परमेश्वर उन वचन
उत्पत्ति 29
याकूब उन लाबान से सिकोद
बाक याकूब तान हादी हुळदुन, अदिक पूर्वियों अन द्याश दा बंदुन. अदिक आव येन नोळदुन कि, मैदान दा ऊंद भाय आद, अदिक अदुर हाती म्यांडा मर्र इन मुर झुंड कुर्तकु आव; यतिकी जो कल्ल आ भाय इन बाय मा ईटकु ईरतोगोद, यदुर दा टु झुंडगोळी नीर कुळ्सकु आगतोगोद, अद भारी ईरोद. अदिक याग सप्पा झुंड अल जमा आगतोगोव आग चरवाहगोळ आ कल्ल इक भाय इन बाय मा टु सरकुसकु म्यांडा मर्रगोळी नीर कुळ्सतोगोर, अदिक बाक कल्ल इक भाय इन बाय मा हांग च्या हांगा ईटतोगोर.
अत: याकूब चरवाहागोळ से केळदुन, “हे नान वार्टुरा, नीव येलेर हुईर?”
आंदुर अंदुर, “नाव हारान इन नोर हुयेव.”
आग आव आंदुर से केळदुन, “येन नीव नाहोर उन नातु लाबान उक जान्सतीर?”
आंदुर अंदुर, “हव, नाव आऊक जान्सतेव.”
बाक आव आंदुर से केळदुन, “येन आव सुरक्षित आन?”
आंदुर अंदुर, “हव, सुरक्षित आन अदिक नोळ, आऊन पोर राहेल म्यांडा मर्र इक हुडुकु बरेत्यार.”
आव अंदुन, “नोळ, ईगल्या रा द्याव होगली आद बाक ईट जल्दी म्यांडा मर्रगोळ इक यती जमा माळेतीर, ईगल्या अवरी नीर कुळ्सकु आळगोळी.”
लेकीन आंदुर अंदुर, “ईला, सप्पा म्यांडा मर्रगोळ ऊंद सांगुळ बंदुर मा अच भाय टु कल्ल हटुसकु म्यांडा मर्रगोळ इक नीर कुळ्सकु आगतद.”
आंदुर्द ईद मातचीत आगोद, कि राहेल जो जनावर आळ्सतोगोर, तान आप्प उन म्यांडा मर्रगोळी हुडुकु बंदुर. तान मामा लाबान इन पोर राहेल इक, अदिक आऊन म्यांडा मर्रगोळी भी नोळकु याकूब उन हाती होगकु भाय इन बाय मा टु कल्ल इक सरकुसकु तान मामा लाबान उन म्यांडा मर्रगोळी नीर कुळ्सदुर. आग याकूब राहेल उक चुम्सदुन, अदिक धोळ्द आवाज देल वर्लदुन. अदिक याकूब राहेल इक हेळ बुट्टुन, कि ना नीन फुफेरा वार्ट हुईन, मतलब रिबका अन पार हुईन.
आग आक ओळकु होदुर अदिक तान आप्प उक हेळदुर. तान भास्या अन समाचार केळतेला अच लाबान आऊन से भेंट माळोर साटी ओळदुन, अदिक आऊक छिना देल हचकु चुम्सदुन, बाक तान मान्या तंदुन. अदिक याकूब लाबान से तान सप्पा हालचाल हेळदुन. आग लाबान याकूब से अंदुर, “नी रा सही दा नान येलु अदिक मास हुय.”अदिक याकूब ऊंद तींगुळ ताका आऊन सांगुळ ईत्तुन.
याकूब उन राहेल अदिक लिआ अन साटी स्यावा माळोद
आग लाबान याकूब से अंदुन, “इदुरसाटी कि नान रिश्तेदार हुय, ईद वळ्लीद हैलेच, कि नी नान साटी बीना पैस्या देल क्याल्सा माळ्या इदुरसाटी नी पैस्या ताकोमकु क्याल्सा माळेत?” लाबान उन येढ्ढ पोरगोळ ईरोर. धोळ पोर इन हेसुर लियाह अदिक स्याण पोर इन हेसुर राहेल ईरोद. लियाह अन कण्णगोळ धुंधला ईरव लेकीन राहेल रूपवान अदिक सुंदर ईरोर.
