निर्गमन 34

कल्ल इन व्हाशोद पाटीगोळ

(व्यवस्थाविवरण 10:1-5)

1बाक यहोवा मूसा से अंदुन, “पयला तखतगोळ घाई कल्ल इन येढ्ढ मात्त तखतगोळ केदुर कोम; आग जो वचन आ पयला तखतगोळ मा लिख्सकु ईरव, यवरी नी मुर्द बुट्ट, अवा वचन ना आ तखतगोळ मा भी लिख्साईन. 2व्हातर्या तयार ईरेत, अदिक व्हातर्या सीनै पहाळी मा येरकु अदुर स्यांडा मा नांद मुंद नीदरेत. 3नीन सांगुळ याऊ येर ईला पायजे, उलटा पहाळी तीमुर मा याऊ मंळसा येल्यारा कांळ्सबाळुल; अदिक ना मर्री-म्यांडा अदिक ना वस्त-वाळी भी पहाळी इन मुंद चरूस ईला पायजे.” 4आग मूसा पयला तखतगोळ घाई येढ्ढ मात्त तखतगोळ गळुसदुन; अदिक हुंजकुका येदकु तान कय दा कल्ल इन अव येढ्ढु तखतगोळ हुडुकु यहोवा अन आग्या अन अनुसार सीनै पहाळी मा येरेदुन. 5आग यहोवा बादल दा ईळुकु आऊन सांगुळ अल निदुरकु यहोवा अन हेसुर प्रचार माळदुन. 6यहोवा आऊन मुंद आगकु ईद प्रचार माळतेला नळदुन, “यहोवा, यहोवा, ईश्वर दयालु अदिक अनुग्रहकारी, कोप माळदुर दा धीरजवन्त, अदिक हापाळ करूणामय अदिक सत्य, 7हजारों पीढ़ी ताका लगातार करूणा माळावाळा, अधर्म अदिक अपराध अदिक पाप इन क्षमा माळावाळा हुन, लेकीन दोषी इक आव यातोदु प्रकार देल निर्दोष ठहरूसतीदील; आव आप्पुर्द अधर्म इन दण्ड आऊन चिकोर उलटा नातु अदिक पळनातुगोळी भी कोळावाळा हुन.” 8आग मूसा तुरन्त धरती दी ट्वांगरा टेक्सकु बांगकु दण्डवत माळदुन. 9अदिक आव अंदुन, “हे प्रभु, अगर नीन अनुग्रह अन दृष्टी नान मा आगुल, रा प्रभु नाव लॉकुर न्याड्या दा टु आगतेला होदेव; ई लॉकुर जिद्दी रा आर, तरी भी नाम अधर्म अदिक पाप इक क्षमा माळ अदिक नामी तान निज भाग मान्सकु ग्रहण माळ.”

वाचा अन्द दोहरूस्कु आगोद

(निर्गमन 23:14-19; व्यवस्थाविवरण 7:1-5; 16:1-17)

10आव अंदुन, “केळ, ना ऊंद वाचा कटतीन. नीन सप्पा लॉकुर मुंद ना हिंग आश्चर्यकर्म माळाईन ह्यांग धरती मा अदिक सप्पा द्याशगोळ दा यागलु आगीदील; अदिक आ सप्पा लॉकुर यार न्याड्या नी ईरत्या यहोवा अन कार्य अक नोळ्यार; यतिकी जो ना नीम लॉकुर साटी माळदुर मा आईन अद भयंकर क्याल्सा आद. 11जो आग्या ना ईंद नीमी कोळतीन अदरी नीव लॉकुर मान्सेतीर. नोळी, ना नीम मुंदु टु एमोरी, कनानी, हित्ती, परिज्जी, हिब्बी अदिक यबूसी लॉकुरी तेगुतीन. 12इदुरसाटी सावधान ईरेत कि याता द्याश दा नी होगावाळा आय अलेर ईरावाळेर से वाचा कट बाळेत; ईलारा हींग आगबाळुल कि अद नीन साटी फंदा ठहरूसुल. 13इदुरसाटी आंदुर वेदीगोळी केळ्द बुळेत, आंदुर मुंडागोळी मुर्द बुळेत, अदिक आंदुर अशेरा हेसुर इन मुर्तीगोळी कळ्द बुळेत; 14यतिकी नीनी यावारा दुसरा अक ईश्वर माळकु दण्डवत माळोद आग्या हैलेच, यतिकी यहोवा यार हेसुर जलनशील आद, आव होतकु येळावाळा परमेश्वर हुन, 15हींग आगबाळुल कि नी आ द्याश इन ईरावाळेर से वाचा कट्या, अदिक आंदुर तान देवतागोळ्द हींद आगोद व्यभिचार माळुल, अदिक आंदुर साटी बलिदान भी माळुल, अदिक यावारा नीनी बावस्या कोळुल अदिक नी भी आऊन बलिपशु उन मास तीन, 16अदिक नी आंदुर पोरगोळी तान पारगोळ मदा साटी तरेत, अदिक आंदुर पोरगोळ जो खुद तान देवतागोळ्द हींद आगोद व्यभिचार माळतार नीन पारगोळ से भी तान देवतागोळ्द हींद आगोद व्यभिचार माळसुसुल.

