Skip to content
BibleKenya

Hunde Nouveau Testament

Yohana 19

aBayahuti abahema mbu Yesu ahangikwe

Niyo Pilato akalihyabo mbu batsimbe Yesu nemuhirako mihumbo. Abasura niabanaluka ngata mu ndabi sa mahwa nemuimbakyayo kwa mutwe. Na kandi niabanamuimbakya lukimba lwa kishia1. Berewicha yarali ni ababula mbu: «Bwakyere Mwami wa Bayahuti!» Niabanamukubita bihyu. Pilato nianahuluka kweya hambua kandi nebwira aBayahuti mbu: «Muumpfe, nikabaleteraye hambua hano, kwebula mbu mumenye ku nitaxungire ku kiro na kinwa kiuma kyokyangatuma nimuchira lubancha.» Niyo Yesu ahuluka hambua, ni aimbere angata ya mahwa kwa mutwe na lukimba lwa kishia. Ne Pilato nianabwira abandu mbu: «Amundu wenyu uyu!» Boshebakungu na balangi ba hekalu babere bamuxunga, niabanalaka mbu: «Umuhangike ku musalaba! Umuhangike ku musalaba!» Pilato nianabwirabo mbu: «Mumutsimbe mwenabene nemuhangika, kubwishi ingye nitaxungire ku kiro kinwa kyokingatuma nimuchira lubancha.» aBayahuti niabanamuxubyitsa mbu: «Kwekulikira aMuomba wetu amundu uyo analirene iitwa, kubwishi ailukaa mbu Muala wa Ongo.»2 Pilato abere ameumpfa akinwa ikyo, nianaubaha kutsibu. Nianaxuba ifuluka mwa nyumba nebutsa Yesu mbu: «Mbeni uli mwicha hai?» Wetuwe Yesu atamuxubyitsa kiro na kinwa. Pilato nianamubutsa mbu: «Kubwishi bwaki utaunixubyitsa? Mbeni iwe utechi ku niri na maala mekuminula, na maala mekuhangika ku musalaba?» Yesu nianamuxubyitsa mbu: «Utawete kiro maala moshemoshe kwingye, mali mataliho mouherwe ne Ongo. Kubatyo, amundu yashanihota yo uli, antsambi yiwe nene kutsibu ikulengya.» Ihuluka akashangi ako, Pilato nianaxonda nchira yeminula Yesu. Wetuwe aBayahuti niabanalaka mbu: «Ukeminula amundu uyu, ni ute mwira wa mwami Kaisari. Kintsi mundu yanaiyira mwami, ni mulenda wa mwami Kaisari.» Pilato abere ameumpfa abinwa ibyo, nianatwala Yesu hambua. Nianaikala ku kipfumbi ahandu hohanalukwa mwa Kieburaniya mbu: «Kabata», rebula mbu: «Hohabambirwe mu mabale.» Lwabaa lwire luxondolere alwire lukulu lwa Pasaka, mu saa asishembashemba saa ndatu sa kati ka mwishi3. Pilato nianabwira aBayahuti mbu: «Uyu yo Mwami wenyu!» Wetuwe niabanalaka mbu: «Umwite! Umuhangike ku musalaba!» Pilato nianabutsabo mbu: «Amuxonda mbu nihangike amwami wenyu ku musalaba?» aBoshebakungu niabanaxubya mbu: «Itwe tutawete undi mwami ali ate mwami Kaisari.» Niyo Pilato ahabo Yesu, kwebula mbu ahangikwe ku musalaba.

Abasura bahangika Yesu ku musalaba

(Mat 27:32-44; Mar 15:21-32; Luk 23:26-43)

Yesu nianatenga mwa mulungu ni ahete amusalaba uwe ihikira hohanalukwa mwa Kieburaniya mbu: «Kolikota», rebula mbu: «Handu hakahangatsi.» Aho ha basura bahangikaa Yesu kwa musalaba, kuuma na bandi balume babiri. Muuma kwa malyo, na undi kwa malembe ma Yesu.

Pilato nianakalihya mbu baandike binwa byobikahirwa hambashiro wa musalaba wa Yesu, byobiandikirwe mbu: «Yesu we Nasareti, Mwami wa Bayahuti.» Bayahuti bangi beresoma areandiko iro kubwishi ho Yesu ahangikwaa habaa hofi na mulungu we Yerusalemu, na reandiko iro rabaa liandikirwe mu Kieburaniya, na mu Kilatini, na mu Kikiriki. Niyo aBoshebakungu ba Bayahuti babwira Pilato mbu: «Utaandikaa mbu mwami wa Bayahuti, wetuwe uandike mbu: ‹Amundu uyu aneenaa mbu ingye, ngye mwami wa Bayahuti.›»

Pilato nianaxubyitsabo mbu: «Byonameandika, byameandikwa!»

Abasura babere bameotola ihangika Yesu kwa musalaba, niabanatsimba asangimba siwe neabanato mu mihango ine. Niabanaha kintsi musura muhango muuma. Niabanatsimba kandi akantsu kewe kokabaa katawete mulando, kalandirwe mu kiche kiumaho itenga iluulu na hetako. Abasura niabanabwirana mbu: «Tutaberengaa akantsu aka, wetuwe tukubireko mbayi, kwebula mbu tumenye ngakuno kakaba kande.» Abinwa ibi byabaa kwebula mbu aMaandiko Makomire mabererere, momabwire mbu:

«Baabanaa asangimba sani

Na kantsu kani bakubirako mbayi.»4

Abinwa ibyo byabasura bakolaa.

