Skip to content
BibleKenya

Hunde Nouveau Testament

Yohana 12

Mariya ahaka Yesu yo lungo

Kwabere kwashiba biro ndatu buxondotsi bwa Pasaka, Yesu nianaya i Betaniya, kwa wabo Lasaro yo Yesu apfukyaa. Iyo, niabanasheera Yesu yo mbiya yo Marita atekaa. Lasaro abaa muuma mu bobalyaa kwa bilyo kuuma ne Yesu. Niyo Mariya atsimba ngaha ya lungo lwa kichiro kinene, lolukolirwe mu mauwa ma narito1 ikomire. Nianahakalo kwa bishando bya Yesu nekababyabyo mwa mpfiri siwe. Anyumba yoshe niainahumura kushe. Wetuwe Yuta Isikariyote yamuhotaa, muuma wa mwa bemitsa bewe niananeena mbu: «Kubwishi bwaki alungo ulu lutashaluutsibwa tinari maana mashatu neabirato kwa bachene?» Yuta ataneenaa abinwa ibyo kubwishi bwepfira abachene bo bwoncho, wetuwe kubwishi abaa mwitsi. Iye yabaa mulangi wa shaho ya safaranga. Abaa anaitolera ku sosabaa sinahirwamo. Wetuwe Yesu nianaxubyitsa Yuta mbu: «Umulike mu buholo! Amenihaka alungo kubwishi bwa lwire lonendetabwamo. Mukendereba na bachene abiro byoshe, wetuwe ingye mutendereba kuuma nani abiro byoshe.»

Anama ya reita Lasaro

Mubuanano munene wa Bayahuti niabanaumpfao ku Yesu ali i Betaniya. Kubatyo niabanayayo, kute kubwishi bwa Yesu ho, wetuwe kubwishi bwexunga ku Lasaro yo Yesu apfukyaa. Kubatyo, Boshebakungu baya nama yeita Lasaro naye kureba, kubwishi bwaye, Bayahuti bangi batengaa mwa kikanga kyabo, baimirira Yesu.

Yesu aingira i Yerusalemu

(Mat 21:1-11; Mar 11:1-11; Luk 19:28-40)

Bwabere bwakya, mubuanano munene wa bandu bobahikaa mwa lwire lukulu lwa Pasaka baumpfao ku Yesu awicha i Yerusalemu. Aboshe niabanatsimba mangarara neenda imukokera, ni abalaka mu mulenge mule mbu:

«Hosana!

Aashanirwe ula yawicha mwetsina ra Ninakuwetu!

Ongo aashanire amwami we Isiraeri.»

Yesu nianashingana kyana kya punda, nianakambira kukyo, nga kwa Maandiko Makomire mabwire mbu:

«Mutaubahaa mwe becha i Sayuni!

Talola kwa mwami wenyu awicha,

ni akambire ku kyana kya punda.»

Abemitsa bewe batamenya abinwa ibyo kasa, wetuwe Yesu abere amehabwa angulu, niyo baubuka ku abinwa ibyo byaandikwaa kuluenda iye, na batyo kobanamuimiriraa.

Aboshe bobabaa kuuma ne Yesu mwa mango abirangiraa Lasaro kwatenge mwesinda nemupfukya, bapfula amwatsi wa byobalolaako. Kubwishi bwekyo, bandu bangi niabanaya imukokera, kureba babaa bameumpfao ku amekola akalolero ako. aBafarisayo niabanabutsabutsanya mbu: «Mutatsene ku mutangakikochaki? Mutsene kwakihuo kyoshe akimukulikira!»

aBakiriki abaxonda ixunga Yesu

Bakiriki bauma babaa mwa bandu bobahikaa i Yerusalemu kweimanikira Ongo mwa lwire lukulu. Niyo bandu abo baendera Firipo yabaa mwicha i Betesaita ye Ngalilaya. Niabanamubutsa mbu: «Ninakuwetu, atuxonda ixunga Yesu.» Firipo nianaya ibwira Andereya, nenyuma kwaho, ababiri boshe niabanaya ipfulirao Yesu. Yesu nianaxubyitsabo mbu: «Akashangi ko Muala wa Mundu akahabwamo ngulu kameeraho. Mwa kuli, anibabwira ku ambeke ya ngano itabyalirwe mwa lutaka nepfa, itangaerakoki. Wetuwe ni ingaba ikexwikwa mu mutaka nepfa, niyo yaxuka, neerako bipfuma bingi. Ula yatsiyire abuingo buwe endehetsabo. Wetuwe ula yatalaire kubo mwa kihuo muno, uyo ni alangabo ihikira mwa buingo bwa biro byoshe. Amundu ali axonda inikolera, ni anikulikira, kubatyo amukotsi wani akaba honiri. Amundu akenikolera, Tata ni akamupfa xoni.»

