Hunde Nouveau Testament
Yohana 1
Kinwa yairwaa mundu
Mwa ndangiro, Kinwa abaaho, ne Kinwa abaa kuuma ne Ongo, ne Kinwa abaa Ongo. Mwa ndangiro, Kinwa abaaho kuuma ne Ongo. Abindu byoshe byabumbwaa itsukira iye, hatali kiro na kindu kiuma kyokyabumbwaa butsira iye. Mwiye momwabaa abuingo, na buingo ubo bwabaa kyaka kya bandu boshe. Akyaka ikyo akikoletsa mwa mutsimya, na mutsimya atatsimitsekyo.
Habaa mundu muuma yalikwaa ne Ongo, aretsina liwe ni ye Yohana. Yohana nianawicha nga kaliho, kwepfula amwatsi wa kyaka, kwebula mbu abandu boshe baimirire itsukira iye. Iye atabaa ye kyaka ikyo, wetuwe kwebula mbu apfule amwatsi wa kyaka ikyo. Kinwa abaa kyaka kya kuli, kyokiwicha kwa kihuo, kwekoletsa ku kintsi mundu. Kinwa abaa mwa kihuo, na kihuo kyabumbwaa mwiye, wetuwe akihuo kitamumenya. Awichaa mwa kihuo kiwe, wetuwe banyakyabo batamukokera. Aboshe bobamukokeraa, na bobamuimiriraa, nianahabo maala meba bana ba Ongo. Abo batabutirwe mu shiama, neri mwishasha ra mubiri, neri mwishasha ra mundu, wetuwe Ongo yabutirebo. Kinwa nianairwa mundu, nianaikala mwa kati ketu ni auchwire lukoo na kuli. Twaxungaa kwa ngulu yiwe, angulu iyo, Tata yewene yahaayo Muala wa kyusha . Yohana apfula amwatsi uwe mbu: «Uyu yonaahulaa mbu: ‹Ira nyuma kwingye aiwicha mundu yanixondoleraa, kubwishi abaaho lubere kwingye.›»
Tweboshe twameangirira muhango wa kwa lukoo lungi lwabaa nalo, nianatuashanira kutsibu. Ongo ahanaa aMuomba itsukira ku Musa1, wetuwe alukoo na kuli byawichaa itsukira ku Yesu Kirisitu. Wetuwe Muala wa kyusha yanaba Ongo, yaliho kuuma ne Tata, iye yamuxwikulaa kwitwe.
Amwatsi wa Yohana kuluenda Yesu
(Mat 3:1-12; Mar 1:1-18; Luk 3:1-18)
Uno wo mwatsi Yohana apfula mwa mango abakulukulu ba Bayahuti be Yerusalemu bamulikaako bakungu, na Balawi kwemubutsa mbu: «Iwe, we inde?» Yohana nianaxubyitsabo kyenene mbu: «Ingye nite ngye Kirisitu.» Niyo bamubutsa mbu: «Tsene, Iwe wende? Mbeni iwe we Eliya?» Nianaxubya mbu: «Kiro! Ate ingye iye». Iwe we mutahwa2? Nianaxubya mbu: «Ihi». Niabanamubutsa kandi mbu: «Tsene, Iwe wende? Utubwire kwebula mbu nge twaenda tupfulireo boshabatulika. Aubula ute kuluenda wenawene?» Yohana nianaxubya mbu:
«Niri mulenge yalaka mwa bweru mbu:
‹Mutunganyanye anchira ya Ninakuwetu›»3
nga kwa mutahwa Isaya abulaa.
Mu bobalikwaa, mwabaa Bafarisayo. Niabanabutsa Yohana kandi mbu: «Uli ute we Kirisitu, neri Eliya, neri amutahwa, tsene ni yourubika kubwishi bwaki?» Yohana nianaxubyitsabo mbu: «Ingye anibarubika mu mechi, wetuwe mwa kati kenyu muli mundu yomutechi. Amundu uyo awicha ira nyuma kwingye, nitalirene kiro na hake iminula amiriki ya kwa bilyato biwe4.» Abinwa ibyo byakolwaa i Betaniya, kweshirya wa lwichi lwe Yorotani, ho Yohana abaa anarubikira.
Yesu ye Kyana-Buli kya Ongo
Bwabere mbu abukya, Yohana nianaxunga Yesu ni awicha harali. Nianabula mbu: «Lola kwa Kyana-Buli kya Ongo kyokitengya asantsambi sa bandu boshe ba kwa kihuo!5 Uyu yonaahulaa mwa mango naneenaa mbu: ‹Ira nyuma kwingye, aiwicha mundu yanixondoleraa, kubwishi abaaho buxondotsi kwingye.› Ingye nabaa nitamwichi. Wetuwe namewicha irubika bandu mu mechi kwebula mbu ni mubwerekye kwa luanda lwa Baisiraeri.»
