Hunde Nouveau Testament
Yohana 20
Yesu apfuka
(Mat 28:1-8; Mar 16:1-8; Luk 24:1-12)
Mwe lutumbi lwa lwire lubere lwa reinga1, Mariya we Makitala nianaya kwesinda. Abere mbu yahika iyo nianaxunga arebale rorabaa ribambire kwesinda ni litakiriko. Niyo alibita chuba kwebwira Simoni Petero na undi mwimitsa yo Yesu abaa atsiyire mbu: «Batengitse andundwe ya Ninakuwetu mwesinda tutechi hobamuhirire.»
Niyo Petero na undi mwimitsa uyo baihuta kweya kwesinda. Ababiri boshe baihuta kuuma, wetuwe aundi mwimitsa uyo, nianaihuta kutsibu irengya Petero neba mubere kwehika kwesinda. Iye nianaindama kwelungulira mwa kati, nexunga kwa biremba biterekirwe kwa musike. Wetuwe ataingira. Simoni Petero yabaa amukulikire, nianawicha neingira mwesinda. Nianaxunga kwa biremba biterekirwe kwa musike. Nianaxunga kandi kwa kiremba kyokyabaa kixwikire amutwe wa Yesu, ni kitali hauma na bindi, wetuwe ni kibungirwe kyenakyene hamusike. Niyo aundi mwimitsa yawichaa lubere kwesinda, naye nianaingira. Nianailolera, aba neimirira. Byabaa bityo, kubwishi abemitsa babaa ni batatsabamenya kwa Maandiko Makomire mabwire mbu Yesu alirene ipfuka. Inyuma ya binwa ibyo, abemitsa babiri abo niabanafuluka kwawabo.
Yesu aibwerekya ku Mariya we Makitala
(Mat 28:9-10; Mar 16:9-11)
Mariya abaa niaimene hambua hofi na resinda, ni alira. Abere ali alira, nianaindama nelungulira mwesinda, nianaxunga ku bamalaika babiri baimbere ngimba sa mweru ni baikere ha ndundwe ya Yesu yabaa iterekirwe. Muuma abaa kwa munda wa mutwe na undi kwa munda wa bishando. Abamalaika abo niabanamubutsa mbu: «Ee mali, mbeni aulira kubwishi bwaki?» Naye nianaxubyitsabo mbu: «Kubwishi bametengya andundwe ya Ninakuwetu, nani ndechi hobahirireyo.» Abere amekinda ineena abinwa ibyo, nianakebera. Wetuwe atakengula ku Yesu uyo. Yesu nianamubutsa mbu: «Mali, aulira kubwishi bwaki? Auxonda inde?» Mariya abaa aanikira mbu kuti uyo muhingi wa rexwa, nianamubwira mbu: «Ninakuwetu, uli iwe weshautengya andundwe yiwe, nibwire howamehirayo, nge nabingayo.» Yesu nianamubwira mbu: «Mariya!» Naye nianakebera, niananeena mu kieburaniya mbu: «Rabuni,» rebula mbu «Mwiyisa.» Yesu nianamubwira mbu: «Utaniataako, kubwishi nitatsanauruka ira mwa Tata. Wetuwe yaubwire banyakyetu ku nauruka ira mwa Tata, naye Ixo, Ongo wani, na Ongo wenyu.» Kubatyo Mariya we Makitala nianaya ipfulirao abemitsa kwamexunga ku Ninakuwetu, na kwamemubwira abinwa ibyo.
Yesu apfumbuka kwa bemitsa bewe
(Mat 28:16-20; Mar 16:14-18; Luk 24:36-49)
Mwe luoloolo lwa lwire lubere lwa reinga iro, abemitsa niabanabuanana mu nyumba nguma. Niabanakinga asanyutsi kubwishi ni baubahire abakulukulu ba Bayahuti. Mu kashalimo, Yesu nianapfumbuka neimana hakatikati kabo, nianabwirabo mbu: «Mube na buholo!» Abere amemala ineena atyo, Yesu nianabwerekyabo asaminwe siwe na lubapfu luwe. Kubatyo abemitsa niabanamowa mwa mango baxungaa ku Ninakuwetu. Yesu nianaxuba ibwirabo mbu: «Mube na buholo! Nga ko Tata anilikaa, nani namebalika imwe.» Abere amemala ineena abinwa ibyo, nianabuhirabo muka nebwirabo mbu: «Muangirire aMutima aKomire. Abandu boshi bomukendeshashira asantsambi, bendeshashirwa, na boshi bomutendeshashira, batendeshashirwa.»
Yesu ne Tomasi
Wetuwe Tomasi yalukwa kandi mbu «Ihasha» yabaa muuma wa mwa bemitsa ikumi na babiri, iye atabaa kuuma nabo mwa mango Yesu awichaa. Abandi bemitsa niabanamubwira mbu: «Twamexunga ku Ninakuwetu.» Wetuwe Tomasi nianaxubyitsabo mbu: «Nitatsa na ilolera kwa ngopfu sa misumari mwa minwe siwe nehira amwolota wani mwa ngopfu sa misumari iyo, na kandi nitahirire amyolota yani mwa lubapfu luwe, ni nitiimirire.» kwabere kwametsuka iinga liuma inyuma kwaho, abemitsa ba Yesu niabanakorana kandi mwa nyumba umomoho, ne Tomasi abaa ali kuuma nabo. Na kiro mbu asanyutsi sabaa sikingirwe, Yesu nianapfumbuka kandi, neimana hakatikati kabo, nianabwirabo mbu: «Mube na buholo!» Inyuma kwaho nianabwira Tomasi mbu: «Sheetsa amwolota wawe hano ube nelola kwa minwe sani, lambula akuboko kwawe ube nepfula kwa lubapfu lwani. Utakitikatikaa kandi, wetuwe imirira.» Tomasi nianamuxubyitsa mbu: «Ninakuwetu na Ongo wani!»
Ne Yesu nianamubwira mbu: «Wameimirira kubwishi wamenixungako? Baashanirwe bobaimirire butsira ilola!»
Akinwa kikulu kya mwa kitabo kino
Yesu abwerekyaa tundi tushingishiro tungi mwa mbere sa bemitsa bewe totutaandikirwe mwa kitabo kino. Wetuwe byobiandikirwemo, biandikirwe kwebula mbu muimirire ku Yesu ye Kirisitu, Muala wa Ongo, na kwemwimirira mukoche iba na buingo mwe tsina liwe.
Source notes (1)
- Footnote Lubere lwa reinga Soma Matayo 28:1.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.