उत्पत्ति 32

एसाव उन से मिलुसोद तयारी

1याकूब भी तान हादी हुळदुन अदिक परमेश्वर उन दूत आऊक बंदकु सिकदुर. 2आंदरी नोळतेला अच याकूब अंदुन, “ईद रा परमेश्वर उन दल हुन.”इदुरसाटी आव आ जागा अन हेसुर महनैम1 ईटदुन.

3आग याकूब सेईर द्‍याश दा, मतलब एदोम द्‍याश दा, तान वार्ट एसाव उन हाती तान मुंद ऊंद खबरीगोळ इक कळुदुन. 4अदिक आव आंदरी आग्‍या कोट्‍टुन, “नान प्रभु एसाव से ईद अनेत; कि नीन दास याकूब नीन से ईद अनतान, कि ना लाबान उन मान्‍या परदेशी आगकु ईगासताका ईत्‍तीन; 5अदिक नान हाती वस्‍ता-गोसी, गधा, मर्र-म्यांडा, अदिक दास-दासीगोळ आर अदिक ना तान प्रभु उन हाती इदुरसाटी बातणी कळीन कि नीन अनुग्रह अन नजर नान मा ईरूल.”

6आ खबरीगोळ याकूब उन हाती वापस बंदकु अनली कुरतुर, “नाव नीन वार्ट एसाव उन हाती होगीदेव, अदिक आव भी नीन सांगुळ मुलाकात माळोर साटी नाक सौ लॉकुर सांगुळ बरेत्‍यान.” 7आग याकूब हापाळ अंजेदुन, अदिक संकट दा बिदोदुन: अदिक ईद सोचकु, तान साथीगोळ सांगुळ, मर्र म्यांडागोळ, अदिक वस्‍ता गोसीगोळ, अदिक ऊँटगोळ भी अलग अलग माळकु येढ्‍ढ दल माळदुन, 8कि अगर एसाव बंदकु पयला दल इक बडोद चालु माळ्‍यान, रा दुसरा दल ओळकु ऊळदोदीत.

9बाक याकूब अंदुन, “हे यहोवा, हे नान आजा अब्राहम उन परमेश्वर, हे नान आप्‍प इसहाक उन परमेश्वर, नी रा नान से अंदिद कि तान द्‍याश अदिक जनम भूमी दा वापस होटोग, अदिक ना नींद भलाई माळाईन: 10नी जो जो क्‍याल्‍सा तान करूणा अदिक सच्‍चाई देल तान दास इन सांगुळ माळ्‍या, कि ना जो तान छळी इक अच हुडुकु यरदन गांगा इन आप्पाटी ईळदीन, अदिक ईग नानव येढ्‍ढ दल आगेग्‍याव, नी ईत्‍ता ईत्‍ता क्‍याल्‍सा दा टु ऊंद इन भी लायक रा हैलेच. 11नान विनती केळकु नान वार्ट एसाव उन कय देल नानी ऊळ्‍स ना रा आऊन से अंजतीन, यागलु हिंग आग बाळुल कि आव बंदकु नानी अदिक मोय इन सांगुळ चिकोरी भी कोंद कोमुल. 12नी रा अंद्‍या, कि ना सही दा नीन भलाई माळाईन, अदिक नीन वंश इक समुद्र अन धुळाकणगोळ घाई हापाळ वाळुसाईन, जो हापाळ संख्‍या अन कारण आळुकु आगतीदील.”2

