Hunde Nouveau Testament
Yohana 10
Mushinga wa musumba na sambuli
Yesu niananeena mbu: «Mwa kuli, anibabwira ku amundu yataingire mwa lukyo lwa kihyo kya sambuli, wetuwe yauruka kwa mupfunda neingira kwetsukira handi, uyo ni mwitsi na munyai. Wetuwe yatsuka mwa lukyo, uyo ni musumba wa sambuli. Amutsamu anakingulira asambuli alutsi, nato sinahulikya amulenge uwe. Naye anabirangira asambuli siwe, na kintsi mbuli mwetsina rayo, nehulukyato hambua. Ameotola ihulukya asambuli siwe ito hambua, ni yaxondolerato, nato ni samukulikira kubwishi sichi amulenge uwe. Asambuli ito sitangakulikira mueni, wetuwe ni samushaa kubwishi sitechi amulenge wa mueni.» Yesu abwiraabo amushinga uyo, wetuwe batamenya kyabaa axonda ibwirabo.
Yesu ye musumba mubuya
Niyo Yesu abwirabo kandi mbu: «Mwa kuli, anibabwira kwingye ngye lukyo lwa sambuli. Aboshe bobahikaa buxondotsi kwingye, betsi na banyai, wetuwe asambuli sitaumpfiraabo.» Ingye ngye lukyo. Kintsi yaingira mwa nyumba ya sambuli kwetsuka mwingye ni akaufukala, ni akaingira nehuluka, naye ni akabonekya kyakalya. Amwitsi anawichaho iiba, neita nebihya. Wetuwe ingye namewicha kwebula mbu babe na buingo, buingo bwa mukene. Ingye niri musumba mubuya. Musumba mubuya anahana abuingo buwe kubwishi bwa asambuli siwe. Wetuwe yakolera faranga, mwa kuli uyo ate musumba, na sambuli sitali siwe. Anasiya asambuli neshaa mwa mango axunga ko anyambwe yawicha. Anyambwe ni yahenda asambuli neshanchato. Amundu uyo anairatyo kubwishi akolera faranga. Iye atalaire kwa mbuli. Ingye niri musumba mubuya. Nichi asambuli sani na sambuli sani sinichi. Ingye nichi Tata ngakuno ko Tata naye anichi. Nahana abuingo bwani kubwishi bwa sambuli sani. Nitutsa sindi mbuli sositali sa kihyo kino. Ito nato nilirene iletato. Sikendehulikya amulenge wani, kwikyo hakendeba kihyo kiuma na musumba muuma. Tata ali anitsiyire ni kubwishi ngyenawene ngyenihana abuingo bwani, wetuwe inyuma nikaba nabo kandi. Hatali mundu yanganinyaa abuingo bwani, wetuwe anihanabo ku ishasha rani. Niri na maala marehanabo na maretolabo kandi. Tata yaniteekatyo. aBayahuti niabanalikalikana kandi kubwishi bwa binwa ibyo. Bangi mubo babula mbu: «Ali na kixwatsi! Mwa kuli iye musire. Amumuumpfira kuki?» Bandi bandu babula mbu: «Ibi bitali binwa bya mundu yali na kixwatsi. Mbeni yali na kixwatsi angalamya mesha ma bihumahumi?»
aBayahuti batinda Yesu
Lwire luuma, mwa kianiro kya kibulaka, niakunaba lwire lukulu lwareubuka arechanulwa ra hekalu i Yerusalemu. Yesu abaa ni atamba mwa mbuwa ya hekalu mwa kisusu kyokilukwa mbu: «Kisusu kya Salomo». aBayahuti niabanatsungula ku Yesu nemubwira mbu: «Ukatutsungulangya amitwe ihikira mangoki? Uli we Kirisitu, utibatubwire!» Yesu nianaxubitsabo mbu: «Imwe nameotola ibabwira, wetuwe mutamuimirira. Amirimo yonikola mwa maala ma Tata aipfula amwatsi wani. Wetuwe imwe mutamuimirira kubwishi mutali mbuli sani. Asambuli sani sinahulikya amulenge wani, nichito nato sinichi, nato sinanikulikira. Ingye anihato abuingo bwa biro byoshe, nato sitendehera kiro na hake. Hatali na mundu yakendetengyato mwa minwe yani. Tata yanihaa asambuli iti alengyitse aboshe. Ingye ne Tata tuli mundu muuma.» aBayahuti niabanatola mabale kandi kwemukabulao. Yesu nianabwirabo kandi mbu: «Namebakolera mirimo mingi mibuya mwa maala ma Tata. Uhe mulimo mwiyo watuma muxonda inikabula mabale?» aBayahuti niabanamuxubyitsa mbu: «Tutatuxonda ikukabula mabale kubwishi bwa mirimo mibuya, wetuwe kubwishi aukamba Ongo. Auiyira Ongo, naho ni uli mundu ho!» Yesu nianaxubitsabo mbu: «Kiandikirwe mwa Muomba wenyu ku Ongo ameneena mbu: ‹Imwe muli boongo1.›» Twichi ku aMaandiko Makomire matangakocha ichibwamo. Ongo alukaabo mbu «boongo.» «Kwingye, nalondolwaa ne Ongo nelikwa naye kwa kihuo. Yomuneena muteno kwingye anikamba Ongo kubwishi nabulaa kwingye niri Muala wa Ongo? Niri nitanikola amirimo ya Tata, kunchi mutaniimiriraa, wetuwe niri anikola amirimo ya Ongo, nakiro mbu mutamuniimirira, muharamunaimirirae amirimo iyo, kwebula mbu mukoche imenya neumpfa ku Tata ali mwingye nani mu iye.» Niabanaereka imina Yesu kandi, wetuwe nianaxunukala mubo. Niyo Yesu aya kandi kwa lindi ishirya ra Yorotani, ho Yohana arubikaa bandu bangi mira, nianaba neshibayo. Bandu bangi niabanamuhikira nebula mbu: «Yohana atatangire abwerekya kiro na kalolero kauma, wetuwe abinwa byoshe byaneenaa kuluenda amundu uyu byabaa bya kuli.» Neyo bandu bangi baimirira Yesu.
Source notes (1)
- Footnote Boongo Soma Saburi 82:6.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.