निर्गमन 35

आराम दिन इक मानसोद

1मूसा इस्त्राएलीगोळ्द सप्पा मंडली इक जमा माळकु आंदुर से अंदुन, “याता क्याल्सागोळ्द माळोद आग्या यहोवा कोटान अव ईव हुव. 2आर दिन रा क्याल्सा-कळी माळकु आगुल, लेकीन सातवा दिशी नीम साटी पवित्र अदिक यहोवा अन साटी परम विश्राम इन दिन ठहरूसुल; अदुर दा जो यावारा क्याल्सा-कळी माळ्यान आव कोन्सुसकु आगुल; 3उलटा विश्राम इन दिशी नीव तान तान मान्नगोळ दा बेक्‍की ताका होताक बाळेतीर.”

पवित्र तम्बु उन साटी भेंट

(निर्गमन 25:1-9)

4बाक मूसा इस्त्राएलीगोळ्द सप्पा मंडली से अंदुन, याता मात इन आग्या यहोवा कोटान अद ईद हुन. 5नीम हात्ती टु यहोवा अन साटी भेंट ताकोमकु आगुल, मतलब यास तान इच्छा देल कोळोद चाहसुल आंदुर यहोवा अन भेंट माळकु ईव वस्तुगोळ तरूल; मतलब व्हान्ना, बेळ्ली, पीतल; 6नीळा, जांभळा रंग इन अदिक क्याचांद रंग इन कपळा, सुक्ष्म सन इन कपळा; मर्री इन चुट्टी, 7क्याचांद रंग देल रंगकु म्यांडागोळ्द तोगुल, सूइसगोळ्द तोगुल; बबूल इन हुळ्ली, 8ऊजुळ कोळोर साटी याण्णा, अभिषेक इन याण्णा अदिक धूप इन साटी सुगन्धद्रव्य, 9बाक एपोद अदिक चपरास इन साटी सुलैमानी मणि अदिक जळुसोर साटी मणि.

निवासस्थान इन अलग अलग वस्तुगोळ

(निर्गमन 39:32-43)

10“नीम दा टु यास मुंदुरव दिल दा बुद्धि इन ऊजुळ आद आंदुर सप्पा बंदकु याता याता वस्तु उन आग्या यहोवा कोटान अव सप्पा बनुसुल. 11मतलब तम्बु, अदिक आवरण समेत निवास, अदिक अदुर घुंडी, पट्टीगोळ, बेंडगोळ, खम्बागोळ अदिक कुर्चीगोळ; 12बाक डण्डागोळ समेत सन्दुक, अदिक प्रायश्चित इन झाकनी, अदिक बीच इन पळदा; 13डण्डागोळ अदिक सप्पा सामान समेत मेज, अदिक भेंट इन रोट्टीगोळ; 14सामान अदिक दिंग्यागोळ समेत ऊजुळ कोळावाळा दीवट, अदिक ऊजुळ कोळोर साटी याण्णा; 15डण्डागोळ समेत धूपवेदी, अभिषेक इन याण्णा, सुगन्धित धूप, अदिक निवास इन दरवाजा मा पळदा; 16पीतल इन झंझरी, डण्डागोळ समेत होमबली वेदी, पाया समेत गंगार; 17खम्बागोळ अदिक अऊर्द कुर्चीगोळ समेत आंगुळ इन पळदागोळ, अदिक आंगुळ इन दरवाजा मा पळदागोळ; 18निवास अदिक आंगुळ येढ्ढु उन खुटागोळ, अदिक डोरीगोळ; 19पवित्रस्थान दा स्यावा टहल माळोर साटी कळुस्द कपळा, अदिक याजक इन क्याल्सा माळोर साटी हारून याजक उन पवित्र कपळा, अदिक आऊन पारगोळव कपळा.”

