Skip to content
BibleKenya

Hunde Nouveau Testament

Yohana 14

Yesu ye nchira yareya ira mwa Tata

Yesu nianabwira abemitsa bewe mbu: «Mutairirikanaa, mwimirire Ongo, muniimirire nani. Mwa nyumba ya Tata muli mekalo mangi. Luli lute lutyo, nge nitababwirire ku naenda kwebalingiriranyitsa mekalo. Nani nikendeba namemala ibalingiriranyitsa mekalo, ni yonawicha ibabinga kwebula mbu honikaba, nemwe mubeho. Mwichi anchira yoiyire yoniya.»

Tomasi nianamubwira mbu: «Ninakuwetu, tutechi yo uya. Ni yotungamenya anchira yo tute?»

Yesu nianamuxubyitsa mbu: «Ingye, ngye nchira, na kuli na buingo. Hate mundu yangawicha ira mwa Tata atatsukire mwingye. Muli munganimenyire ingye, nge mungamenyire ne Tata. Ihuluka tsene mwamemumenya, nemuxungako.»

Firipo nianamubwira mbu: «Ninakuwetu, utubwerekye Tata, ikyo kitulirene.»

Yesu nianamuxubyitsa mbu: «Firipo, nameba kuuma nemwe akianiro kyoshe, mutanatsamwanimenya neki?» Yamenilolako ingye, ni amelola ku Tata. Younganeena ute mbu: «Utubwerekye Tata?» Mbeni utaimirire kwingye niri mu Tata ne Tata ali mwingye? Abinwa byonibabwira bitabitenga mwingye. Tata yali mwingye yakola amirimo yiwe. Munaniimirira mwa mango naneena kwingye niri mu Tata ne Tata ali mwingye. Luli lute lutyo, ni mwaimirira kubwishi bwa mirimo yanikola. Mwa kuli, anibabwira ku yaniimirire naye endekola amirimo yanikola. Na kandi endekola mirimo ilengyitse yanikola, kubwishi ingye naya ira mwa Tata. Kindu kyoshekyoshe kyomukendehema mwetsina rani, nikendekolakyo, kwebula mbu Tata ahabwe angulu itsukira mwingye, ngye Muala. Muli munganihema kindu kyoshekyoshe mwetsina rani, ni nikakolakyo.

Amanihisa ma Mutima Akomire

«Muli munitsiyire, nge mungatsimbire kwa mateeko mani. Nani ni nikahema Tata mbu abahe undi Muasikya kwebula mbu abe kuuma nemwe abiro byoshe. Uyo ye Mutima wa kuli. Abandu bobatinda Ongo, batangakocha ikokera aMutima uyo, kubwishi batabaxungao na kandi batechio. Wetuwe imwe mwichi aMutima uyo, kubwishi aikere kuuma nemwe, na kandi endeba mwimwe abiro byoshe.

«Nitibasiye mwenabene nga mpfutsi, nendexuba iwicha yomuli. Hanashiba kashangi kake, abandu ba kwa kihuo kino nibatikinixungeko. Wetuwe imwe mukanixungako, kubwishi niriho, nemwe mukabaho. Mo kianiro umo, momwendemenya kwingye niri mu Tata, nemwe muli mwingye, nani niri mwimwe.

«Yaikiritse amateeko mani nekola nga komabwire, iye ni yanitsiyire. Na mundu yanitsiyire ingye, Tata naye ni akamutsiyira. Nani ni nikamutsiyira neibwerekya kwiye.»

Yuta, ni ate Yuta Isikariyote, nianamubutsa mbu: «Ninakuwetu, ukaibwerekya ute wenawene kwitwe, neri kute kwa bandi bandu ba kwa kihuo kino?»

Yesu nianamuxubitsa mbu: «Kintsi mundu yonitsiyire, aketsimba kwa binwa byani, ne Tata ni akamutsiyira. Na kandi ingye ne Tata nitukawicha ira mwe neikala mwiye. Wetuwe mundu woshewoshe yatanitsiyire, uyo atatsimba kwa binwa byani. Na kinwa kyomuhulikya niri anineena, kitakitenga ku ingye, wetuwe akitenga ku Tata yanilikaa.

«Namebabwira abinwa ibi kureba nikinali kuuma nemwe. Wetuwe Amuasikya, ye Mutima Akomire, uyo ye Tata akalika mwetsina rani, akendebaiyisa abinwa byoshe nebaubukya abyoshe byonababwiraa.

«Nabasiira buholo, nabaha abuholo bwani. Imwe nitanibaha abuholo ubo nga kwa kihuo kinakola. Mutairirikanaa neri mutaubahaa. Mwaumpfaa konababwiraa ku naiendera, wetuwe nikafuluka kandi. Muli munganitsiyire, nge mungatsiyire imenya ku naenda ira mwa Tata, kubwishi Tata ye mukulukulu kwingye. Namebabwira abinwa ibi tsene, lubere bipfumbuke, kwebula mbu mwa mango byendepfumbuka ni mwaimirira. Nitikineene nemwe binwa bingi, kubwishi Shitani yaimanire akihuo kino awicha. Wetuwe nakiro lwaba lutyo, iye atawete maala moshemoshe kwingye, wetuwe abandu ba kwa kihuo balirene imenya ku nitsiyire Tata, nani anikola nga ko Tata aniteekaa.

«Mubatuke tutenge hano.»

Hunde Nouveau Testament. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.