Hunde Nouveau Testament
Yohana 7
Baala babo Yesu batinda imwimirira
Inyuma ya binwa ibyo, Yesu nianatsuka mwa kyango kye Ngalilaya. Atatsiyiraa itsuka mwa kyango kye Yuteya, kubwishi abakulukulu ba Bayahuti babaa abaxonda imwita. Mo kianiro umo, lwire lukulu luuma lwa Bayahuti lolulukwa mbu Mitanda1 ni luli hofi. Banyakyabo Yesu niabanamubwira mbu: «Tenga hano, enda i Yuteya nge abemitsa bawe balola kwa bishishatsa byoukola. Ali auxonda mbu umenyibwe, ni utikole kindu mu bubixo. Kubwishi uli aukola binwa biri ngebyo, ni waibwerekya mwa mbere sa bandu boshe.» Banabe na baala babo, nabo batamwimirira. Yesu nianabwirabo mbu: «Akashangi katatsakaeraho kwingye, wetuwe kwimwe atushangi toshe tukwirire. Abandu ba kwa kihuo, batangababaa. Wetuwe ingye, abanibaa kubwishi anipfula amwtsi mbu amikolere yabo mibi. Imwe muye mwa linye. Ingye nitatsanaenda neki mwa linye iri, kubwishi akashangi kani katatsakaeraho.» Abere amebwirabo abinwa ibyo, nianashiba i Ngalilaya.
Yesu aya mwa linye ra mitanda
Mwa mango baala babo Yesu bayaa mwa linye, Yesu naye nianayayo. Wetuwe ayaayo mu bubixo butsira iibwerekya kyenene. Abakulukulu ba Bayahuti babaa abamuxonda mwa linye nebutsa mbu: «Mbeni amundu uyo ali hai?» Mwa kati ka bandu abo mwabaa muli miririkano mingi kuluenda iye. Bauma mbu: «Iye mundu mubuya.» Na bandi mbu: «Ihi, ate batyo, atinga abandu.» Wetuwe hatali mundu woshewoshe yaneenaa naye kyenene, kubwishi aboshe ni baubahire abakulukulu ba Bayahuti. Alinye rabere rahara liri mwa katikati, Yesu nianaingira mwa hekalu netangira iyisa abandu. aBayahuti niabanashishala, neneena mbu: «Amundu uyu, amebonekya ate abwenge buli ngobu, naye atasomire?» Yesu nianaxubyitsabo mbu: «Ameyiso moniiyisa mate mani, wetuwe ma Ongo yanilikaa. Amundu yangashasha ikola areshasha ra Ongo, ni akamenya kwa meyiso mani amatenga ira mwa Ongo, neri aniiyisao mwetsina rani. Amundu yaneena mwa maala mewe yewene, ni axonda angulu yiwe yewene. Wetuwe yaxonda angulu ya mundu yamulikaa, uyo nianeena akuli, na mwiye ni mutali kiro na bubi. Mbeni Musa atabahaa Muomba? Wetuwe hate kiro na muuma mwimwe yatsimbire kuo. Amuxonda inita kubwishi bwaki?» Amubuanano wa bandu nianamuxubitsa mbu: «Ulimo kixwatsi! Inde yaxonda ikwita?» Yesu nianaxubyitsabo mbu: «Nakolaa kashingishiro kauma mwa lwire lwa Sabato, na mweboshe mushishala.» Musa yabateekaa imwe mbu muneremonia abana benyu ba butsana. Mwa kuli aboxokulitsa bobatangiraa andungo iyo, Musa ni atatsabutwa. Imwe muli na ndungo yaremonia abana benyu ba butsana na mu lwire lwa Sabato2 Muli mungamonia abana ba butsana mu lwire lwa Sabato kwebula mbu aMuomba wa Musa atachibwaamo, kuki amunitsibukira namelamya mundu mu lwire lwa Sabato? Muterechira amundu yo lubancha nga komuxungaho, wetuwe munerecha lubancha lutunganene3.
Yesu ye Kirisitu
Niyo becha i Yerusalemu bauma baneena mbu: «Mbeni amundu uyu ate yobaxonda iita? Wetuwe, lola kwaneena kyenene, batabamubwira kiro na kinwa! Kuti na bakulukulu nabo, bamemenya mwa kuli kwiye ye Kirisitu. Wetuwe twichi ha mundu uyu atenga. Hatali mundu yakendemenya alwire lo Kirisitu endehikamo.» Yesu abere ali yaiyisa mwa hekalu nianalaka mbu: «Mwa kuli munichi? Mwichi honatengaa? Nitahikire mwa maala mani ngyenawene, wetuwe yanilikaa mundu wa kuli. Imwe mutanichi. Wetuwe ingye nimwichi, kubwishi anitenga yali, naye yanilikaa.» Kubwishi bwekyo, niabanaxonda nchira yemutsimba. Wetuwe hataba mundu wemuatako, kubwishi akashangi kewe kabaa ni katatsakaeraho. Wetuwe bandu bangi mwa mubuanano niabanamwimirira, neneena mbu: «Kirisitu endeba ahika, akendebwerekya tushingishiro tulengitse twa mundu uyu?»