लॉकुर द्वारा भेंट तरोद

20आग इस्त्राएलीगोळ्द सप्पा मंडली मूसा अन मुंदु टु वापस होत्त. 21अदिक यास मुंदुरी उत्साह आत अदिक यास मुंदुर मन दा हींग इच्छा उत्पन्न आगित, आंदुर मिलाप इन तम्बु उन क्याल्सा माळली अदिक अदुर सप्पा स्यावा अदिक पवित्र कपळागोळ्द माळोर साटी यहोवा अन भेंट तरली हतदुर. 22येन आर्तेर, येन मंळसागोळ, यास मुंदुर मन दा हींग इच्छा उत्पन्न आगित आंदुर सप्पा कुत्या दाकळोद हार, कीव दाकळव नथनी, ऊंगरा, अदिक बांगळा व्हान्ना अन ईसरा तरली हतदुर, ईत्ता प्रकार देल यास मंळसा यहोवा अन साटी व्हान्ना अन भेंट इन कोळावाळेर ईरोर आंदुर सप्पा मुंदुर अवरी तंदुर. 23अदिक याता याता मंळसा अन हात्ती नीळा, जांभळा या क्याचांद रंग इन कपळा, या सुक्ष्म सन इन कपळा, या मर्री इन चुट्टी, या क्याचांद रंग देल रंगकु म्यांडागोळ्द तोगुल, या सूइसगोळ्द तोगुल ईरव आंदुर अवरी तंदुर. 24बाक याट बेळ्ली, या पीतळा अन भेंट इन कोळावाळेर ईरोर आंदुर यहोवा अन साटी ईत्ता भेंट तंदुर; अदिक यार यार हात्ती स्यावा अन यातोदारा क्याल्सा अन साटी बबूल इन हुळ्ली ईरोद आंदुर अदरी तंदुर. 25अदिक यास आर्तेर मन दा बुद्धि इन ऊजुळ ईरोद आंदुर तान कय देल लूला कातुस कातुसकु नीळा, जांभळा अदिक क्याचांद रंग इन, अदिक सुक्ष्म सन इन कातुस्द लूला अक तंदुर. 26यास आर्तेर मन दा हींग बुद्धि इन ऊजुळ ईरोद आंदुर मर्री इन चुट्टी भी कातुसदुर. 27अदिक प्रधान लॉकुर एपोद अदिक चपरास इन साटी सुलैमानी मणि, अदिक जळुसोर साटी मणि, 28अदिक ऊजुळ कोळली अदिक अभिषेक अदिक धूप इन सुगन्धद्रव्य अदिक याण्णा तंदुर. 29याता याता वस्तु उन माळोद आग्या यहोवा मूसा अन द्वारा कोटीदुन अदुर साटी जो येनारा जरूरी ईरोद, अदरी आ सप्पा मंळसागोळ अदिक आर्तेर तंदुर, यार मन दा हींग इच्छा उत्पन्न आगित. ईत्ता प्रकार देल इस्त्राएली यहोवा अन साटी तांद अच इच्छा देल भेंट तंदुर.

मिलाप इन तम्बु उन साटी कारीगर

(निर्गमन 31:1-11)

30आग मूसा इस्त्राएलीगोळ से अंदुन, “केळी, यहोवा यहूदा अन गोत्रवाळेर बसलेल उक, जो ऊरी इनव पार अदिक हूर इन नातु हुन, हेसुर ताकोमकु कारस्यान; 31अदिक आव आऊक परमेश्वर उन आत्मा देल हींग परिपुर्ण माळ्यान कि सप्पा प्रकार इन बनावट इन साटी आऊक ईत्ता बुद्धि, समझ, अदिक ग्यान सिक्याद 32कि आव कारीगरी इन युक्तिगोळ तेगुकु व्हान्ना, बेळ्ली अदिक पीतळा दा, 33अदिक जळुसोर साटी मणि कळदुर दा अदिक हुळ्ली मा नकाशा माळदुर दा, उलटा बुद्धि देल सप्पा प्रकार इन तेग्द बनावट दा क्याल्सा माळ सकुल. 34बाक यहोवा आऊन मन दा दान इन गोत्रवाळेर अहीसामाक उन पार ओहोलीआब उन मन दा भी शिक्षा कोळोद शक्ति कोटान. 35ई येढ्ढु मुंदुर मन इक यहोवा हींग बुद्धि देल परिपुर्ण माळ्यान कि आंदुर नकाशा तेगदुर दा अदिक गळुसावाळेर अदिक नीळा, जांभळा अदिक क्याचांद रंग इन सन इन कपळा दा कातुसावाळेर अदिक बुनाई माळावाळेर आगुल, उलटा सप्पा प्रकार इन बनावट दा, अदिक बुद्धि देल क्याल्सा तेगदुर दा सप्पा प्रकार इन क्याल्सा माळुल.