Gowlan Bible
निर्गमन 4
यहोवा मूसा खे अद्भुत सामर्थ् देस हइ
तब मूसा ने उत्तर दियो, “अगर वे मरा पर भरोसो नी करन का अरु न मरी सुनंन, निते बोल्ये, ‘यहोवा ने तुमखे दर्शन नि दियो’.” यहोवा ने ओका से बोल्यो, “तरा हाथ में का हई?” वोने बोल्यो, “लाकडी.”
यहोवा ने बोल्यो, “ओखे भूई पर डाली दे.” जब मूसा ने ओखे भूई पर फेकी दियो तब उ साप बनी गयो, अरु मूसो ओका सामने से भागी गो. तब यहोवा ने मूसा से बोल्यो, “हाथ बढईखे ओकी सेपुट पकडी ले, जब ओने हाथ बढ़ईखे ओखे पकड्यो तब वु ओका हाथ में फेर लकडी बनी गई. ताकि वे दुनिया विश्वास कर्ये कि तुम्हारा बापदादाहोन को परमेश्वर अर्थात् अब्राहम को परमेश्वर, इसहाक को परमेश्वर, अरु याकुब को परमेश्वर, यहोवा ने मेखे दर्शन दियो हइ.”
फेर यहोवा ने ओका से यो भी बोलियो, “अपना हाथ छाती पर रखी खे झाक.” अतः ओने अपना हाथ छाती पर रखी खे झाकी लियो; फेर्यो जब ओने निकाल्यो तब का देखीयो, कि ओको हाथ कोढ़ का कारण बर्फ को जसो सफेत हुई गयो. तब यहोवा ने बोल्यो, “अपनो हाथ छाती पर फेर रखी खे झाक.” अरु ओने अपना हाथ छाती पर रखी खे झाक लियो; अरु जब ओने ओखे छाती पर से निकाल्यो तब का देखस हई कि उ फेर पूरो आंग पहले का जसो हुई गयो. तब यहोवा ने बोल्यो, “अगर वे थरी बात पर भरोसो नी करन का, अरु पहिलो चिन्ह खे नी मानन का, ते दूसरो चिन्ह पर भरोसो करें. अरु अगर वे इन दोही चिन्हां पर विश्वास नी करे अरु तेरी बात खे नी मानन का, तब तू नील नदी से थोडो पाणी लिकर सूखी जमिन पर डालनो; अरु जो पाणी तू नदी से निकालनु वु सूखी जमिन पर खुन बनी जाये.” मूसा ने यहोवा से बोलियो, “हे मरा यहोवा, मी बोलना में निपुण नी हइ, नही पहले थो, अरु जब से तू अपना दास से बात करन लयो; मी तो मुँडा अरु जीभ को तोतलो इन्सान हइ.” यहोवा ने ओका से बोल्यो, “इन्सान का मुँडा खे कोने बनायो हइ? अरु इन्सान खे गूगों, या बहीरो, या देखन आलो, या अंधो, मुखे यहोवा खे छोडी खे कौन का मि हि यहोवा नि हइ बनास हई? अब जा, मी तरा मुख का सात हुई खे जो तोखे बोलनु हुऐ उ तोखे सिखातो जायू.” ओने बोलियो, “हे मेरा यहोवा, तू कोइ अन्य अदमी खे भेज.” तब यहोवा को कोप मूसा पर भड़कियो अरु ओने बोल्यो, “का तरो भाई लेवीय कुल को हारुन नी हई? मेखे तो भरोसो हई कि उ बोलना में निपुण हई, अरु वु तरा से मीलन का लिये निकली भी गयो हई, अरु तोखे देखीखे मन में खूस हूये. तु ओका से बात करनु अरु ओखे बतानु कि का बोलनो हई मी ओखे अरु तोखे बोलना मे मददत कऱ्यु अरु तोखे का करनो हई यो तोखे सिखायु. हारुन ही तुमारा तरप से दुनियाहोन से बात करतो रिहे; उ तरा लिये मुडा अरु तू ओका लिये परमेश्वर रिहे. अरु तू या लकडी खे हाथ में लिखे जा, अरु ओका से ये चिन्ह होन दिखानु.”
