Hunde Nouveau Testament
Yohana 2
Buheruki i Kana ye Ngalilaya
Kwabere kwametsuka biro bibiri, mwa mulungu we Kana ya kyango kye Ngalilaya, niamunaba buheruki. Nina wa Yesu naye abaa aliyo. Ne Yesu naye abaa ni amelalikwa mwa buheruki umo kuuma na bemitsa bewe. Mwa mango atifai yahwaa, nina wa Yesu nianamubwira mbu: «Batakiwete kandi ku tifai.» Wetuwe Yesu nianamuxubyitsa mbu: «Mali, kiki kyokiri hakati kawe nani? Akashangi kani katatsakaeraho neki.» Niyo nina abwira abakotsi mbu: «Kintsi kinwa kyakababwira, munakolakyo.» Aho habaa bibindi ndatu byobikolirwe mu mabale. Abibindi ibyo, bya Bayahuti babaa banabikamo mechi mobabaa banalekolesa mwa ndungo yabo yareikomya. Mu kintsi kibindi mwabaa mungapfubulirwa mechi amashembashemba litiri iana. Yesu nianabwira abapfuku abo mbu: «Muuchutse abibindi ibi byo mechi.» Nabo niabanauchutsabyo ihikira kwa susu. Inyuma kwaho, Yesu nianabwirabo mbu: «Tsene mutehe kwa mechi aya mutwalireo amukulukulu wa linye.» Abapfuku niabanakola batyo. Amukulukulu wa linye nianaxoma kwa mechi momabaa mamebinduka tifai. Amukulukulu uyo atamenya ha tifai yametenga. Wetuwe abakotsi bonabene bobatehaa kwa mechi, bobanamenyaa homateherwaa. Tsene ni yabirangira shekuherukya. Abere amewicha, nianamubwira mbu: «Abandu boshe banasheera bobalalikirwe bo tifai mbuya kutsibu kasa, inyuma mwa mango bameotola ipfayo, niyo bashea yoitalokire kushe. Wetuwe iwe ukinawete ku tifai ilokire kutsibu ihikira tsene.»
Yesu akolaa akashingishiro ako mwa mulungu we Kana ye Ngalilaya. Akashingishiro ako kokabaa kabere kwebwerekya angulu iwe, na bemitsa bewe niabanamwimirira.
Inyuma ya abinwa ibyo, Yesu nianaya mwa mulungu we Kaperenaumu kuuma ne nina, na baala babo na bemitsa bewe. Niabanaikala iyo yo biro bike.
Yesu ahentsa abachurutsi mwa hekalu
(Mat 21:12-13; Mar 11:15-17; Luk 19:45-46)
Mwa mango alwire lukulu lwa Pasaka ya Bayahuti lwabere lwaxonda ieraho, Yesu nianauruka i Yerusalemu. Nianatimana bandu mwa hekalu bobautsa nga, na mbuli, na makuku. Na bandi bobabaa abahingya faranga ni baikere kwa mesa mabo. Yesu nianahunga muliki kweirao ngonyi yehentsamo abandu boshe mwa hekalu kuuma na sambuli na sanga sabo. Inyuma kwaho, nianakunulanga amesa ma bobabaa abahingya asafaranga, neshesherato hashi. Nianabwira abautsi ba makuku mbu: «Mutengye abindu byenyu hano. Mutairaa anyumba ya Tata yo nyumba ya buchurutsi!» Abemitsa bewe niabanaubuka abinwa ibyo byobiandikirwe mwa Maandiko Makomire mbu: «Abuxu bwa nyumba yawe, bwendeniulumitsa.»1
Niyo Abakulukulu ba Bayahuti bamubutsa mbu: «Ukatubwerekya kahe kalolero kokangabereretsa ku unalirene ikola utya?» Yesu nianaxubyitsabo mbu: «Mushambule ahekalu iyi, nani nikaxuba ihimbayo mu biro bishatu.»2 aBayahuti niabanamubwira mbu: « Ahekalu iyi yahimbwaa mu kianiro kya miaka makumi ane na ndatu, nawe ukahimbayo kandi mu biro bishatuho?»3 Wetuwe ahekalu yo Yesu abaa aahula yabaa ni amubiri uwe. Yesu abere ameotola ipfuka, niyo abemitsa bewe baubuka kwabaa ashambala kuluenda akinwa ikyo. Niabanaimirira aMaandiko Makomire na binwa byaneenaa.
Yesu echi abyoshe
Mwa mango Yesu abaa akinali i Yerusalemu mwa lwire lukulu lwa Pasaka, bandu bangi niabanamwimirira kubwishi baxungaa kwa tulolero twabaa akola. Wetuwe Yesu ataimiriraabo kubwishi ni echi aboshe kushe. Na kandi abaa atalaire ipfulirwa mwatsi wa mundu woshewoshe, kubwishi yenawene abaa echi byobiri mwa myete ya bandu.
Source notes (3)
- Footnote Soma Saburi 69:10.
- Footnote Soma Matayo 26:61.
- Footnote Abuhimbe bwa hekalu bwatangiraa mwa mwaka wa makumi abiri, lubere Yesu abutwe mwa kianiro kya Herote Mukulu.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.