Hunde Nouveau Testament
Yohana 8
Yesu na mukatsi musingitsi
Yesu ninaya kwa kitwa kye Miseituni. Bwakya mwelutumbi, nianafuluka mwa hekalu, abandu boshe niabanamuhikira. Nianaikala, aba netangira iiyisabo. Niyo abeyisa ba Muomba kuuma na Bafarisayo baleta mwa mbere siwe mo mukatsi muuma yashatsimbwa mu lusingi. Niabanamuhira mwa kati ka bandu boshe, nebwira Yesu mbu: «Mwiyisa, amukatsi uyu ametsimbwa mu lusingi. Kwekulikira aMuomba, Musa atuhaa rubu lwewita bakatsi bali ngakunoyu mu mabale. Nawe, aubula ute?» Ibo bamubutsaa batyo kwemutea kinwa, kwebula mbu baate kinwa kyemusongera. Wetuwe Yesu nianaindama. Nianatangira iandika kwa lutaka mu mwolota. Nabo babere bali yobaiminga imubutsa, Yesu nianaindamuka nebwirabo mbu: «Amundu yatatsakola ntsambi mwimwe, abe yomubere yamukabula ibale.» Nianaindama kandi nexuba iandika kwa lutaka. Babere baumpfa abinwa ibyo, itangira kwa bangumwa, aboshe niabanatengaho muumamuuma. Yesu nianashiba yeweneho kuuma na mukatsi uyo. Amukatsi ni aimene mwa mbere sa Yesu. Yesu nianaindamuka, nianabutsa amukatsi uyo mbu: «Abandu abo bali hai boshabakusongera? Hatakiri kiro na muuma wekuchira lubancha?» Amukatsi uyo nianamuxubitsa mbu: «Ninakuwetu, kiro na muuma.» Kubatyo Yesu nianamubwira mbu: «Nani nitanikuchira lubancha. Iendere, wetuwe utahira ukexuba ikola ntsambi.»
Yesu kyo kyaka kya kwa kihuo
Yesu nianabwira amubuanano wa bandu kandi mbu: «Ingye niri kyaka kya kwa kihuo. Ula yakanikulikira atendeenda mu mutsimya kiro na hake, wetuwe akendeba na kyaka kya buingo.» Niyo aBafarisayo bamubwira mbu: «Abinwa byouneena bite bya kuli, kubwishi aupfula amwatsi waweho wenawene.» Yesu nianaxubyitsabo mbu: «Nakiro mbu anipfula amwatsi wani ngyenawene, amwatsi wani wa kuli, kubwishi nichi honitenga na honiya. Wetuwe imwe mutechi honatengaa neri honiya. Imwe amucha lubancha kwekulikira amiyanikire ya bandu, wetuwe ingye nitanichira mundu woshewoshe yo lubancha.» Wetuwe nakiro mbu ningachire lubancha, alubancha lwani lungabere lwa kuli, kubwishi nitanicha lubancha ngyenawene, wetuwe Tata yanilikaa ali kuuma nani. Mwa Muomba wenyu muandikirwe kwa kinwa kyamepfulwa na bandu babiri ni kya kuli. Anipfula amwatsi wani ngyenawene ne Tata yanilikaa naye apfula amwatsi wani. Niyo aBafarisayo babutsa Yesu mbu: «Ixo ali hayi?» Yesu nianaxubya mbu: «Mutanichi anabe ne Tata mutamwichi. Muli munganimenyire, nge mwichi ne Tata.» Yesu aneenaa abinwa ibyo mwa mango abaa aiiyisa mwa hekalu, ha sanduku ya mitulo yabaa iri. Hatabaa mundu yamutsimbaa kubwishi akashangi kewe ni katatsakaeraho.
Mutangamenya yoniya
Yesu nianabwirabo kandi mbu: «Ingye aniiendera, nemwe mukanixonda, wetuwe mukapfa kubwishi bwa santsambi senyu. Mutangakocha ihika yoniya.» Abakulukulu ba Bayahuti niabanabutsabutsanya mbu: «Iye abula ku tutangakocha ihika haya. Mbeni axonda iikonola?» Yesu nianaxubitsabo mbu: «Imwe muli ba kwa kihuo, wetuwe ingye nitali wa kwa kihuo kino. Ikyo kyokituma nibabwira kwimwe mukapfa kubwishi bwa santsambi senyu. Kureba mutaimirire ‹kwingye niriho›, mwa kuli ni mukapfa kubwishi bwa santsambi senyu.» Niabanamubutsa mbu: «Iwe wende?» Yesu nianaxubyitsabo mbu: «Ingye niri yonababwiraa ku niri ihuluka mwa ndangiro. Niwete binwa bingi byebabwira na byebachira lubancha kuluenda imwe. Wetuwe yanilikaa wa kuli, nani anibwira abandu ba kwa kihuo abinwa byonahulikyaa ira mwe.» Batamenya kwabaa asimola kuluenda Ishe. Yesu nianabwirabo kandi mbu: «Mukendeba mwamehangika Muala wa Mundu ku musalaba, niyo mwakengula kwingye Niriho. Mukendekengula kandi ku nitanikola kinwa kyoshekyoshe mwa maala mani, Wetuwe anineenaho byo Tata aniiyisaa. Ula yanilikaa ali kuuma nani, atanisiyire ngyenawene, kubwishi abiro byoshe ninerekola byatsiyire.» Yesu abere akinali aneena, bandu bangi bamwimirira.
