Hunde Nouveau Testament
Yohana 18
Yesu atsimbwa
(Mat 26:47-56; Mar 14:43-50; Luk 22:47-53)
Yesu abere amemala ineena abinwa ibyo, nianaya kuuma na bemitsa bewe kweshirya ra lwichi lwa Kitoroni. Aboshe niabanaingira mwexwa rorabaa liri iyo. Yuta yahotaa Yesu, amenyaa ha rexwa iro rabaa liri, kubwishi Yesu abaa anakoranayo kuuma na bemitsa bewe ngendo nyingi. Yuta nianatsimba kichiri kya basura kuuma na balangi bobalikwaa na boshebakungu na Bafarisayo. Nianawicha nabo mwexwa nibawete ku matala, na ku tuxuku na ku biruu. Yesu abaa echi abyoshe byobikamuhikira. Nianaenderabo nebutsabo mbu: «Inde yomuxonda?» Niabanamuxubitsa mbu: «Yesu we Nasareti.» Yesu nianabwirabo mbu: «Ingye uno.» Ne Yuta, yabaa amemuhota, niaimene kuuma nabo aho. Mwa mango Yesu abwiraabo mbu: «Ingye uno», niabanafuluka bunyumanyuma newa hashi. Yesu nianabutsabo ngendo ya kabiri mbu: «Inde yomuxonda?»
Nabo niabanamuxubyitsa mbu: «Yesu we Nasareti.» Yesu nianaxubitsabo mbu: «Nameotola ibabwira mbu ingye uno. Kubatyo, niri ngye ngyamuxonda, mulike abandi aba bobali kuuma nani, baiendere.» Abulaa atyo kwebula mbu abinwa byaneenaa ibi bibererere. Abaa niaotwere ineena mbu: «Nitahetsaa kiro na muuma mu bowanihaa.»1
Simoni Petero abaa awete ku buhombo, nianatengyabo mwa hara necha arekwitwi ra kwa malyo ma mukotsi wa Shebakungu. Aretsina ra mukotsi uyo, ni ye Maliko. Wetuwe Yesu nianabwira Petero mbu: «Fulukya abuhombo bwawe mwa hara! Mbeni auanikira mbu nitixome alungu lwa minubo lo Tata ameniha?»
Yesu atwalwa mwa mbere sa Anasi
Niyo akichiri kya basura ikyo kuuma na mukulukulu wabo na balangi ba bakulukulu ba Bayahuti niabanatsimba Yesu nemumina. Bamutwala kasa ira mwa Anasi2. Anasi abaa shetsala wa Kayafa yabaa Shebakungu mo kianiro umo. Ne Kayafa yahanaa aBayahuti mbu lirirene mundu muuma aitwe kubwishi bwa bandu boshe3.
Petero aiyana Yesu
(Mat 26:69-70; Mar 14:66-68; Luk 22:55-57)
Simoni Petero na undi mwimitsa niabanakulikira Yesu. Shebakungu abaa echi aundi mwimitsa uyo, kubatyo nianaingira kuuma ne Yesu mwa mbuwa ya Shebakungu. Wetuwe Petero nianashiba hambuwa hofi na lukyo. Aundi mwimitsa, yo Shebakungu abaa echi, ninahuluka hambuwa, niananeena na mukatsi yabaa alanga alukyo, neingitsa Petero mwa kati. Amucha uyo yabaa mulangi wa lukyo, nianabwira Petero mbu: «Mbeni nawe ute muuma wa mwa bemitsa ba mundu uyu?» Petero nianamuxubyitsa mbu: «Ihi! Ingye nite mwimitsa uwe.» Abakotsi na balangi bobabaa bamechana muchanwa, kubwishi akianiro ikyo kyabaa kya ndibata, nabo ni bali aho ni abaota kwa muchanwa. Petero naye ninaimana aho, ni aota kuo kuuma nabo.
Yesu mwa mbere sa Anasi
(Mat 26:59-66; Mar 14:55-64; Luk 22:66-71)
Shebakungu nianabutsa Yesu kuluenda abemitsa bewe na kuluenda meyiso mewe. Yesu nianamuxubitsa mbu: «Nasimolaa kyenene na bandu boshe, nianiyisa abiro byoshe mwa masinakoki, na mwa hekalu, ha Bayahuti boshe banabuananira. Nitaiyisaa mu bubixo. Aunibutsa kubwishi bwaki? Butsa bobaumpfaa abinwa byonaneenaa, kubwishi bechi kushe byonaneenaa.»
Yesu abere ameneena abinwa ibyo, muuma wa mwa balangi bobabaa bali hofi naye, nianamubanda kihyu, neneena mbu: «Mbeni batyo koulirene ixubyitsa Shebakungu?»
