उत्पत्ति 31

याकूब उन लाबान उन हाती टु ओळोद

1याकूब उन कीव मा ईद समाचार बत्‍त कि लाबान उन पार बळबुळसोन, “याकूब रा अद सप्‍पा हळपुस बुट्‍टुन, जो नाम आप्‍प उन ईरोद अदिक ईग आव नाम आप्‍प उन धन-संपत्‍ती इन आधार मा परिपुर्ण बनस्‍कु कुरतान.” 2अदिक याकूब लाबान उन चेहरा नोळदुन अदिक व्यव्हार जान्स कोंडुन, कि आव आऊन प्रती पयला अन घाई हैलेच. 3आग यहोवा याकूब से अंदुन, “तान आप्‍प दादागोळ द्‍याश अदिक तान जनम भूमी इक होटोग, अदिक ना नीन सांगुळ ईराईन.”

4आग याकूब राहेल अदिक लियाह अक, मैदान दा तान म्यांडा मर्रगोळ हाती कारसुसकु अंदुन, 5नीम आप्‍प उन चेहरा देल समझ बरतद, कि आव रा नानी पयले अन घाई ईग नोळालुन; लेकीन नान आप्‍प उन परमेश्वर नान सांगुळ आन. 6अदिक नीव भी जान्‍सतीर, कि ना नीम आप्‍प उन स्यावा माळीन. 7तरी भी नीम आप्‍प नान से छल माळकु नान मजदुरी इक हत्‍त घन बदलुस बुट्‍टुन; लेकीन परमेश्वर आऊक नान नुकसान माळ गोटीदील. 8याग नीन आप्‍प अंदुन, चिट्टीवाळा पाड्‍डागोळ नीन मजदुरी आदव, आग सप्‍पा मर्र, म्यांडागोळ चिट्टीवाळा अच हाळुली कुरतव, अदिक याग आव अंदुन, धारीवाळा पाड्‍डा नीन मजदुरी ठहरूसेव, आग सप्‍पा मर्र म्यांडागोळ धारीवाळा हाळुली कुरतव. 9ईद रीति देल परमेश्वर नीम आप्‍प उन जनावर हुडुकु नानी कोट्‍ट बुट्‍टुन.

10मर्र म्यांडागोळ्‍द गाबन आगा समय ना कांसा दा येन नोळदीन, कि जो व्हात मर्रगोळ मा येरव, अव धारीवाळा, चिट्टीवाळा, अदिक धब्‍बावाळा हूँ. 11आग परमेश्वर उन दूत कांसा दा नान से अंदुन, “हे याकूब,” ना अंदीन, “येन आग्‍या.” 12आव अंदुन, “कण्‍ण नेगुकु आ सप्‍पा व्हातगोळी जो मर्रगोळ मा येरीत्‍याव, नोळ, कि अव धारीवाळा, चिट्टीवाळा, अदिक धब्‍बावाळा हूँ; यतिकी जो येनारा लाबान नीन से माळतान, अद ना नोळीन. 13ना आ बेतेल इन परमेश्वर हुईन, येल नी ऊंद कल्ल इन खंबा मा याण्‍णा हाक्‍क कोंडीद अदिक नांद मन्नत मानसीद. ईग नी, ई द्‍याश टु होटकु तान जनम भूमी इक होटोग.”1

14आग राहेल अदिक लियाह आऊन से अंदुर, “येन नाम आप्‍प उन मान्‍या ईग भी नाम येनारा भाग या अंश मिक्‍कु आद? 15येन नाव आऊन नजर दा पराया ईला ठहरूसेव? नोळ, आव रा नामी मार्र कोंडुन, अदिक नाम पैस्यागोळ इक तिनकु कुरतान. 16इदुरसाटी परमेश्वर नाम आप्‍प उन याट धन ताकोम कोंडान, अद नाम्‍द, अदिक नाम चिकोर्द हुन; ईग जो येनारा परमेश्वर नीन से अंदान, अदा माळ.”

17आग याकूब तान चिकोरी अदिक तान हिंग्‍सुरी ऊँटगोळ मा कुर्सदुन; 18अदिक यास जनावरगोळ इक जो पद्‍दनराम दा जमा माळकु धनवान आगीदुन, आ सप्‍पा अक कनान दा तान आप्‍प इसहाक उन हाती होगोद इच्‍छा देल, सांगुळ ओतुन. 19लाबान रा तान म्यांडा अन चुट्टीगोळ कडोर साटी होटोगीदुन, अदिक राहेल तान आप्‍प उन मान्‍यागोळ द्यावगोळी कदुकु ओतुन. 20अत: याकूब लाबान अरामी इन हाती काळ्‍लपणी देल होटोदुन, अदिक आऊक हेळीदिल कि ना ओळेतीन. 21आव तान सप्‍पा येनारा हुडुकु ओळदुन, अदिक महानदी2 इन आप्पाटी ईळुकु तान बाय गिलाद इन पहाळी‍ द्‍याश दी माळदुन.

