परमेश्वर उन वचन
निर्गमन 33
सीनै पहाळी टु होगोद इन आग्या
बाक यहोवा मूसा से अंदुन, “नी आ लॉकुरी यारी मिस्त्र द्याश दा टु बिळ्सकु तंद्या सांगुळ हुडुकु आ द्याश इक होग, यदुर बारा दा ना अब्राहम, इसहाक, अदिक याकूब से किर्या तिनकु अंदीदीन कि ना अदरी नीम वंश इक कोळाईन. अदिक ना नीन मुंद मुंद ऊंद दूत उक कळाईन, अदिक कनानी, एमोरी, हित्ती, परिज्जी, हिब्बी अदिक यबूसी लॉकुरी बरबस तेग्द बुळाईन. नीव लॉकुर आ द्याश इक होगी यदुर दा हाल अदिक शयद इन धारा वाहुसताव; लेकीन नीव जिद्दी आईर, ई कारण ना नीम बीच दा आगकु नळुतीदील, हिंग आगबाळुल कि ना हादी मा नीम अन्त माळ बुळाईन.”
ईद बेकार बातणी केळकु आ लॉकुर विलाप माळली हतदुर; अदिक याऊ तान ईसरावाळी हाक्कु ईतीदील. यतिकी यहोवा मूसा से अंद बुटीदुन, “इस्त्राएलीगोळी नान ईद वचन केळ्स, ‘नीव लॉकुर रा जिद्दी आईर; अगर ना घळी तिमुर साटी नीम बीच दा आगकु नळाईन, रा नीम अन्त माळ बुळाईन. इदुरसाटी ईग तान तान ईसरा तान मय दा टु ईळ्सबुळी कि ना जान्साईन कि नीम सांगुळ येन माळ पायजे.’” इदुरसाटी इस्त्राएली होरेब पहाळी टु हुडुकु मुंद ताका तान ईसरा ईळ्सकु ईरूल.
मिलाप इन तम्बु
मूसा तम्बु उक छावनी टु व्हार्या उलटा दुर निदरूसकु ईटतोगोन, अदिक अदरी मिलाप इन तम्बु अनतोगोन. अदिक जो यावारा यहोवा अक ढुंढ्सतोगोन आव अद मिलाप इन तम्बु उन हात्ती जो छावनी इन व्हार्या ईरोद, होट बुळतोगोद. याग याग मूसा तम्बु उन हात्ती होगोन, आग आग सप्पा लॉकुर येदकु तान तान ड्यारा अन दरवाजा मा निद्रेगोर, अदिक यागास ताका मूसा आ तम्बु दा प्रवेश ईला माळतोगोन आगासताका ताका आऊन दी तार हचकु नोळतोगोर. याग मूसा आ तम्बु दा प्रवेश माळतोगोन, आग बादल इन खम्बा ईळुकु तम्बु उन दरवाजा मा रुक्सेगोद, अदिक यहोवा मूसा से मातगोळी हेळली हत्तेगतोगोन. अदिक सप्पा लॉकुर याग बादल इन खम्बा अक तम्बु उन दरवाजा मा रूक्सकु नोळतोगोर, आग येदकु तान तान ड्यारा अन दरवाजा मा टु ट्वांगरा टेक्सकु दण्डवत माळतोगोर. अदिक यहोवा मूसा से ईत्ता प्रकार देल आमने सामने मातगोळ हेळतोगोन, याता प्रकार देल यावारा तान वार्ट उन से मात हेळतान. अदिक मूसा रा छावनी दा वापस बरतोगोन, लेकीन यहोशू हेसुर इन ऊंद हारोदव मंळसा, जो नून उन पार अदिक मूसा अन सेवक ईरोन, आव तम्बु दा टु ईला होळतोगोन.
परमेश्वर उन सांगुळ ईरोद वचन
मूसा यहोवा से अंदुन, “केळ नी नान से अनत्या, ई लॉकुरी हुडुकु ओय; लेकीन ईद हेळीदील कि नी नान सांगुळ यारी कळ्या. तरी भी नी अंद्या, ना नीनी हेसुर देल जान्सतीन, अदिक नीन मा नान अनुग्रह अन दृष्टी आद. अदिक ईग अगर नान मा नीन अनुग्रह अन दृष्टी आगुल, रा नानी तान गति समजुस बुळ, यदुर देल याग ना नीन ग्यान हासिल माळाईन आग नीन अनुग्रह अन दृष्टी नान मा बन्सकु ईरूल. बाक ईद भी ध्यान ईट कि ईद जाति नीन प्रजा हुन.” यहोवा अंदुन, “ना खुद नीन सांगुळ नळाईन अदिक नीनी विश्राम कोळाईन.” आव आऊन से अंदुन, “अगर नी खुद नळुतिदील, रा नामी ईल टु मुंद ओयबाळ. ईद ह्यांग अर्तकु आगुल कि नीन अनुग्रह अन दृष्टी नान मा अदिक तान प्रजा मा आद? येन ईदुर देल ईला कि नी नाम सांगुळ सांगुळ नळद्या, यदुर देल ना अदिक नीन प्रजा अन लॉकुर पृथ्वी तिमुर्द सप्पा लॉकुर से अलग ठहरूसुल?”
यहोवा मूसा से अंदुन, “ना ईद क्याल्सा भी, यदुर्द चर्चा नी माळ्या, माळाईन; यतिकी नान अनुग्रह अन दृष्टी नीन मा आद, ना नीनी नीन हेसुर देल जान्सतीन.” मूसा अंदुन, “नानी तान तेज तोर्स बुळ.” आव अंदुन, “ना नीन हात्ती आगकु नळुतेला नीनी तान पुरा भलाई तोर्साईन, अदिक नीन हात्ती यहोवा हेसुर इन प्रचार माळाईन; अदिक यदुर मा ना अनुग्रह माळोद चाहासाईन आऊन मा अच अनुग्रह माळाईन, अदिक यार मा दया माळोद चाहासाईन आऊन मा का दया माळाईन.” बाक आव अंदुन, “नी नान बाय इन दर्शन माळ सकाल; यतिकी मंळसा नान बाय इन दर्शन माळकु जित्ता ईर सकालुन.” बाक यहोवा अंदुन, “केळ, नान हात्ती ऊंद जागा आद, ईल नी आ चट्टान मा निदुर; अदिक याग ताका नान तेज नीन मुंद आगकु नळुतेला ईत्तीत, आग ताका ना नीनी धोळ्द कल्ल इन दरार दा ईटाईन अदिक यागासताका ना नीन मुंदु टु आगतेला होगालीन आगासताका तान कय देल नीनी मुचकु ईटाईन; बाक ना तान कय नेग्द बुळाईन, आग नी नान बेन इन रा दर्शन माळ्या; लेकीन नान बाय इन दर्शन आगतीदील.”
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.