mbu: «Muli mungabere bihumahumi, nge mutali na ntsambi. Wetuwe kubwishi amuixunga ku amulola, mukinali mwa ntsambi.»
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.