Hunde Nouveau Testament
Yohana 13
Yesu aoya abishando bya bemitsa bewe
Kwabaa ni kwashiba lwire luuma buxondotsi bwa lwire lukulu lwa Pasaka. Yesu amenyaa ku akashangi kewe ka retenga kwa kihuo nefuluka ira mwa Ishe kameeraho. Iye abaa atsiyire abandu bewe bobabaa mwa kihuo, nianatsiyirabo ihikira kwa ntsindiro.
Yesu na bemitsa bewe babere bali yabalengera, Shitani abaa niameotola iisiritsa Yuta Isikariyote muala wa Simoni mbu ahote Yesu. Yesu amenyaa ku Ishe amehira abindu boshe mwa minwe siwe, na kwiye yewene atengaa ira mwa Ongo na ku afuluka ira mwa Ongo. Kubatyo Yesu nianatenga habaa alira abilyo, nianakungula alukimba lwabaa aixwikire, nianaimina kiremba mwa mbindi. Inyuma kwaho nianahira mechi mu kipfuma, netangira ioya abishando bya bemitsa bewe nekababyayo mwa mutete uyo yoshaimina mwa mbindi. Abere ahika ku Simoni Petero, nianamubwira mbu: «Ninakuwetu, mbeni mwa kuli ukananioya abishando?»
Yesu nianamuxubyitsa mbu: «Tsene, utatsawamenya akinwa kyonikola, wetuwe ukamenyako inyuma.»
Petero nianamubwira mbu: «Utinioye kwa bishando byani kiro na hake!»
Yesu nianamuxubyitsa mbu: «Nitakuoyitse kwa bishando, ni utawete buuma nani.»
Simoni Petero nianamuxubyitsa mbu: «Ninakuwetu, kuli koluli lutyo, utanioyaaho kwa bishando, wetuwe nioye na kwa maboko, na kwa mutwe.»
Yesu nianamubwira mbu: «Yamekinda owa atalirene ikaraba kandi, biri bite abishando biweho, kubwishi amubiri uwe woshe ni akomire. Nemwe mukomire, wetuwe mute mweboshe.» Yesu abaa echi kushe yakendemuhota, kyokyametuma aneena mbu: «Aboshe batakomire.»
Yesu abere ameotola ioyabo abishando, nianaimbala alukimba luwe, nefuluka kwelya biro, nebwirabo mbu: «Mwamemenya akinwa kyonamebakolera? Amuniluka mbu Mwiyisa neri mbu Ninakuwetu, amuneena kuli. Muyaitse, kubwishi koniri nityo. Kubwishi bwekyo, ali ingye, ngye Ninakuwenyu, na Mwiyisa wenyu, namebaoya kwa bishando, imwe nemwe mulirene ioyanya kwa bishando. Ingye namebaha imwe mushinga, munerekola nga konamebakolera. Mwa kuli, anibabwira ku amukotsi ate ye mukulukulu ilengya ninakuwabo, neri andumwa italengitse yamulikaa. Tsene komwamemenyabyo, mukaashanirwa kutsibu mukerekola nga kobibwire.
«Nitanibaahula mweboshe, nichi bonalondolaa. Wetuwe abinwa byobineenwa mwa Maandiko Makomire bilirene ibererera mbu: ‹Yonashangiraa naye amukati, ameba mulenda wani.›»
Tsene anibabwira buxondotsi abinwa byoshe ibi lubere bihike, kwebula mbu mwa mango byendehika ni mwaimirira ku Ingye ngye Iye. Mwa kuli, anibabwira ku kintsi mundu yakokera yanilikaa ni anikokera ignye. Na kintsi mundu yanikokera ni akokera yanilikaa.
Yuta ahota Yesu
(Mat 26:20-25; Mar 14:17-21; Luk 22:21-23)
Yesu abere amekinda ineena abinwa ibyo, nianayongwa kutsibu mwa mwete uwe, niananeena mbu: «Mwa kuli, anibabwira ku muuma mwimwe akanihota.» Abemitsa niabanasinderana, kubwishi batamenyaa ngakuno Yesu aahula inde. Habaa mwimitsa muuma yo Yesu abaa anatsiyira, niasheemere ku Yesu mwa mango babaa abalya. Simoni, yanalukwa kandi mbu ye Petero, nianamukohetsa kwebula mbu abutse Yesu ngakuno aahula inde .
Niyo amwimitsa uyo asheemera ku Yesu nemubutsa mbu: «Ninakuwetu, indeno?»
Yesu nianaxubya mbu: «Nikabobetsa kiche kya mukati. Ula yonikaha akiche ikyo ni yoyo.» Yesu nianabobetsa akiche kya mukati nehakyo Yuta Isikariyote muala wa Simoni. Yuta abere ameotola iangirirakyo, Shitani nianamwingiramo. Yesu nianamubwira mbu: «Kyoxonda ikola, kolakyo chuba!» Hatali kiro na mundu mu bobabaa abalengera kuuma naye, yamenyaa kyokyatumaa Yesu amubwira atyo. Bauma baanikira mbu Yesu amemubwira mbu aende yaule bindu byobalaireko mwa linye, neri aende yaasikye abachene, kubwishi Yuta iye yabaa analanga ashaho ya safaranga.
Mwa mango Yuta abere ametsimba akiche kya mukati, mu kashahalimo nianahuluka hambuwa. Abutuku bwabaa ni bwamekura.
Iteeko lihya
Mwa mango Yuta ahulukaa, Yesu niananeena mbu: «Tsene Muala wa Mundu amehabwa angulu, ne Ongo amehabwa ngulu mwiye. Ne Ongo ali amehabwa ngulu mwiye, Ongo naye ni akaha Muala yo ngulu mwiye yenawene butsira ileama. Mwe bana bani, nikine kuuma nemwe mu kishangi kikeho. Mukanixonda, wetuwe nga konabwiraa aBayahuti, nemwe konikababwira mbu mutangakocha ihika honiya. Nabaha iteeko lihya, mutsiyirane mwenabene ku mwenabene. Nga konabatsiyiraa imwe, nemwe mutsiyirane. Muketsiyirana mwenabene ku mwenabene, niyo abandu boshe bendemenya ku muli bemitsa bani.»
Yesu aneena ku Petero akaiyanaye
Simoni Petero nianabutsa Yesu mbu: «Ninakuwetu, mbeni hayi houya?» Yesu nianamuxubitsa mbu: «Utangakocha inikulikira tsene honiya, wetuwe ukanikulikira inyuma.» Petero nianamubutsa mbu: «Ninakuwetu, tsene, nitangakocha ikukulikira kubwishi bwaki? Ingye niikiritse ihana abuingo bwani kubwishi bwawe!» Yesu nianamuxubitsa mbu: «Mbeni mwa kuli, iwe uikiritse ihana abuingo bwawe kubwishi bwangye?» Mwa kuli, anikubwira mbu: «Buxondotsi axongole ikokobike, ukaba ni wameyiana ingye ngendo ishatu.»
Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.