17“नीव देवतागोळ्द मूर्तीगोळ ढाल्सकु माळ बाळेतीर.

18“अखमीरी रोट्टी इन हाब्ब मान्सेत. अदुर दा नान आग्या अन अनुसार आबीब तिंगुळ अन नियत समय मा येळ दिन ताका अखमीरी रोट्टी तिनतोगेत; यतिकी नी मिस्त्र टु आबीब तिंगुळ दा होटकु बंद. 19हर ऊंद पहिलौठा नानव हुन; अदिक येन पाड्डा, येन मेम्ना, नीन जनावरगोळ दा टु जो नर पहिलौठा आव अव सप्पा नानव अच हुव. 20गदा अन पहिलौठा अन बदला मेम्ना कोटकु अदरी बीळसेत, अगर नी अदरी बीळसोद चाहासाल रा अदुर म्यांडा मुर्द बुळेत. लेकीन तान सप्पा पहिलौठा पारगोळी बदला कोटकु बीळसेत. नानी याऊ नीरा कय तान मार्रा तोर्स बाळुल.

21“आर दिन रा मयनत माळेत, लेकीन सातवा दिशी विश्राम माळेत; उलटा नागर जोत्सा होती अदिक परा हचा समय दा भी विश्राम माळेत. 22अदिक नी हप्तागोळ्द हाब्‍ब मनुसेत यदरी पयले परा हच्द गोदी इन हाब्‍ब अंदकु आगतद, अदिक साल इन आखरी दा बटोरन इन भी हाब्‍ब मनुसेत. 23साल दा मुर घन नीन सप्पा मंळसागोळ इस्त्राएल इन परमेश्वर प्रभु यहोवा अक तान मार्रा तोर्सुल. 24यतिकी ना गैरयहूदीगोळी नीन मुंदु टु तेगुकु नीन सीमागोळी वाळुसाईन; अदिक याग नी तान परमेश्वर यहोवा अक तान मार्रा तोरसोर साटी साल दा मुर अनली बर्तोद्या, आग याऊ नीन जमीन इन लालच माळतीदील.

25“नान बलिदान इन रक्ता अक खमीर सांगुळ येर्स बाळेत, अदिक ना फसह अन हाब्ब अन बलिदान दा टु येनारा व्हातुर ताका मिक्सकु ईटेत. 26तान जमीन इन पयला उपज इन पयला भाग तान परमेश्वर यहोवा अन भवन दा तरेत. मर्री इन पाड्डा अक अदुर्द मोय इन हाल दा बेईस बाळेत.”

27आग यहोवा मूसा से अंदुन, “ई वचन लिख्स कोम; यतिकी ईवा वचनगोळ अनुसार ना नीन अदिक इस्त्राएल इन सांगुळ वाचा कटीन.” 28मूसा अल यहोवा अन सांगुळ चालीस दिन अदिक चालीस ईळ्लक ईत्तुन; अदिक आगासताका ना रा आव रोट्टी तिंदुन अदिक ना नीर कुळदुन. अदिक आव आ पाटीगोळ मा वाचा अन वचन मतलब हत्त आग्यागोळ लिख्स बुट्टुन.

मूसा अन सीनै पहाळ मा टु ईळोद

29याग मूसा गवाही इन येढ्ढु तखतगोळ कय दा हुडुकु सीनै पहाळ टु ईळोन आग यहोवा अन सांगुळ मात हेळदुर कारण आऊन मार्रा दा टु किरण होळोव, लेकीन आव ईद ईला जानसोन कि आऊन मार्रा दा टु किरण होळेत्याव. 30याग हारून अदिक सप्पा इस्त्राएलीगोळ मूसा अक नोळदुर कि आऊन मार्रा दा टु किरण होळेत्याव, आग आंदुर आऊन हात्ती होगोर से अंजेदुर. 31आग मूसा आंदरी कारदुन; अदिक हारून मंडली इन सप्पा प्रधानगोळ समेत आऊन हात्ती बंदुन, अदिक मूसा आंदुर से मात हेळली हतदुन. 32इदुर बाद्दा सप्पा इस्त्राएलीगोळ हात्ती बंदुर, अदिक यास आग्यागोळ यहोवा सीनै पहाळ मा आऊन सांगुळ मात हेळा होती कोटीदुन, अव सप्पा आव आंदरी हेळदुन. 33यागासताका मूसा आंदुर से मात हेळ कोंडीदील आगासताका तान मार्रा मा ओढ़ना हाक्कु ईत्तुन; 34लेकीन याग याग मूसा बुळ्क यहोवा से मात हेळली आऊन मुंद होगोन, आग आग आव आ ओढ़नी इक होळा समय ताका तेगकु ईटतोगोन; बाक व्हार्या बंदकु जो जो आग्या आऊक सिकतोगोद अवरी इस्त्राएलीगोळ से हेळबुळतोगोन. 35इस्त्राएली मूसा अन मार्रा नोळतोगोर कि आऊन मार्रा दा टु किरण होळताव; अदिक यागासताका आव यहोवा से मात हेळली बुळ्क ईला होगतोगोन आगासताका आव आ ओढ़नी इक हाक्कु ईरतोगोन.