Skip to content
BibleKenya

Hunde Nouveau Testament

Yohana 5

Yesu alamya mundu wa makonongola

Inyuma wa binwa ibyo, Yesu nianaya mwa mulungu we Yerusalemu, mu lwire lukulu lwa Bayahuti. Na mwa mulungu we Yerusalemu, hofi na lukyo lwa sambuli, habaa hali kishima ni kiri na nyukyo itano. Akishima ikyo, ni kinalukwa mwa Kieburaniya mbu: «Betesaita.» Mwa nyukyo umo, mwabaa muonchire bakoni bangi. Mubo, mwabaa bihumahumi, na birema, na bobalwere makonongola. Babaa banerelindira amechi mbu maruburwe. Malaika wa Ninakuwetu abaa muhanga wekima mwa kishima ikyo nerubura amechi. Amukoni mubere yakaingira mwa mechi, ni alama bukoni bwoshebwoshe bwalwere. Aho habaa mundu muuma ni amebanda myaka makumi ashatu na munane ni mukoni. Yesu abere amulolako, nekengula kwameba mukoni wa biro bingi, nianamubutsa mbu: «Auxonda ilamibwa?» Amukoni nianamuxubyitsa mbu: «Ninakuwetu, nitawete ku mundu yanganirubika mwa kishima mwa mango amechi amaruburwa. Na mwa mango anixonda iirubika mwa mechi, undi mundu nianixondolera kweirubikamo.» Yesu nianamubwira mbu: «Batuka, tsimba mundara wawe ube neenda. Mo kashangi umoho, amundu uyo nianalama aba netsimba amundara uwe neiendera.» Alwire ulo lwabaa lwire lwa Sabato. Ikyo kituma aBayahuti babwira amundu yalamibwaa uyo mbu: «Munolwire Sabato, utali na rubu lweheka angyingo1 yawe.» Amundu uyo nianaxubitsabo mbu: «Amundu yashanilamya, yashanibwira mbu: ‹Heka angyingo yawe ube neenda.›» Niyo bamubutsa mbu: «Inde uyo yamekubwira mbu: ‹Heka angyingo yawe ube neenda?›» Wetuwe amundu yalamibwaa uyo abaa ni atakimwichi, kubwishi Yesu abaa ni ameshencheberera mwa mubuanano munene wa bandu bobabaa bali aho. Inyuma kwaho, Yesu nianakorana naye mwa hekalu, nianamubwira mbu: «Utatsene ku wamelama? Tsene, utakyiendekola ntsambi, utangendechehikirwa na kinwa kibi kutsibu.» Amundu uyo nianaya ipfulirao aBayahuti ku Yesu yamemulamya. Ikyo kituma aBayahuti batangira ixonda binwa byesongera Yesu, kubwishi akolaa akinwa ikyo mu lwire lwa Sabato. Wetuwe Yesu nianaxubyitsabo mbu: «Tata anakola mu kintsi kashangi, nani banatyoho.» Akinwa ikyo, kituma abakulukulu ba Bayahuti baxonda nchira yemwita. Kute kubwishi bwa arecha mwa Sabato ho, wetuwe kubwishi abulaa kandi mbu Ongo ye Ishe, kweilinganya ne Ongo.