13आव आ दिन इन ईळ्‍ल्‍क अल्‍या ईत्‍तुन; अदिक जो येनारा आऊन हाती ईरोद अदुर दा टु तान वार्ट एसाव उक भेंट कोळोर साटी छाट्‍स छाट्‍सकु तेगदुन; 14मतलब येढ्‍ढ सौ मर्रगोळ, अदिक ईप्‍पत व्‍हातगोळ, अदिक येढ्‍ढ सौ म्यांडागोळ, अदिक ईप्‍पत म्यांडा, 15अदिक पाड्डागोळ सांगुळ हाल कोळावाळा तीस ऊँटनीगोळी, अदिक चालीस गोसी, अदिक हत्‍त वस्‍ता, अदिक ईप्‍पत गधागोळी अदिक अदुरव ईप्‍पत पाड्‍डा. 16ईवरी आव झुंड माळकु, तान दासगोळी कोटकु आंदुर से अंदुन, “नान मुंद होगी; अदिक झुंडगोळ बीच दा अंतर ईटी.” 17बाक आव दुसरा झुंडवाळा अक ईद आग्‍या कोट्‍टुन, “याग नान वार्ट एसाव नीनी सिक्‍यान, अदिक केळली कुरतान, ‘नी यार दास हुय, अदिक अंदकु आगतद, अदिक ईंदुर नीन मुंद मुंद आर, आंदुर यारोर हुळ.’” 18आग अनेत, “ईव नीन दास याकूब उन हु. हे नान प्रभु एसाव, ईव भेंट नीन इक कोळोर साटी नीन हाती कळुकु आग्‍याव, अदिक आव खुद भी नाम हिंद हिंद बरेत्‍यान.” 19याकूब ईदा मात दुसरा अदिक तिसरा अदिक आ सप्‍पा से अंदुन, जो आंदुर हिंद हिंद बरोर. हिंग अच आग्या कोट्टुन कि याग एसाव नीम इक सिकुल आग ईदा प्रकार देल आऊन से अनेतीर. 20नीव ईद अनेतीर, “नीन वार्ट याकूब हिंद बरेत्‍यान.” यतिकी याकूब सोचदुन कि, “ईस भेंट कोटकु ना एसाव उक खुश माळ बुळाईन. ईदुर बाद्‍दा ना आऊन सांगुळ होगाईन, आग जरूर, आव नानी माफ माळ कोंडान.” 21इदुरसाटी अद झुंड इन भेंट याकूब उन से पयला आपाटी ईळुत, अदिक आव खुद आ ईळ्लक इक ड्यारा दा ईत्तुन.

पनीएल दा याकूब उन मल्‍लयुद्ध

22अदा ईळ्‍ल्‍की आव येद्‍दुन अदिक तान येढ्‍ढु हिंग्‍सुर, अदिक येढ्‍ढु दासीगोळ, अदिक हनुन चिकोरगोळी सांगुळ हुडुकु घाट दा टु यब्बोक गांगा अन्द आप्पाटी ईळदोदुन. 23याकूब सप्‍पा मुंदरी गांगा अन्द आप्पाटी कळु कोंडुन. 24अदिक याकूब अल्‍या रूकसेदुन.

ऊंद आरी अल बंदकु व्‍हातुर ताका आऊन से मल्‍लयुद्ध माळतेला ईत्‍तुन. 25याग आ आरी नोळदुन कि आव याकूब उक हारूस सकालुन आग आव याकूब उन जांघ इन नस इक मुटदुन अदिक मल्‍लयुद्ध माळ्‍त माळ्‍त अच आऊन नस येरेत. 26ईद आगदुर मा आ मंळसा याकूब से अंदुन, “ईग नानी होगगोळ.”

लेकीन याकूब आ मंळसा से अंदुन, “ईला. ना नीनी आगासताका होगगोळालीन, यागासताका नी नानी आशीष कोळतीदील.”

27आग आव याकूब से केळदुन, “नींद हेसुर येन आद?”

आव अंदुन, “याकूब.”

28आग आ मंळसा आऊन से अंदुन, “ईग टु नींद हेसुर याकूब ईला बल्‍की इस्त्राएल3 ईत्‍तीत, यतिकी परमेश्वर से अदिक मंळसागोळ से मेहनत माळतेला नी जीकसेग्‍या.”4

29आग याकूब आ मंळसा से अंदुन, “कृपया नी नानी तान हेसुर हेळ.”

आ मंळसा उत्‍तर कोट्‍टुन, “येन माळ्‍या नान हेसुर जान्‍सकु?” अदिक आग आ मंळसा अल्‍या याकूब उक आशीष कोट्‍टुन.5

30आग याकूब ईद अनकु आ जागा अन हेसुर पनीएल6 ईटदुन; “परमेश्वर उक आमने सामने नोळदुर मा भी नान जीव ऊळदोत.” 31पनीएल इन हाती टु नळुत नळुत सूर्य उदय आगेत, अदिक आव जाँघ इन नस यरदुर देल लंगळुसतोगोन. 32ई घटना अक याद माळतेला इस्त्राएल वंश ईंद ताका जाँघ इन पुट्‍टा अन मांसपेशी इक तिनालुर यतिकी ईदा मांसपेशी मा याकूब उक दुख आगीत. यतिकी आ मंळसा याकूब उन जाँघ इक मुटीदुन.