Hunde Nouveau Testament
Yohana 4
Yesu asimola na mukatsi Musamariya
Yesu nianakengula kwa Bafarisayo bahara na mwatsi kwiye arubika bemitsa bangi ilengya Yohana. Mwa kuli, Yesu yewene atatangire arubika mundu, wetuwe abemitsa bewe bobabaa banarubika. Yesu nianatenga i Yuteya nianafuluka i Ngalilaya. Kwehika iyo, ni lilirene itsuka mwa kyango kye Samariya Nianahika hofi na mutsi muuma we Samariya walukwa mbu Sikari, wabaa hofi na rexwa ro Yakobo ahaa muala Yosefu1. Aho hohabaa aretehero ra Yakobo. Kubwishi Yesu abaa ni ametama mwa luendo, nianaikala kwa musike waro mu saa asishembashemba saa ndatu sa kati ka mwishi. Niyo mukatsi muuma Musamariya awicha iteha mechi. Yesu nianamubwira mbu: «Nihe mechi mexoma.» Mo mango umo abemitsa bewe ni bameya iula bilyo kwa mutsi. Niyo amukatsi Musamariya uyo abwira Yesu mbu: «Iwe uli Muyahuti, nani niri mukatsi Musamariya, ungakocha ute inihema mechi mexoma?» aBayahuti babaa bataumpfiritsanya na Basamariya. Yesu nianamuxuxubyitsa mbu: «Uli ungamenyire kyo Ongo anahana, nende yakubwira mbu: ‹Nihe mechi mexoma, iwe nge ungamuhemire mechi, naye nge angakuhere mechi momaleta buingo.›» Amukatsi uyo nianamuxubyitsa mbu: «Ninakuwetu, utawete ku kipfuma kyetehamo mechi, nao mali mu kiribu kire kutsibu. Wametengya amechi ma buingo hai? Tatakulitsa wetu Yakobo yatuhaa axoko iyi, anabe iye kuuma na baala, na bipfuanwa biwe byaxomaa kwa mechi aya. Mbeni auanikira ku uli mukulukulu ilengya Yakobo?» Yesu nianamuxubyitsa mbu: «Kintsi mundu yaxoma kwa mechi aya ni akapfa nyota kandi. Wetuwe amundu yakendexoma kwa mechi monikendemuha ingye, atikiendepfa nyota kiro na hake. Amechi monikendemuha, mendeba mwiye nga xoko yoixoxobokamo mechi ma buingo bwa biro byoshe.» Amukatsi uyo nianamubwira mbu: «Ninakuwetu, unihe kwa mechi ayo, kwebula mbu nitakipfaa nyota kandi, neri nitakixubaa iwicha iteha mechi hano.» Yesu nianamubwira mbu: «Enda, yobirangire mulume wawe, ube nemuleta hano.» Amukatsi nianamuxubyitsa mbu: «Nitawete ku mulume.» Yesu nianamubwira mbu: «Auneena kuli ku utawete ku mulume, kubwishi wameotola ihikyibwa na balume batano, na mulume youli naye tsene atali wawe. Kwikyo auneena kuli.» Niyo amukatsi uyo amuxubyitsa mbu: «Ninakuwetu, anixunga kwiwe uli mutahwa.» Abotatakulitsa baimanikiraa Ongo kwa kitwa uku, wetuwe imwe mo Bayahuti munerebula ku i Yerusalemu hohalirene iimanikira Ongo. Yesu nianamubwira mbu: «Niimirire, akianiro akiwicha, kyomutendeimanikiramo Tata kwa kitwa uku, neri i Yerusalemu. Imwe, mwe Basamariya munaimanikira kyomutechi, itwe tunaimanikira kyotwichi, kubwishi abuufulo abutenga kwa Bayahuti. Wetuwe akuwicha kianiro, nakyo kyahara kiriho, bobanaimanikira Ongo mwa kuli bendeimanikira Tata mu mutima na mu kuli, kubwishi Tata axonda bandu bobamuimanikira batyo. Ongo Mutima, na bobamuimanikira balirene ni bamuimanikira mu mutima na mu kuli.» Amukatsi nianamubwira mbu: «Nichi ku Masiya yalukwa mbu ye Kirisitu endewicha. Na mwa mango endewicha endetuiyisa abinwa byoshe.» Yesu nianamuxubitsa mbu: «Ingye, ngye nineena nawe, ngye iye.» Mo kashangi umoho, abemitsa ba Yesu niabanafuluka, niabanashishala kwemuxunga ali asimola na mukatsi. Wetuwe hataba kiro na muuma mubo yabutsa mbu: «Auxondaki?» Neri mbu: «Ausimola naye kubwishi