लाबान उन द्वारा याकूब उन पीछा माळोद

22तीसरा दिशी लाबान उक समाचार सिक्‍त कि याकूब ओळेग्‍यान. 23इदुरसाटी आव तान वार्टगोळ सांगुळ आऊन येळ दिन ताका पीछा माळदुन, अदिक गिलाद इन पहाळी द्‍याश दा आऊक होगकु मिलुसदुन. 24आग परमेश्वर ईळ्‍ल्‍क इन कांसा दा अरामी लाबान उन हाती होगकु अंदुन, “सावधान ईर, नी याकूब से न रा भला अनेत अदिक न बुरा.” 25याकूब उन ड्‍यारा गिलाद हेसुर इन पहाळी द्‍याश दा निदरूसकु बिदकु ईरोद; अदिक लाबान भी तान वार्ट उन सांगुळ तान ड्‍यारा अदा पहाळी द्‍याश दा नीदरूसदुन.

26आग लाबान याकूब से अनली कुरतुन, “नी ईद येन माळ्‍द, कि नान हाती टु काळ्‍लपनी देल होटबंद, अदिक नान पोरगोळी हिंग तनकोंड, ह्‍यांग यावारा तलवार इन ताकत देल बंदी माळकु आगीदार? 27नी यती होचकुमकु ओळकु बंद, अदिक नान से बिना येनु अनकु नान हाती टु काळ्‍लपनी देल होटबंद; ना रा नीनी आनन्‍द इन सांगुळ टापटी अदिक विणा मुर्सतेला, अदिक हाळ हाळतेला सार माळायदीन? 28नी रा नानी तान पोर-पारगोळी भी चुम्‍स गोटीदील? नी ईद मुर्खता माळ्‍द. 29नीम लॉकुर्द नुकसान माळोद ताकत नान कय दा रा आद; लेकीन नीम आप्प उन परमेश्वर नान से होत आ ईळ्लकी अंदुन, ‘सावधान! नी याकूब से येनु बुरा भला अनबाळेत.’ 30वळ्लीद आद, नीनी तान आप्‍प उन हाती ईरोद इच्‍छा आद, मान्‍स कोंडीन; लेकीन येन जरवत ईरोद नीमी नान मान्यागोळोव द्यावगोळी कदोद?”

31आग याकूब लाबान उक उत्‍तर कोट्‍टुन, “ना ईद सोचकु अंजेगीदिन, कि नी नान से तान पोरगोळी कसु कोमाईद. 32यार हाती भी नी तान द्‍यावगोळी नोळ्‍या, आव जीत्‍ता ईरतीदील. नान हाती नींद जो येनारा भी होट्‍टीत, अदरी वार्टुर मुंद अरूकु हुडुकोम.” यतिकी याकूब ईला जानसोन कि राहेल मान्‍यागोळोव द्यावगोळी कदुकु तंदार.

33ईद केळकु लाबान, याकूब अदिक लियाह अदिक येढ्‍ढु दासीगोळ ड्‍यारा दा होदुन; अदिक येनु सिकीदिल. आग लियाह अन ड्‍यारा दा टु होटकु राहेल इन ड्‍यारा दा होदुन. 34राहेल रा मान्‍यागोळ द्यावगोळी ऊँट इन जीन मा ईटकु अदुर्द बेन मा कुर्तकु ईरोर. लाबान आकिन पुरा ड्‍यारा दा नोळदुर मा भी सीकिदील. 35राहेल तान आप्‍प उन से अंदुर, “हे नान प्रभु; नी सिट्‍टी बरबाळ. ना नीन हाती नीदरा लायक हैलेच; यतिकी ना ई समय व्‍हार्या आगीन.” आग लाबान उन ढुंढस्‍दुर मा भी आऊक अव मान्‍यागोळोव द्यावगोळ सिक सकीदील.