aBafarisayo balika balangi betsimba Yesu
aBafarisayo niabanaumpfa abinwa ibyo, byabandu babaa abaneena kuluenda Yesu. BoShebakungu na Bafarisayo niabanalika abalangi babo kweya imumina. Yesu niananeena mbu: «Nikinali kuuma nemwe ku biro bike, nenyuma kwaho, nikafuluka ira mwa yanilikaa. Mukanixonda, wetuwe mutendenixunga, kubwishi mutangahika honikendeba.» aBayahuti niabanabutsabutsanya bonabene ku bonabene mbu: «Hayi ha mundu uyu aya, kwebula mbu tutamuxungaa? Akaya ha Bayahuti bali bobashanchwaa mwa Bukiriki neiyisa aBakiriki? Akinwa iki kibwire kite kyaneenaa mbu: ‹Mukendenixonda, wetuwe mutendenixunga na honikendeba mutangahikaho.›»
Amechi momaleta abuingo
Alwire lwarekinda alinye ya lwire lukulu lwa mitanda, lwabaa lunene. Yesu nianaimana neneena mu mulenge mule mbu: «Amundu akepfa nyota, ahike yoniri, axome. Nga ko aMaandiko Makomire maneenire mbu: ‹Yaniimirire, xoko sa mechi ma buingo sikaxoxoboka itenga mwiye4.›» Aneenaa atyo kuluenda aMutima Akomire yakendeangirirwa na bobamwimirire. Mo kashangi umo, aMutima Akomire abaa atatsalikwa, kubwishi Yesu abaa atatsaingira mwa ngulu yiwe.
Abandu balikalikana kuluenda Yesu
Bandu bauma mwa mubuanano babere baumpfa abinwa ibyo, niabananeena mbu: «Mwa kuli amundu uyu mutahwa abaa alirene iwicha.» Na bandi mbu: «Uyu ye Kirisitu.» Na bandi mbu: « Kirisitu atangakocha itengera i Ngalilaya! aMaandiko Makomire maneenire mbu Kirisitu endehulukira mwa luanda lwa Ndauti, mwa mutsi we Betelehemu, mwa mutsi wo Ndauti aikalaamo.»5 Niyo hapfumbuka kahinchangano hakati ka bandu kuluenda Yesu. Bauma mubobabaa abaxonda imumina, wetuwe hataba mundu wemutsimba.
Boshebakungu bakulu batinda Yesu
Niyo abalangi bafuluka ha boShebakungu bali kuuma na Bafarisayo. BoShebakungungu bakulu niabanabutsa abalangi mbu: «Kubwishi bwaki mutaletire Yesu?» Abalangi niabanaxubya mbu: «Tutatsatwaumpfa mundu aneena ngakuno amundu uyo!» aBafarisayo niabanabutsabo mbu: «Nemwe mwanametingwa? Mbeni hali mukulukulu muuma, neri Mufarisayo muuma yamemwimirira? Wetuwe abandu aba bobatechi aMuomba wa Musa bametukangwa.» Mufarisayo muuma mbu ye Nikotemu, yayaa ira mwa Yesu lubere, abaa ali aho. Niyo abwirabo mbu: «Mbeni aMuomba wetu atuhere rubu lwechira mundu yo lubancha atatsaumpfibwa, neri tutatsatwamenya abinwa biwe?» Niabanamuxubyitsa mbu: «Nawe uli mwicha i Ngalilaya? Soma kushe aMaandiko Makomire, ukaxunga ku i Ngalilaya hatangakocha itenga mutahwa.» Inyuma kwaho kintsi mundu nianafuluka hamwe.
Source notes (5)
- Footnote Mitanda: Lwabaa lwire lukulu lwa mwa Buyahuti lobabaa banakolamo linye ra rexola aMisabibu na Miseituni. Na kandi mo biro umo, mo babaa banahema mbu kwa mwaka wa wicha kuwe mpfula. Mwa mango abalya alinye ra lwire lukulu ulo, babaa banaba mu mitanda yoihimbirwe mu bisani bya miti. Babaa banaira batyo kweubuka kwa boshekulitsa babandaa mwa bweru mo myaka makumi ane.Soma Balawi 23:33.
- Footnote Soma Balawi 12:3; Ndangiro 17:10-13.
- Footnote Soma Balawi 19:15; Isaya 11:4.
- Footnote Soma Esekieli 47:1; Sakariya 14:8.
- Footnote Soma 2Samwere 7:12; Mika 5:1; Matayo 2:5.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.