Hunde Nouveau Testament
Yohana 3
Yesu ne Nikotemu
Mwa Buyahuti mwabaa mukulukulu muuma wa mwa kikanga kya Bafarisayo ni alukwa mbu ye Nikotemu. Lwire luuma nianaendera Yesu mu kiro nemubwira mbu: «Mwiyisa, twichi ku Ongo amekulika ituiyisa, kubwishi hatali mundu yangakocha ikola atulolero toukola uto, ali atali kuuma ne Ongo.» Yesu nianamuxubyitsa mbu: «Mwa kuli, anikubwira mbu: ‹Amundu atangakocha iingira mwa Bwami bwa Ongo atabutirwe ngendo ya kabiri›» Nikotemu nianamubutsa mbu: «Amundu ahara mungumwa angaxuba ibutwa ate? Angafuluka mwa bula bwa nina nebutwa kandi?» Yesu nianaxubya mbu: «Mwa kuli, anikubwira kwa mundu atabutirwe mwa mechi na mwa Mutima, atangakocha iingira mwa Bwami bwa Ongo.» «Kyokyamebutwa mwa mubiri ni kya mubiri, na kyokyamebutwa mwa Mutima AKomire ni kya Mutima Akomire. Utashishalaa kubwishi namekubwira ku mulirene ibutwa ngendo ya kabiri. Amuyaa anatsuka nga kwashashire. Ni waumpfa aburunga bwakola, wetuwe ni utechi ira yatenga, neri ira yaya. Kolunali lutyo na mundu yabutwa mwa Mutima.» Nikotemu nianabutsa Yesu mbu: «Abinwa ibi bingakocheka bite?» Yesu nianamuxubyitsa mbu: «Iwe uli mwiyisa mukulu mwa kihuo kye Isiraeri, utanechi abinwa ibi? Mwa kuli anikubwira kwa tuneena binwa byotwichi, nepfula mwatsi wa binwa byotwalolaako, wetuwe imwe mutamuxonda iikiritsa amwatsi wotupfula. Muli mutangaimirira mwa mango anibabwira binwa byobitsuka kwa kihuo, ni yomukaniimirira mute nikerebabwira binwa byobitsuka mu mbingu? Na kandi hatali mundu yaurukire mu mbingu, ali ate Muala wa Mundu yakimaa mu mbingu. Nga ko Musa abatulaa anchoka ya mulinga mwa bweru, ne Muala wa Mundu naye analirene ibatulwa, kwebula mbu kintsi mundu yamuimirire abe na buingo bwa biro byoshe. Kureba Ongo atsiyiraa kutsibu abandu boshe ba kwa kihuo, ni yalika Muala wa kyusha, kwebula mbu kintsi yamwimirire ataheraa, wetuwe abe na buingo bwa biro byoshe. Ongo atalikaa Muala kwa kihuo kwebula mbu achire abandu ba kwa kihuo bo lubancha, wetuwe kwebula mbu abandu ba kwa kihuo baufulwe naye. Yaimirire Muala atichirwe lubancha, wetuwe yatamuimirire ni ameotola ichirwa lubancha, kubwishi ni ataimirire Muala wa Ongo wa kyusha. Kyokileta alubancha ni kyokino: akyaka kyamewicha mwa kihuo, wetuwe abandu batsiyire amutsimya ilengya akyaka, kubwishi amikolere yabo mibi. Kintsi mundu yakola bubi anabaa akyaka, ni aba netinda iwicha hohali akyaka, kwebula mbu amikolere yiwe itangechexungwa kyenene. Wetuwe yakulikira akuli, anawicha ira kyaka kiri, kwebula mbu amikolere yiwe ixungwe kyenene kweikolwa nga ko Ongo ateekire.»
Amwatsi mutsindu wa Yohana
Inyuma kwaho, Yesu na bemitsa bewe niabanaya mwa kyango kye Yuteya. Nianaikala iyo kishangi kike kuuma nabo ni arubika. Yohana naye abaa arubika i Ainoni, hofi ne Salimu, kubwishi iyo yabaa mechi mangi. Abandu beremuhikira, naye ni ererubikabo. Mo kianiro umo, Yohana abaa ni atatsahirwa mwa nyumba ya muliki.
Lwire luuma, niakunapfumbuka buhaka hakati ka bemitsa ba Yohana na Muyahuti muuma kuluenda andungo yabo yareihotsa. Niabanaendera Yohana kwemubutsa mbu: «Mwiyisa, uubukire amundu uyo yabaa kuuma nawe kweshirya ya Yorotani, yowapfulaa amwatsi uwe? Talola ku yoyu tsene ahara arubika, na bandu boshe abaya yali.» Yohana nianaxubya mbu: «Hatali kiro na mundu muuma yangakocha iba na kindu kyoshekyoshe ali ataherwekyo ne Ongo. Imwe mwenabene mobapfutsi ba mwatsi wani ku nabulaa kwingye nitali ngye Kirisitu, wetuwe nilikirwe kwemuxondolera.» Yali na muheruki ye shekuherukya, wetuwe mwira wa yaherukya anaimana hofi naye nemuhulikya, anamoa kutsibu aumpfa amulenge wa yaherukya. Nani konimoa nityo, na lumoo lwani lwamebererera tsene. Angulu iwe ilirene iba nyingi ku yani. Yatenga ira luulu, ali ira luulu wa byoshe. Na wa kwa kihuo, ni wa kihuo, na binwa byaneena nabyo bya kwa kihuo. Yawichaa itenga i mu mbingu, ali haluluulu wa byoshe. Iye apfula mwatsi wa byalolaako nehulikya, wetuwe hatali kiro na mundu yaikiritsa amwatsi wapfula ku wa kuli. Kintsi yaikiritsa amwatsi wapfula ku wa kuli, abereretsa ku Ongo ye kuli. Yalikwaa ne Ongo ananeena abinwa bya Ongo, kubwishi Ongo anamwuchutsa Amutima uwe butsira luero. Ongo atsiyire Muala, amehira abindu byoshe mwa minwe siwe. Kintsi mundu yaimirire Muala ni ali na buingo bwa biro byoshe, na yatinda iimirira Muala ni atendexunga kwa buingo, wetuwe abutsibuke bwa Ongo ni bwendemuikalako.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.