उत्पत्ति 30

1याग राहेल ईद नोळदुर कि याकूब उन साटी आकिन द्वारा यारू चिकोर आगीदील, रा आकी तान आकतींग से नफरत पैदा आगेत. आक याकूब से झगळा माळली कुरतुर कि, “नानी चिग्‍द कोळ, ईलारा ना सोतोगाईन!”

2आग याकूब राहेल से सिट्‍ट देल चिळ्‍लासदुन अदिक अंदुन, “येन ना परमेश्वर उन जागा मा आईन कि ना नींद बंद कोख खोल्‍स सकाईन?”

3ईद केळकु आक अंदुर, “रा नान दासी बिल्हा अन हात्‍ती होग, ताकी आकिन द्वारा ना मोय बनसाईन.” 4इदुरसाटी राहेल याकूब उक तान दासी बिल्हा अक हिंग्‍स उन रूप दा कोट्‍ट बुट्‍टुर, अदिक याकूब बिल्हा अन सांगुळ वैवाहिक संबंध माळदुन. 5बिल्हा व्‍हाट्‍यादी ईत्‍तुर अदिक आकी याकूब से ऊंद पार पैदा आदुन. 6आग राहेल अंदुर, “परमेश्वर नांद न्‍याय माळदुन अदिक नांद दुहाई केळदुन अदिक नानी पार कोट्‍टुन.” आक आऊन हेसुर दान1 ईटदुर. 7बाक राहेल इन दासी बिल्हा मात्त व्‍हाट्‍यादी ईत्‍तुर अदिक आक याकूब से दुसरा पार उक पैदा माळदुर. 8आग राहेल अंदुर, “ना तान आकतींग इन सांगुळ हापाळ मेहनत माळीन अदिक ईग ना जीकेसेगीन.” इदुरसाटी ई पार उन हेसुर नप्ताली2 ईटकु आत.

9याग लियाह नोळदुर कि आकिन अदिक चिकोर आगोद थामसेग्‍याद, आग आक तान दासी जिल्‍पा अक याकूब उक हिंग्‍स उन रूप दा कोट्‍ट बुट्‍टुर. 10लियाह अन दासी जिल्‍पा याकूब देल ऊंद पार उक जनम कोट्‍टुर. 11लियाह सोचदुर, “ह्‍यांग धन्‍यता आद ईद!” इदुरसाटी आ पार उन हेसुर गाद3 ईटदुर. 12लियाह अन दासी जिल्‍पा याकूब से दुसरा पार उक पैदा माळदुर. 13आग लियाह सोचदुर, “ना धन्‍य आईन अदिक आर्तेर नानी धन्‍य अंदार.” इदुरसाटी ई पार उन हेसुर आशेर ईटदुर.

14केई दा गोदी इन कटाई इन समय रूबेन याग केई दा होदुन आऊक अल येनारा व्‍हाट्‍यादी माळावाळा काय सिकदव, अवरी आव तान मोय लियाह अन हाती तंदुन. राहेल लियाह से अंदुर, “नानी भी थ्‍वाळासा दूदाफल कोट बुळ.”

15लियाह राहेल से अंदुर, “येन ईद काफी हैलेच कि नी नान से नान गांड कसु कोंड? अदिक ईग नान पार उन तंदव दूदाफल भी हुडोद चाहसत्‍या?”

आग राहेल आकिन से अंदुर, “अगर नी नानी ईद मार्र कोट्या, रा ना ईंद इन ईळ्‍ल्‍क नीनी याकूब उन सांगुळ ईरोद इजाजत कोळाईन.”

16याग द्‍यावगा याकूब केई दा टु बंदुन आग लियाह याकूब से अंदुर, “ना नीन साटी तान पार द्वारा तंद दूदाफल इक कोटकु नीनी कोंड कोंडीन.”

17परमेश्वर लियाह से केळदुन. आक व्‍हाट्‍यादी ईत्‍तुर अदिक याकूब उक पाचवा पार कोट्‍टुर. 18ईदुर मा लियाह अंदुर कि, “परमेश्वर नानी नान मजदुरी कोट्‍टुन यतिकी ना तान दासी इक तान गांड उक कोट्‍टीन.” अदिक इदुरसाटी आऊन हेसुर इस्साकार4 ईटदुर. 19बाक लियाह मात्त व्‍हाट्‍यादी ईत्तुर. आक याकूब से छटवा पार उक जनम कोट्‍टुर. 20आग लियाह अंदुर, “परमेश्वर नानी वळ्‍लीद दान कोटान; ई घनी नान गांड नान सांगुळ बन्सकु ईत्‍तान, यतिकी ना आऊक आर चिकोर कोटीन” अदिक इदुरसाटी आ पार उन हेसुर जबूलून5 ईटदुर. 21बाक येनारा समय इन बाद्‍दा लियाह अक ऊंद पोर आदुर, आकिन हेसुर दीना ईटदुर.

22ईदुर बाद्‍दा परमेश्वर राहेल मा दया माळदुन. परमेश्वर राहेल उन प्रार्थना केळदुन अदिक आकी व्‍हाट्‍यादी ईरोर साटी समक्ष माळदुन. 23आकी ऊंद पार आदुन, अदिक आक अंदुर, “परमेश्वर नांद कलंक मिटुस बुट्‍टुन.” 24ईद अनतेला आऊक यूसुफ6 हेसुर कोट्‍टुर, “परमेश्वर यहोवा नानी ऊंद पार अदिक कोट्‍टान.”