Yohana nianapfula amwatsi wa kuluenda Yesu mbu: «Shanixunga aMutima wa Ongo ngakuno ikuku rolikima itenga mu mbingu nemuikirako. Nani nabaa nitamwichi, wetuwe yanilikaa irubika mu mechi, uyo yanibwiraa mbu: ‹Youkendexunga aMutima Akomire ali amukimako nemuikalako, uyo yanarubika mwa Mutima Akomire.› Ingye nailoleraa kwa binwa ibi, nani anipfula amwatsi wabyo kuyo ye Muala wa Ongo.»
Abemitsa babere ba Yesu
Bwabere mbu abukya, Yohana ni ali aho kandi, kuuma na babiri ba mwa bemitsa bewe. Abere axunga Yesu ali atsuka, nianabula mbu: «Sindera aKyana-Buli kya Ongo.» Abemitsa babiri babere baumpfa abinwa ibyo, niabanakulikira Yesu. Yesu nianakebera, nianaxunga kwabamukulikira, nianabutsabo mbu: «Amuxondaki?» Niabanamuxubyitsa mbu: «Rabi, rebula mbu: ‹Mwiyisa› unaba hayi?» Nianaxubyitsabo mbu: «Muwiche, mukaxungaho.» Niabanaenda, niabanaxunga hanaikala. Niabanashiba naye iyo amubitsi uyo. Sabaa ni asishembashemba saa ikumi sa luoloolo.
Andereya, mualabo Simoni Petero, abaa muuma wa mwa bemitsa babiri bobaumpfaa abinwa bya Yohana, baba neimitsa Yesu. Andereya nianatimana kasa mualabo yalukwa mbu ye Simoni, nianamubwira mbu: «Twamexunga Masiya, rebula mbu: ‹Kirisitu.›» Inyuma kwaho, Andereya nianatwala Simoni ho Yesu ali. Yesu nianamusindera, nianabula mbu: «Iwe we Simoni muala wa Yohana6, ukalukwa mbu we Kefa7. rebula mbu: ‹Ibale.›»
Yesu abirangira Firipo ne Tanaere
Bwabere bwakya, Yesu abaa axonda iya i Ngalilaya. Abere mbu atimana Firipo, nianamubwira mbu: «Uniimitse.» Firipo abaa mwicha i Betesaita, kwawabo Andereya ne Petero. Inyuma kwaho, Firipo niatimana Tanaere, nianamubwira mbu: «Twamexunga ku yo Musa aandikaa amyatsi yiwe mwa kitabo kya Muomba. Banabe na batahwa bashambalaa kuluenda iye. Iye ye Yesu we Nasareti, muala wa Yosefu.» Tanaere nianabutsa Firipo mbu: «Mbeni kabuya kanganatenga i Nasareti?» Firipo nianamuxubyitsa mbu: «Wicha ulole.»
Yesu abere axunga ko Tanaere awicha harali, nianabula atya kuluenda iye mbu: «Lola ku Muisiraeri wa kuli, mwiye mutali kiro na kitingo. Tanaere nianamubutsa mbu: ‹Wanimenyaa ute?› Yesu nianamuxubyitsa mbu: ‹Shanikuxunga buxondotsi Firipo akubirangire ali youli mwesina ra muti wa tini.›» Tanaere nianamubwira kandi mbu: «Mwiyisa, iwe we Muala wa Ongo, na kandi iwe we Mwami wa Baisiraeri!» Yesu nianamuxubyitsa mbu: «Wameimirira kubwishi namekubwira mbu shanikuxunga ni uli mwesina ra muti wa tini? Ukalola ku binwa bitsibu ilengya ibi.» Yesu nianaxuba imubwira mbu: «Mwa kuli, anibabwira ku mukaxunga ambingu ni ikingukere na bamalaika ba Ongo ni abauruka nekima ku Muala wa Mundu.»
Source notes (7)
- Footnote Soma Mafuluko 31:18; 34:28.
- Footnote Iwe we mutahwa aBayahuti ba mwa kianiro ikyo, babaa abalindira mutahwa yobabaa bechi kwa wicha kubwishi lwareilingiliranya lubere lwarewicha ra Kirisitu.
- Footnote Soma Isaya 40:3.
- Footnote biwe Kwa mira, mwa Buyahuti, amukotsiho yabaa anaminula amiriki ya bilyato bya ninakuwabo.
- Footnote Soma Isaya 53:6-7.
- Footnote Yohana maandiko maima ma Kikiroki mali na aretsina ra Yona mwa mwanya wa retsina ra Yohana.
- Footnote Kefa: aretsina ra kefa, renaliuma ne Petero na mabiri moshe ni bula mbu ibale.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.