Yesu apfula amwatsi wa lupfu luwe

«Tsene, amwete wani ayongirwe, nineeneki? ‹Niheme Tata aniufule mwa kashangi kano› Kubwishi akashangi kano kokatumaa niwicha. Tata, ha retsina rawe ro ngulu!» Amulenge nianaumpfibwa ni atenga mu mbingu mbu: «Nameharo ngulu, nikaharo ngulu kandi.» Abandu bobabaa baimene aho na bobahulikyaa amulengoyo niabanabula mbu: «Uyo shali mulashano!» Na bandi niabananeena mbu: «Uyo shali malaika yameneena naye!» Wetuwe Yesu nianabwirabo mbu: «Amulenge uyo atashaumpfibwa kubwishi bwangye, wetuwe kubwishi bwemwe. Tsene kwonoko, akashangi karechira akihuo kyo lubancha, na mwami wa kihuo kino akaumwa ira mbua. Wetuwe mwa mango nikendekukumwa itenga kwa kihuo kuno, nendekura abandu boshe kwewicha ira mwani. Yesu aneenaa atyo kwebwerekya ngakuno akapfa lupfuki.» Abandu niabanamuxubyitsa mbu: «Itwe twamesoma mwa Muomba ku Kirisitu alirene ibaho abiro byoshe. Unganeenote ku Muala wa Mundu, alirene ikukumwa? Ne Muala wa Munduyo yende?» Yesu nianabwirabo mbu: «Akyaka kiri mwa kati kenyu mu kashangi kake. Mutambe mwa mango mukinawete ku kyaka, kwebula mbu mutaxwikwaa na mutsimya, kubwishi yatamba mu mutsimya atechi haya. Kwikyo, muimirire akyaka mwa kashangi mukinawete kukyo, kwebula mbu mube bandu ba kyaka.»

aBayahuti batinda imirira

Yesu abere ameneena abinwa ibyo, nianaiendera neibisha hale nabo.

Nakiro mbu Yesu akolaa tushingishiro tungi mwa mbere sabo, batamuimirira, kwebula mbu abinwa byamutahwa Isaya aneenaa bibererere mbu:

«Ninakuwetu, inde yaimirire amwatsi wotwapfulaa?

Inde yaxwikulwirwaa amikolere ya maala ma Ninakuwetu?»2

Babaa batangakocha iimirira, nekulikira abinwa byo Ongo abwiraa Isaya kandi mbu:

«Ongo amehumya amesha mabo,

kwebula mbu matalolaa.

Ameira amyete yabo yo mitsibu,

kwebula mbu batanibindukiraa,

nani nitangecheufulabo.»3

Isaya aneenaa abinwa ibi kubwishi axungaa angulu ya Yesu ni iri hale, naye aneenaa kuluenda iye. Bakulukulu bangi ba Bayahuti bobabaaho niabanaimirira Yesu. Wetuwe kubwishi bwa Bafarisayo, batapfulao ku bameimirira. Baubahaa ku bangahentsibwa mwa sinakoki Ibo batsiyiraa ihabwa ngulu na bandu, irengya ihabwa ngulu itengire ira mwa Ongo.

Alubancha lwaretinda iimirira Yesu

Yesu nianalehya amulenge mbu: «Yaniimirire ni ataniimirire ingyeho, wetuwe ni aimirire ula yanilikaa. Yanixunga ni amexunga ku yanilikaa. Ingye namehika mwa kihuo ngakuno kyaka, kwebula mbu mundu woshewoshe yakaniimirira atabaa mu mutsimya. Amundu akehulikya abinwa byani butsira itsimba kubyo, ni ate ngye ngyenikendemuchira lubancha. Kubwishi nitawichaa ichira akihuo kyo lubancha, wetuwe nawichaa kweufulakyo. Ula yanitinda na yataikiritse abinwa byani akachirwa lubancha kwekulikirabyo. Akinwa kyonaneenaa kyokikendemuchira lubancha mwa lwire lwa ntsindiro. Kubwishi nitaneenaa abinwa ibyo mu maala mani ngyenawene. Wetuwe Tata yanilikaa yanikalihyaa abinwa byonilirene ineena neiyisa. Nani nichi ku areteeko liwe linaleta buingo bwa biro byoshe. Kubwishi bwekyo, ingye anineenaho byo Tata amenibwira mbu nineene.»

Source notes (3)
  1. Footnote Narito Muti wanaxoako mauwa mekolamo lungo lwa kichiro kinene.
  2. Footnote Soma Isaya 53:1.
  3. Footnote Soma Isaya 6:10.

Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.