36आग याकूब सिट्‍टी बंदकु लाबान से झगळा माळली कुरतुन, अदिक आऊन से अंदुन, “नांद येन अपराध आद?” नांद येन पाप आद, कि नी ईट सिट्‍टी बंदकु नांद पीछा माळ्‍द? 37नी जो नांद पुरा सामान इक ढुंढस्‍कु नोळ्‍द, रा नीनी नीन मान्‍यागोळ्‍द सामान दा टु येन सिक्‍त? येनारा सिकीदाद रा अदरी ईल नान अदिक तान वार्टुर्द मुंद ईट बुळ, अदिक आंदुर नाम येढ्‍ढु बीच दा न्‍याय माळुल. 38ई ईप्‍पत वर्षगोळ टु ना नीन हाती ईत्‍तीन; इटुर दा रा ना नीन मर्र म्यांडागोळ्‍द गर्भ ईळुत, अदिक न नीन म्यांडागोळ मास ना यागलु तिनदीदील. 39यवरी आळी दाकळव जनावरगोळ कोन्‍नोव अवरी ना नीन हाती तरतोगीन, अऊर्द नुकसान नाच नेगुतोगीन; बाक हागुलीन वती चोरी आगोद या ईळ्‍ल्‍क इन वती, नी नान से अच अऊर नुकसान ताकोमतोग्‍या. 40नांद रा ईद दशा ईरोद कि हागुल इन वती पसीना अदिक ईळ्‍ल्‍क इन वती सोळ नानी तीन कोम्‍त; अदिक जप नान कण्‍णगोळ दा टु ओळेगोद. 41ईप्‍पत वर्ष ताका ना नीन मान्‍या ईत्‍तीन; चौदह वर्ष रा ना नीन येढ्‍ढु पोरगोळ साटी नींद स्यावा माळदीन अदिक आर वर्ष नीन मर्र म्यांडागोळ साटी, अदिक नी नान मजदुरी इक हत्‍त घन बदलुस बुट्‍ट. 42“नान आप्‍प उन परमेश्वर मतलब अब्राहम उन परमेश्वर, यार्द अंज्क इसहाक भी ईटतान, अगर नान दी ईला ईरायदुन, रा सही दा नी ईग नानी खाली कय होग गोळाईद. नान दुख अदिक नान कय इन मेहनत नोळकु परमेश्वर होत आ ईळ्‍ल्‍की नान मा चिल्‍ळासदुन.”

याकूब अदिक लाबान उन बीच समझौता

43ईद मात केळकु लाबान याकूब उक ईद उत्‍तर कोट्‍टुन, “ई आर्तेर नान पोरगोळ हुळ, ई चिकोर नान चिकोर हुळ, ई मर्र म्यांडा भी नानव अच हूँ अदिक जो येनारा नीनी कांळ्सीत्‍याद, अद नांद अच हुन; लेकीन ईग ना तान पोरगोळ अदिक ई चिकोर्द येन माळाईन, जो ईंदुर्द औलाद हुन? 44ईग बा, ना अदिक नी येढ्‍ढु मुंदुर आपस दा वादा माळाता, अदिक अद नींद अदिक नान बीच दा कसम ठहरूसकु ईरूल.”

45आग याकूब ऊंद कल्‍ल हुडुकु अदुर्द ऊंद खंबा नीदरूसदुन. 46आग याकूब तान लॉकुर से अंदुन, “कल्‍लगोळ जमा माळी,” ईद केळकु आंदुर कल्‍लगोळ जमा माळकु ऊंद ढेर हचदुर अदिक अदा ढेर इन हाती आंदुर ऊंडुर. 47आ ढग इन हेसुर लाबान रा यज्र सहादूधा3 ईटदुन, लेकीन याकूब गिलियाद4 ईटदुन. 48लाबान अंदुन, “ईद ढेर ईंद टु नीन अदिक नान बीच दा कसम ईत्‍तीत.” ईद कारण अदुर हेसुर गिलियाद ईटकु आत, 49अदिक मिस्पा भी; यतिकी आव अंदुन, “याग नाव आबुर दाबुर से दूर ईत्‍तेव आग यहोवा नांद अदिक नींद देखभाल माळतेला ईरूल. 50अगर नी नान पोरगोळी दुख कोट्या, या आंदुर सिवाय अदिक आर्तेर सांगुळ मदा माळ्‍या, रा नाम सांगुळ याऊ मंळसा रा ईरतीदील; लेकीन नोळ नीन अदिक नान बीच दा परमेश्वर गवाह ईत्‍तान.” 51बाक लाबान याकूब से अंदुन, “ई ढेर इक नोळ अदिक ई कल्ल इन खंबा अक भी नोळ, यारी ना तान अदिक नीन बीच दा नीदरूस्‍यान. 52ईद ढेर अदिक ईद खंबा येढ्‍ढु ई मात इन गवाह ईरूल कि नुकसान माळोद इच्‍छा देल न रा ना ई ढेर इक नाहाकुसकु नीन हाती होगाईन, न रा नी ई ढेर अदिक ईद कल्ल इन खंबा अक नाहाकुसकु नान हाती बंद्‍या. 53अब्राहम अदिक नाहोर अदिक आंदुरव आप्‍प; मुरू मुंदुरव जो परमेश्वर आन, आवा नाम येढ्‍ढु मुंदुर बीच दा न्‍याय माळुल.” आग याकूब आऊन कसम तिंदुन यार्द अंज्‍क आऊन आप्‍प इसहाक ईटतोगोन. 54अदिक याकूब आ पहाळी मा ऊंद जनावर इक हुळकु बलि येर्सदुन, अदिक तान वार्टुरी ऊमोद तीन्‍सदुन, आग आंदुर भोजन माळकु पहाळी मा ईळ्‍ल्‍क कळदुर. 55व्‍हातर्याका लाबान येद्‍दुन, अदिक तान पोर पारगोळी चुम्‍सकु अदिक आशीर्वाद कोटकु होट्‍टुन अदिक तान जागा अक वापस होट्‍ट बंदुन.