मूसा को मिस्र देश मे लौटनु
तब मूसा अपना सुसर यित्रो का पास लौवट्यो अरु ओका से बोलियो, “मेखे छोडी खे आ, कि मी मिस्र में र्हेनआला अपना भाई-बंध का नजिक जाई खे देख्यु कि वे अभी तक जिंन्दा हइ या नी हइ.” यित्रो ने बोलियो, “सुखरुप से जा.” अरु यहोवा ने मिद्यान देश में मूसा से बोलियो, “मिस्र मे लौवटी जा; क्योंकि वे लोंगहोन तरा जान का प्यासा था वे सब मरी गया हइ.” तब मूसा अपनी लुगई अरु बेटाहोंन खे गधा पर बठयैखे मिस्र देश का तरप परमेश्वर की दि हुइ लाकडी खे हाथ में लिते हुए लौवटो. अरु यहोवा ने मूसा से बोलियो, “जब तू मिस्र में पहुँच्या तब सावधान हुई जानु, अरु जो चमत्कार मेने तरा वंश में किया हइ वे सभी खे फिरोन खे दिखानु; परन्तु मी ओका मन खे खंटो करियू, अरु उ मरी प्रजा खे जान नी देन को. अरु तोने फिरोन से बोलनु, ‘यहोवा यो बोलस हइ, कि इस्राएल मरो बडो बेटो हई, अरु मी जो तरा से बोलि चुकीयो हइ, कि मह्रा बेटा खे जान दे कि उ मरी आराधना कर्हिये; अरु तोने अब तक ओखे जान नी दियो, येका कारण मी अब तरा बडा बेटा खे माऱ्यु’.”1
मिस्र कि रस्ता पर ऱ्हेन कि जगा में यहोवा ने मूसा से मिलीखे ओखे मारी डालन कि कोशिश करी.2 तब सिप्पोरा ने एक तेज चमक धार पत्थर लिखे अपना बेटा की खलड़ी खे काटी दियो, अरु मूसा का पाय पर यो बोली खे फेंकी दियो, “निश्चय तू खुन बहानवालो मरो अदमी हई.” तब ओने ओखे छोडी दियो. अरु वहि टेम खतना का कारण वा बोली, “तू खुन बोहान आलो मरो अदमी हई.”
मूसा अरु हारुन को मीलनो
तब यहोवा ने हारुन से बोलियो, “मूसा से मिलन का लिये जंगल में जा.” अरु उ गयो, अरु परमेश्वर का पाहाड पर ओका से मिल्यो अरु ओखे चूम्यो. तब मूसा ने हारुन खे यो बतायो कि यहोवा ने का-का बात बोली खे उनखे भेजो हई, अरु कौन-कोन सा चिन्ह दिखान की आज्ञा ओखे दी हई. तब मूसा अरु हारुन ने जाकर इस्राएलिहोन का सब बापदादाहोन खे जमा कर्या. अरु जितनी बात यहोवा ने मूसा से बोली थीं वा सब हारुन ने उनखे सुनाई, अरु दुनिया का आख का सामने वे चिन्ह भी दिखायो. अरु दुनियाहोन ने उन पर विश्वास करीयो; अरु यो सुनी खे यहोवा ने इस्राएलिहोन की सुधि ली अरु उनका दुःख पर नजर करी हइ, उन्हे माथो झुकइखे दंडवत कर्यो.3
Source notes (3)
- Cross-reference निर्गमन 12:29
- Cross-reference उत्पत्ति 17; 14—32; 25
- Cross-reference निर्गमन 14:31; यहून्ना 2:11
Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.