याकूब उन लाबान उन सांगुळ समझौता

25याग राहेल से यूसुफ पैदा आदुन, आग याकूब लाबान से अंदुन, “नानी सार माळ कि ना तान द्‍याश अदिक तान जागा अक वापस होगाईन. 26नान हिंग्‍सुर अदिक नानोर चिकोर, यार साटी ना नींद स्यावा माळदीन, आंदरी नानी कोळ कि ना होटोगाईन; नी रा जान्सत्या कि ना नींद ह्‍यांग स्यावा माळीन.”

27लाबान आऊन से अंदुन, “यहोवा अन दी टु नानी ईद मालुम आग्‍याद, कि नानी जो अनुग्रह सिक्‍याद, अद नींद अच कारण सिक्‍याद. इदुरसाटी नी नान से नाराज हैलेच, रा नी नान मान्‍या अच ईर.” 28लाबान अंदुन, “स्यावा अन बदला नी येन चाहसत्‍या ना नीनी अदा कोळाईन.”

29लेकीन याकूब लाबान से अंदुन, “ना नीन स्यावा ह्‍यांग माळीन, ईद मात नीन से होचकोमकु हैलेच, अदिक नीन जनावरगोळ्‍द भी देखरेख ना ह्‍यांग माळीन. 30पयले जनावरगोळ कम ईरव लेकीन ईग हापाळ आगेग्‍याव. ना जो भी क्‍याल्‍सा माळीन, अदुर दा यहोवा आशीष कोटान. लेकीन ईग ना तान घराना अन बारा दा सोचोद चाहसतीन.”

31आग लाबान केळदुन, “नींद मजदूरी येन ईत्‍तीत?”

याकूब अंदुन, “नी नानी येनु कोळबाळ. लेकीन, नी चाहास्‍या रा नीन जनावरगोळ्‍द आळसोद अदिक देखभाल माळतेला ईराइन: 32ईंद ना नीन म्यांडा मर्रगोळ बीच दा टु आगकु होळाईन, अदिक जो म्यांडा या मर्र चिट्टीवाळा या चितकबरी ईत्‍तीत, अदिक जो म्यांडा करीद ईतीदाद, अदिक जो मर्र चितकबरी अदिक चिट्टीवाळा ईतीदाद, अवरी ना अलग माळकु ईटाईन; अदिक नान मजदूरी दा अव अच ठहरूस्‍याव. 33अदिक याग मुंद नान मजदूरी इन चर्चा नीन मुंद नळदीत, आग धर्म इन ईद गवाही आदीत; मतलब मर्रगोळ दा टु जो यातोदारा न चिट्टीवाळा न चितकबरी ईरूल, अदिक म्यांडागोळ दा टु जो करीद ईला ईरूल, अगर नान हाती होळतद रा काळ्लपनी इन ठहरूसीत.”

34आग लाबान अंदुन, “ठीक आद नी ह्‍यांग चाहसत्‍या हांग अच माळ.” 35अत: आव अदा दिशी सप्‍पा धारीवाळा अदिक चितकबरे व्‍हातगोळ, अदिक सप्‍पा चिट्टीवाळा अदिक चितकबरी मर्रगोळी, मतलब अऊर दा थ्‍वाळासा चमकदार ईरोद, अवरी अदिक सप्‍पा करेव म्यांडागोळ इक भी अलग माळकु तान पार उन कय दा सौप्स बुट्‍टुन. 36आग आव तान अदिक याकूब उन बीच दा मुर दिन इन यात्रा अन दुरी माळ कोंडुन. ईग याकूब लाबान उन मीकदव म्यांडा मर्रगोळ्द झुंड इक आळस्ली कुरतुन.

37येनारा समय इन बाद्‍दा याकूब चिनार, बादाम अदिक अर्मोन इन मार्र इन डगालगोळ हुडुकु अऊर्द स्‍याक्‍का छिल्‍सकु अऊर मा बिळीद धारगोळ माळदुन ईदुर देल आ डगालगोळ बुळ्‍क बिळीद भाग कांळ्सली कुर्त. 38बाक याकूब ई छळीगोळ इक डोंगीगोळ दा सजुस बुट्‍टुन, येल म्यांडागोळ नीर कुडुतोगोव, आग आव मर्रगोळ गाबन आदव, 39अदिक याग पाड्‍डा आगतोगोव रा अव धारीयुक्‍त, चित्‍तीयुक्‍त या धब्‍बायुक्‍त आगतोगोव.

40याकूब अवरी अलग माळतोगोन, अदिक लाबान उन म्यांडा मर्रगोळ बाय इक चिट्टीवाळा अदिक सप्‍पा करेव पाड्‍डा दी माळ कोंडुन; अदिक तान झुंडगोळी अऊर से अलग ईटदुन, अदिक लाबान उन म्यांडा मर्रगोळ से सीक गोटीदील.

41अदिक याग याग ताकतवर म्यांडा मर्रगोळ गाबन आगतोगोव, आग आग याकूब आ छळीगोळी कठौता दा अऊर मुंद ईट बुळतोगोन; यदुर देल अव छळीगोळ इक नोळतेला अच गाबन आगेगुल. 42लेकीन याग अऊर सांगुळ निर्बल म्यांडागोळ ईरतोगोव, आग आव अव छळीगोळ अऊर हाती ईला ईटतोगोन. परिणाम स्‍वरूप सप्‍पा कमजोर म्यांडागोळ लाबान उन सशक्‍त म्यांडा याकूब उन पक्ष दा होट बरतोगोव. 43इदुरसाटी याकूब हापाळ धनवान आगेदुन, आऊन हाती हापाळ म्यांडा मर्रगोळ दास दासीगोळ ऊँट अदिक गधा भी ईरव.