Yesu nianamuxubyitsa mbu: «Niri nameneena kubi, bwerekya abubi ubo. Wetuwe niri nameneena kushe, ni wamenikubita kubwishi bwaki?»
Inyuma kwaho, Anasi nianalika Yesu ira mwa Shebakungu Kayafa, ni aminirwe.
Petero ayiana Yesu kandi
(Mat 26:71-75; Mar 14:69-72; Luk 22:58-62)
Mwa kashangi ako, Simoni Petero abaa akinali aho ni aota kwa muchanwa. Niabanamubutsa mbu: «Mbeni nawe ute muuma wa mwa bemitsa ba mundu uyu?» Petero nianaxubya mbu: «Ihi! Ingye nitali mwimitsa uwe.» Muuma wa mwa bakotsi ba Shebakungu, yabaa wa kipfunga kya mundu yo Petero achaa arekwitwi, nianamubwira mbu: «Mbeni nitashanikuxunga kuuma naye mwexwa?»
Wetuwe Petero nianayianaye kandi. Na mwa kashangi umo, axongole niainakokobika.
Yesu mwa mbere sa Pilato
(Mat 27:1-2; Mar 15:1-5; Luk 23:1-5)
Mwe lutumbi, abasura niabanatyengya Yesu ira mwa Kayafa, nemutwala mwa nyumba ya Kafurunere. Wetuwe abakulukulu ba Bayahuti bataingira mwa nyumba ya Kafurunere, kwebula mbu batangechehala, nefundwa ilya kwa mbiya ya Pasaka. Niyo Pilato ashinganabo hambuwa, nebutsabo mbu: «Amusongera amunduyu kubwishi bwaki?» Nabo niabanamuxubyitsa mbu: «Ali atangabere mukotsi wa bibi, nge tutashatumuleta youli.» Pilato nianabwirabo mbu: «Mwenabene mumutsimbe nemuchira lubancha kweimitsanya na Muomba wenyu.» aBayahuti niabanamuxubitsa mbu: «Itwe tutawete rubu lweita mundu.» Byabaa batyo kwebula mbu kibererere akinwa kyo Yesu aneenaa kwebwerekya ku luhe lupfu lwalirene ipfa4. Niyo Pilato afuluka mwa nyumba, nianabirangira Yesu nemubutsa mbu: «Mbeni iwe we mwami wa Bayahuti?» Yesu nianaxubya mbu: «Auneena utyo kweimitsanya na mianikire yawe wenawene, neri bandi bandu bobamekupfulira amyatsi yani?» Pilato nianaxubya mbu: «Ingye nite Muyahuti. Abandu ba luanda lwawe na Boshebakungu boshabakuleta yoniri. Wamekolaki?» Yesu nianaxubya mbu: «Abwami bwani bute bwa kwa kihuo kino. Buli bungabere bwa kwa kihuo kino, abakotsi bani nge bamenilwira kwebula mbu nitahirwaa mwa minwe sa Bayahuti. Wetuwe lute lutyo, abwami bwani bute bwa kihuo kino.» Niyo Pilato amubutsa mbu: «Ni bula mbu iwe uli mwami?» Yesu nianamuxubitsa mbu: «Wamebulako, kwingye niri mwami. Nani nahikaa kwa kihuo kwebula mbu nipfule amwatsi wa kuli. Aboshe bobali kwa munda wa kuli, abaumpfa abinwa byani.» Pilato nianamubutsa mbu: «Akuli kyokiki?» Pilato abere amemala ineena akinwa iki, nianahuluka kandi hambua nebwira aBayahuti mbu: «Ingye nitanixunga kiro na kinwa kyechira amundu uyu yo lubancha.»
«Wetuwe kwekulikira andungo yenyu, ninabaminulira mundu muuma wa muliki mu lwire lukulu lwa Pasaka. Kubatyo, amuxonda mbu nibaminulire amwami wa Bayahuti?»
Niyo aboshe balaka kutsibu mbu: «Ihi! Ate iye. Atuxonda Baraba!» Baraba uyo abaa munyai.
Source notes (4)
- Footnote Soma Yohana 6:39; 17:12; 10:28.
- Footnote Anasi: Abaa ni Shebakungu. Wetuwe ni hali undi mundu yakola mwa kihando kiwe.
- Footnote Soma Yohana 11:49-50.
- Footnote Abayahuti babaa banaya ita abandu babi mwekabulabo mabale. Wetuwe, aBaroma ibo, babaa banaya itabo mu ihangikabo ku musalaba.
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.