aMaala ma Muala wa Ongo

Yesu nianabwirabo kandi mbu: «Mwa kuli, anibabwira ku Muala wa Ongo atangakocha ikola kinwa kyoshekyoshe mwishasha liwe yewene. Anerekunekolaho kyaxunga ku kyo Ishe anakola. Kubwishi abyoshe byo Tata anakola, Muala naye ni akolabyo. Kubwishi Tata atsiyire Muala, ni yeremubwerekya byakola yewene. Akenderemubwerekya binwa bingi kutsibu kandi ilengya ibyo, kwebula mbu mukoche ishishala. Kubwishi nga ko Tata anapfukya bandu nehabo buingo, ne Muala, kwonokoho, anaha buingo yo kintsi yashashire. Na kandi, Tata atachira kiro na mundu muuma yo lubancha, wetuwe ameha Muala amaala moshe marecha lubancha, kwebula mbu abandu boshe bapfe Muala yo xoni nga kobanerepfa Tata yo xoni. Ula yatapfire Muala yo xoni, ni atapfire Tata yamulikaa yo xoni. Mwa kuli anibabwira ku ula yahulikya akinwa kyani neimirira yanilikaa, ali na buingo bwa biro byoshe. Iye atendechirwa lubancha, wetuwe ni amekenga alupfu neba na buingo.» «Mwa kuli, anibabwira ku kwendewicha kianiro, nakyo kyahara kiriho, mwa bapfu bendeba bahulikya amulenge wa Muala wa Ongo, na bobakendehulikyao, bakendebaho. Ngakuno ko Tata ali na maala ma rehana abuingo bwa biro byoshe, kwanameha ne Muala amaala marehana abuingo bwa biro byoshe. Ameha ne Muala maala mecha lubancha, kubwishi iye, ye Muala wa Mundu. Mutashishalaa kubwishi bwa binwa ibyo. Kwendehika kianiro, abapfu boshe bobali mwa masinda, bakendeba bahulikya amulenge uwe, netenga mwa masinda mabo. Bobakolaa bibuya bendepfuka neya mwa buingo, wetuwe bobakolaa abibi bendepfuka nechirwa lubancha2.»

Atuliho twa mwatsi wa maala ma Yesu

Nitangakocha ikola kinwa ngyenawene. Ninacha lubancha nga ko Ongo anibwira na lubancha lonamecha ni lwaba lwa butunganane, kubwishi nitanixonda ikola areshasha rani, wetuwe areshasha ra yanilikaa. Ni ningaba nikerepfula amyatsi yani ngyenawene, amyatsi yani iyo ni itangaikiritsibwa ku ya kuli. Wetuwe hali undi mundu yanerepfula amyatsi yani, nani nichi ku amyatsi yapfula kwingye, ni ya kuli. Imwe mwalikaa ndumwa ira mwa Yohana, naye apfulaa mwatsi wali kuli. Mwa kuli ingye, nitanixonda kaliho ka mundu, wetuwe anineena abinwa ibi kwebula mbu muufulwe. Yohana abaa ngakuno itala roliwaka nekoletsa, nemwe, mu kianiro kike mwanashashaaho imoera akyaka kiwe. Wetuwe ingye niri na mwatsi munene kutsibu alengyitse wapfulwaa ne Yohana. Kubwishi amulimo wonikola wo Tata anilikaa ibereretsa, na mulimo wonikola apfula amwatsi wani ku Tata yanilikaa. Ne Tata yanilikaa ameba kaliho ka mwatsi wani. Imwe mutatsamwahulikya amulenge uwe mu kianiro kyoshekyoshe, mutanatsamwaxunga abusu buwe. Akinwa kiwe kitali mwimwe, kubwishi mutaimirire yalikwaa naye. Muiye kushe aMaandiko Makomire, kubwishi munereanikira ku mungabonekya muo abuingo bwa biro byoshe. aMaandiko ayo momapfula amwatsi wani. Naho imwe mutamuxonda iwicha yoniri mbu mube na buingo. Ingye nitanihabwa ngulu yoitenga ku bandu. Wetuwe ingye nibechi imwe mutatsiyire Ongo. Ingye namewicha mwetsina ra Tata, nemwe mutamuxonda inikokera. Wetuwe hali undi yawicha mwetsina liwe yewene, imwe ni mukamukokera. Ni mungaimirire mute, imwe, momuisingya mwenabene ku mwenabene, mutamuba nexonda ngulu yoitenga ku Ongo yenawene? Mutaani kiraa kwingye nikabasongera ku Tata. Musa yomwainihiraa yakendebasongera. Muli mwaimiriraa Musa, nge mwaniimirire nani, kubwishi iye yaandikaa amwatsi wa kuluenda ingye. Wetuwe muli mutaimirire byo Musa aandikaa, niyo mukaimirira mute abinwa byonineena?

Source notes (2)
  1. Footnote Soma Yeremiya 17:21; Nehemiya 13:19.
  2. Footnote Soma Ndanieri 12:2.

Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.