Habaa bakatsi bane ni baimene hofi na musalaba wa Yesu. Abakatsi abo bobano: Mariya nina wa Yesu, ne mwali wabo nina wa Yesu, ne Mariya muka Kileopa, ne Mariya we Makitala. Kubatyo mwa mango Yesu axungaa ku nina, na mwimitsa yabaa anamutsiyira, ni aimene hofi naye, nianabwira nina mbu: «Tsene mali, uyu ye muala wawe.»

Nenyuma kwaho, nianabwira amwimitsa uyo mbu: «Tsene uyu ye nyoko.» Ihuluka akashangi ako, amwimitsa uyo nianatwala Mariya mwamwe.

Alupfu lwa Yesu

(Mat 27:45-56; Mar 15:33-41; Luk 23:44-49)

Inyuma kwaho, kubwishi Yesu ni echi kwa binwa byoshe byameberera, na kwebereretsa aMaandiko Makomire, nianabula mbu: «Nipfire nyota.» Aho habaa hali kipfuma kiuchwire tifai ya ngala. Abasura niabanabobya fufuma mwa tifai iyo, baminayo ku ndabi ya hisopo, nehirayo kwa mitutu yiwe. Yesu abere amexona kwa tifai iyo, niananeena mbu: «Abyoshe byamebererera!» Inyuma kwaho, nianaindamya amutwe netowa amutima.

Musura muuma apfula Yesu ye singa mwa lubapfu

Alwire ulo lwabaa lwelingiliranya alwire lukulu lwa Sabato yoiwicha. Kubwishi bwekyo, aBayahuti batatsiya mbu asandundwe sabobahangikirwe sishibe kwa misalaba, kubwishi alwire ulo lwabwaa lwire lukulu kutsibu. Kubatyo niabanahema Pilato yo rubu mbu amilundi ya bobahangikirwe ipfunangangwe, kwebula mbu bahuhuke chuba, na mibiri yabo itengibwe kwa misalaba. Kubatyo, abasura bawicha, bapfunanganga amilundi ya mundu mubere nenyuma amilundi ya wa kabiri yahangikwaa kuuma ne Yesu kwa musalaba. Wetuwe babere bahika ho Yesu ali, bashingana ni amekinda ihuhuka. Kubatyo bataxuba ipfunanganga amilundi yiwe. Wetuwe musura muuma nianamupfula singa mwa lubapfu mo kashangi umoho, shiama na mechi ma xoxoboka. Amundu yaxungaa kwa binwa ibyo yapfula amwatsi wabyo. Na mwatsi wapfula wa kuli. Na kandi echi kwaneena kuli, kwebula mbu nemwe mukoche iimirira. Abinwa ibi byabaa kwebula mbu aMaandiko Makomire mabererere momabula mbu: «Hate kiro ne pfuha liwe liuma rolikendefunangangwa5.» Mandi Maandiko Makomire mabwire kandi mbu:

«Bendewicha ilola ku

yobatobolangaa6.»

Yesu atabwa

(Mat 27:57-61; Mar 15:42-47; Luk 23:50-56)

Inyuma ya binwa ibyo, Yosefu, mwicha i Arimateya, nianahema Pilato rubu lwetengya andundwe ya Yesu kwa musalaba. Yosefu uyo abaa muuma wa mwa bemitsa ba Yesu, wetuwe mu bubixo, kubwishi abaa aubahire abakulukulu ba Bayahuti. Pilato nianamuha rubu. Kubatyo, Yosefu nianaya itengya andundwe ya Yesu kwa musalaba. Ne Nikotemu naye yaendera Yesu mwekiro, abaa ali aho. Abaa awete ku bilo abishembashemba makumi ashatu bya lungo, luxubangene na bubani. Ababiri boshe niabanaheka amubiri wa Yesu, babungira kuo ko ngimba sihakirweko lungo nga kwa ndungo ya Bayahuti yareta ibwire. Aho, hobahangikiraa Yesu, habaa hali ixwa, na mwexwa umo ni muli isinda lihya, ni litatsaratabwamo mundu. Na kubwishi lwabaa lwire lwareiringiliranya alwire lukulu lwa Sabato ya Bayahuti, na aresinda ni liri hofi, niabanatamo Yesu.

Source notes (6)
  1. Footnote Lukimba lwa kishia Mwa Bayahuti alukimba lwa kishia lwabaa kantsu ka bami.
  2. Footnote Soma Balawi 24:16.
  3. Footnote aBayahuti babaa batutsa ndungo ye iteanya mwa lwire lubere lwa lwire lukulu lwa Pasaka. Itangira saa ndatu sa mwishi sa lwire ulo, mo babaa banaita asambuli sa Pasaka mwa hekalu.
  4. Footnote Soma Saburi 22:18.
  5. Footnote Soma Mafuluko 12:46; Ndangiro 9:12; Saburi 34:21.
  6. Footnote Soma Sakariya 12/10.

Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.