Aluliko lwa kuli
Yesu nianabwira aBayahuti bobaimiriraa mbu: «Ni mungaba muketsimba kwa meyiso mani, imwe ni muli bemitsa bani ba kuli. Ni mukamenya akuli, na kuli ni ikabahira mu luliko.» Niabanamuxubitsa mbu: «Itwe tuli ba lubuto lwa Iburahimu. Tutatsatwaba bapfubulwa ba mundu woshewoshe. Ungakocha uteno itubwira ku tukaba mu luliko?» Yesu nianaxubyitsabo mbu: «Anibabwira mwa kuli, kintsi mundu yakola antsambi uyo ni mupfubulwa wa ntsambi. Amupfubulwa ataxungwa abiro byoshe nga mwicha mwa kipfunga, wetuwe amwana anaxungwa abiro byoshe nga mwicha mwa kipfunga. Muala ni angaba akebahira mu luliko, ni mukaba mu luliko lwa kuli. Nichi ku muli ba lubuto lwa Iburahimu. Wetuwe imwe amuxonda iniita, kubwishi amutinda iikiritsa ameyiso mani. Ingye anineena byo nalolaako ira mwa Tata, wetuwe imwe amukola byo mwaumpfaa itenga ira mwa ixo.» Niabanamuxubitsa mbu: «Iburahimu yo Tata.» Yesu nianaxubitsabo mbu: «Muli mungabere bana ba Iburahimu, nge mungakolire abyoshe byo Iburahimu akolaa. Wetuwe tsene amuxonda iniita naho namebabwira akuli yonaumpfaa itenga ira mwa Ongo. Iburahimu atakolaatyo. Imwe amukola amicho yo ixo anakola.» Niabanamuxubyitsa mbu: «Itwe tutali bana babutirwe mu lusingi. Tututsa Tata muumaho, naye ye Ongo.» Yesu nianaxubitsabo mbu: «Ongo ali angabere ye Ixo, munganitsiyire, kureba nametenga ira mwa Ongo na tsene niri hano. Nitahikaa mu maala mani ngyenawene, wetuwe iye yanilikaa. Abinwa byonibabwira mutamuumpfabyo kubwishi bwaki? Ni kubwishi mutamuxonda iumpfa abinwa byani. Ixo ye Shitani, nemwe amuxonda ikola kyo ixo ashashire. Iye mwiti ihuluka mira. Atatsiyira akuli, kubwishi akuli itaba mwiye. Shitani ananeena bubesi, kubwishi wo mucho uwe, kureba yewene mubesi, na kandi ye ishe wa bubesi. Kubwishi nani anineena kuli, mutamuimirira abinwa byani. Inde mwimwe yangabereretsa ku namekola ntsambi? Na niri namebabwira kuli, niyo mutamuniimirira kuki? aMundu wa Ongo anahulikya abinwa bya Ongo. Imwe mutamuhulikya kubwishi mute bandu ba Ongo.»
Yesu ye mubere ilengya Iburahimu
aBayahuti niabanaxubyitsa Yesu mbu: «Mbeni itwe tutatuneena kuli, tukebula mbu iwe uli Musamariya na ku uli na kixwatsi?» Yesu nianaxubitsabo mbu: «Ingye nitali na kixwatsi, wetuwe nipfire Tata yo xoni. Imwe momuninenire. Ingye nitaniixondera ngulu ngyenawene, wetuwe hali muuma yanixonderayo, naye yemuchi wa lubancha. Mwa kuli, anibabwira ku amundu ni angaba aketsimba kwa binwa byani, ni atendepfa kiro na hake.» Niyo aBayahuti bamubutsa mbu: «Tsene twamemenya ku uli na kixwatsi! Iburahimu apfire, na batahwa nabo bapfire, nawe ni wabula mbu: ‹Amundu aketsimba kwa binwa byawe, ni atendepfa kiro hake.› Iwe we mukulukulu ku tata Iburahimu? Iburahimu apfire, na batahwa nabo bapfire. Tsene iwe auixunga ku wende?» Yesu nianaxubya mbu: «Niri ningaixondera ngulu yani ngyenawene, angulu iyo ni italaitse. Tata, yomunaihalilitsira ku ye Ongo wenyu, yonisingya. Imwe mutechi Ongo, wetuwe ingye nimwichi. Niri ningabwire ku nitamwichi, nge ningabere mubesi ngakuno imwe. Wetuwe nimwichi, nibere netsimba kwa kinwa kiwe. Ixo Iburahimu, ashaalukaa kutsibu kwexunga alwire lwa arewicha rani. Abere axunga kwa lwire ulo, nianamoa kutsibu.» Niyo aBayahuti bamubwira mbu: «Iwe utatsawaba na bwixuke bwa myaka makumi atano, tsene ungabula ute ku waxungaa ku Iburahimu?» Yesu nianaxubitsabo mbu: «Mwa kuli, anibabwira ku buxondotsi Iburahimu abutwe, ingye nabaa ni niriho.» Kubwishi bwekyo, niabanatola mabale kwemukabulao. Wetuwe Yesu nianaibisha, aba netenga mwa hekalu.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.