bwaki?» Niyo amukatsi uyo asiya akibindi kiwe kya mechi aho nefuluka kwa mutsi kwebwira abandu mbu: «Muwiche mulole kwa mundu yamenibwira abinwa byani byoshe byonakolaa. Mbeni amundu uyu, atangaba ni ye Kirisitu?» Abandu niabanatenga mwa mutsi baendera Yesu. Mo kashangi umo, abemitsa ba Yesu niabanaitondoola kuye mbu: «Mwiyisa, tanga walya bilyo.» Wetuwe nianaxubitsabo mbu: «Niwete ku bilyo byomutechi.» Abemitsa bewe niabanatangira ibutsabutsanya mbu: «Mbeni hali mundu yamemuletera bilyo?» Yesu nianabwirabo mbu: «Abilyo byani ni ikola areshasha ra yanilikaa neotola amulimo wanihaa. Mbeni imwe mute bahanga bebula mbu: ‹Hashiba myetsi ine ni abaxola?› Wetuwe ingye anibabwira mbu musindere kushe amaxwa, amyaka yameera, nayo ailindira ixolwa! Amuxotsi ameotola ihabwa aluhembo luwe, ni atuma amyaka kubwishi bwa buingo bwa biro byoshe, kwebula mbu yaxoleka, na yaxola bamoe kuuma. Kureba akinwa kya muani uyu kiri kuli mbu: ‹Mundu muuma anaxoleka, na undi ni axola.› Ingye nabalikaa mbu muxole kyomutanubiraa, bauma banubaa, nemwe mwameingira mu kya bandi banubiraa.» Basamariya bangi ba kwa mutsi uyo niabanaimirira Yesu kubwishi bwa binwa bya mukatsi uyo apfulaa mbu: «Amenibwira abyoshe byonakolaa.» aBasamariya babere bahikira Yesu, niabanaitondoola kuye mbu aikale kuuma nabo, naye nianaikala iyo biro bibiri. Na bandi bandu bangi baimirira kubwishi bwa binwa biwe, nabo niabanabwira amukatsi uyo mbu: «Tsene twameimirira, kute kubwishi bwa binwa byowatubwiraaho, wetuwe kubwishi twenabene twameiumpfira, na kandi twichi ku ye Muufutsi wa kihuo.»
Yesu alamya mwana wa mukulukulu
(Mat 8:5-13; Luk 7:1-10)
Kwabere kwametsuka biro bibiri, Yesu nianatenga iyo, nianaenda i Ngalilaya. Yesu abaa ni amepfulao ku amutahwa atapfibwa xoni mwa kihuo kiwe yewene. Wetuwe abere ahika i Ngalilaya, abandu ba kyango ikyo niabanamukokera kushe, kubwishi ibo nabo ni babaa bali i Yerusalemu mwa lwire lukulu lwa Pasaka, baba nexunga kwa binwa byoshe byakolaa iyo. Niyo Yesu axuba i Kana, mwa kyango kye Ngalilaya, hahingitsaa amechi kweba tifai. Iyo habaa hali mukulukulu muuma mukotsi wa mwami, yabaa alwetse muala mwa mulungu we Kaperenaumu. Abere aumpfao ku Yesu amehika i Ngalilaya ni atenga i Yuteya, amukulukulu uyo, nianamuendera, nemuhema mbu aende i Kaperenaumu ilamya muala yabaa ali ku lwepfa. Yesu nianamubwira mbu: «Imwe mutaxungire ku tulolero na ku bishishatsa, ni mutiimirire kiro na hake.» Amukulukulu uyo nianamuxubitsa mbu: «Ninakuwetu anikuhema uwiche mwa mwani buxondotsi amwana wani ni atatsapfa.» Yesu nianamubwira mbu: «Xuba ira mwawe, muala wawe aliho.» Amukulukulu uyo nianaimirira akinwa kyo Yesu amebula, nianaenda. Abere ali yafuluka, bapfuku bewe bauma niabanawicha ikorana naye nemubwira kwa mwana uwe mukambwe. Nianabutsabo nga mwana shatangira iiumpfa kushe mu kashangiki. Nabo niabanamuxubyitsa mbu: «Ashishira yamulikaa mweolo, mu saa asishembashemba saa sirinda sa mwishi.» Ishe wa mwana uyo nianakengula ku mwa saa iyeyoho mo Yesu amubwiraa ku muala mukambwe. Iye na kipfunga kiwe kyoshe niabanaimirira Yesu. Ako ko kalolero ka kabiri ko Yesu akolaa i Ngalilaya ni atenga i Yuteya.
Source notes (1)
- Footnote Soma Ndangiro 33:19; Yoshua 24:32.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.