याकूब राहेल इक प्रेम माळली कुरतुन, याकूब लाबान से अंदुन, “नीन स्याण पोर राहेल इक पाऊसोर साटी ना येळ वर्ष नीन स्यावा माळोरसाटी तैयार आईन.”
लाबान अंदुन, “आकी पराया गंळ्स उक कोळदुर देल नीन इक कोळोद वळ्लीद आदीत; नी ईल्या नाम सांगुळ ईर.” इदुरसाटी याकूब राहेल इक पाऊसोर साटी येळ वर्ष स्यावा माळदुन. लेकीन आऊक ईद समय हापाळ कम हत्त यतिकी आव राहेल से हापाळ प्रेम माळतोगोन.
बाक याकूब लाबान से अंदुन, “येळ वर्ष आगेदव ईग नीन पोर राहेल नानी कोळ ताकी नांद मदा आगेगुल.” लाबान तान समाज इन लॉकुरी कारसुसकु सप्पा मुंदरी मदा अन्द जेवन तीन्सदुन. द्यावगा आव तान पोर लियाह अक याकूब उक कोट्ट बुट्टुन अदिक याकूब आकिन सांगुळ मदा माळदुन. लाबान तान दासी जिल्पा अक भी लियाह अक आकिन दासी आगोर साटी कोट्ट बुट्टुन. याग याकूब उक मालुम आत कि आक रा लियाह ईरोर! याकूब लाबान से केळदुन, “ईद येन माळ्द नी नान सांगुळ? ना नीन स्यावा राहेल इन साटी माळीन? बाक नी नान सांगुळ ईत्ता ध्वाका यती माळ्द?”
लाबान अंदुन, “नाम समाज दा धोड्डेर पोर बिटकु स्याण पोर इन मदा माळ सकालुर.” “ईद हप्ता रा पुरा माळ; बाक दुसरा भी नीनी आ स्यावा साटी सीक्यार जो नी नान सांगुळ ईतकु अदिक येळ वर्ष ताका माळ्या.”
याकूब हिंगा माळदुन, अदिक लियाह अन हप्ता पुरा माळदुन; आग लाबान आऊक तान पोर राहेल भी कोट्टुन, कि आक आऊन हिंग्स आगुल. लाबान तान पोर राहेल इन दासी आगोर साटी तान दासी बिल्हा अक कोट्ट बुट्टुन. आग याकूब राहेल इन हाती भी होदुन, अदिक आकिन प्रेम लियाह से येक्कुल आकिन मा अच आत, अदिक आव लाबान उन सांगुळ ईतकु येळ वर्ष अदिक स्यावा माळदुन.
याकूब उन औलाद
याग यहोवा नोळदुन कि लियाह अप्रिय आदुर, आग आव आकिन कोख खोल्सदुन, लेकीन राहेल बाँझ ईत्तुर. अत: लियाह व्हाट्यादी ईत्तुर, अदिक आकिन से ऊंद पार पैदा आदुन, अदिक आक ईद अनकु आऊन हेसुर रूबेन ईटदुर, “यहोवा नान दुख मा नजर माळदुन, ईग नान गांड नान से प्रेम ईट्यान.” बाक लियाह अक अदिक ऊंद पार आत. आक अंदुर, “यतिकी यहोवा ईद केळ कोंडुन कि ना तान गांड उक पसंद हैलेच अदिक नानी ईद ऊंद अदिक पार कोट्टुन.”आक आऊन हेसुर शिमोन1 ईटदुर. लियाह मात्त व्हाट्यादी ईत्तुर याग आकी पार पैदा आदुन आग आक अंदुर, “ईग नान गांड नान से जुळसेदान यतिकी ना आऊन मुर पारगोळी जनम कोटीन.” इदुरसाटी लियाह तीसरा पार उन हेसुर लेवी ईटदुर. आक अदिक ऊंद पार उक जनम कोट्टुर, “ईग ना यहोवा अन स्तुति माळाईन,” इदुरसाटी आक आ पार उन हेसुर यहूदा ईटदुर. अदुर बाद्दा लियाह अक चिकोर आगोद बंद आगेत.
Source notes (1)
- Footnote केळावाळा
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.