Skip to content
BibleKenya

Gowlan Bible

निर्गमन 3

जलती हुइ झाडी

मूसा ने अपना सुसरा यित्रो नामको मिद्यान को याजक की मेंडा-बकरिहोन खे चरातो थो; अरु वु उनखे जंगल की पश्चिमी का तरप होरेब नामक परमेश्वर को सिनाय पहाड का पास ली गयो. अरु परमेश्वर का दूत ने एक काटा की झाड़ी का अंदर अंगार की लाप में उनखे दर्शन दियो; अरु ओने आख उठई खे देख्यो कि झाड़ी अंगार से जलीरी रिस हई, पर राख नी हूईरी. तब मूसा ने सोच्यो, “मी उधर जई खे उ बडा अच्मभा खे देखीयु कि वा झाड़ी क्यों नी जली जाये.” जब यहोवा ने देख्यो कि मूसा झाडी देखन खे मुडयो चल्यो अई रोस हई, ते परमेश्वर ने झाड़ी का बीच से ओखे पुकार्यो, “हे मूसा, हे मूसा!” मूसा ने बोल्यो, “हा मी हइ.” यहोवा ने बोल्यो, “इधर नजिक मत आय, अरु अपना पायो से जूताहोन खे उतारी दे, क्योंकि जो जगाह पर तू खडो हई वा पवित्र जमीन आय.” यहोवा ने फेर बोल्यो, “मि तरा बाप को परमेश्वर, अरु अब्राहम को परमेश्वर, इसहाक को परमेश्वर, अरु याकुब को परमेश्वर आय.” ते मूसा ने जो परमेश्वर का तरप देखना से डरी गो अरु अपनो मुडो झाकी लियो. यहोवा ने बोल्यो, “मेने अपनी प्रजा का ईन्सानहोन जो मिस्र देश में हई उनखे दुःख र्दद देख्यो हई, अरु उनका जो बोल मे मेहनत करवानवाला का कारण होस हई उनखे मेने भी सुन्यो हई, अरु उनकी पीड़ा खे मी भी जानुस हई; ऐकालिये अब मी उतरीयो हइ कि उन्हे खे मिस्रिहोन का कुल से छुडाउ, अरु उ देश से निकाली खे एक अच्छा अरु बडा देश में जेमें दूध अरु महूरुस की नदिहोन बोवास हई, अर्थात् कनानी, हित्ती, एमोरी, परिज्जी, हिव्वी, अरु यबूसी दुनियाहोन का जगा में पहुचायु. येकालिए अब सुन, इस्राएलिहोन की चिल्लानो मेखे सुनाई पड़स हई, अरु मिस्रिहोन को उन पर जुलुम करनो भी मखे दिखाई पडस हई, येकालिए आ, मी तोखे फिरोन का पास भेजुस हइ कि तू मरी इस्राएली प्रजा खे मिस्र से निकाली खे लाये.” तब मूसा ने परमेश्वर से बोल्यो, “मी कोन आय जो फिरोन का पास जायु, अरु इस्राएलिहोन खे मिस्र से निकाली खे लउ?” यहोवा ने बोल्यो, “न्खकी मी तरा संग रीयू; अरु या बात का कि तरो भेजनवालो मी आय, तरा लिए यो चिन्ह हुये; कि जब तू वे दुनिया खे मिस्र से निकाली लिये तब तु या पहाड़ पर मरी आरधना करनु.” मूसा ने परमेश्वर से बोल्यो, “जब मी इस्राएलिहोन का पास जाइ खे उनसे यो बोल्‍यो, ‘तुम्हारा बापदादाहोन का परमेश्वर ने मखे तुम्हारा पास भेजो हई,’ तब अगर वे तुमसे पूछें, ‘वोको का नाम हई?’ तब मी उनखे का बतायु?” परमेश्वर ने मूसा से बोल्यो, “मी जो हई सो हई.” फेर वोने बोल्यो, “तू इस्राएलिहोन से यो बोलनु, ‘जेको नाम 1मी हई वोने मेखे तुम्हारा पास भेजो हई’.”2 अरु यहोवा ने बोल्यो, “तू इस्राएलिहोन से यो बोलनु, ‘तुम्हारो पूर्वजहोन को परमेश्वर, मनजे अब्राहम, इसहाक, अरु याकुब को परमेश्वर, यहोवा, वोने मेखे तुम्हारा पास भेजो हई. देख हमेशा तक मरो नाम योही र्हिये, अरु पीढी-पीढी मे मरो स्मरण असोई हुये.’ येकालिए अब जई खे इस्राएली का बापदादाखे जमा कर, अरु उनका से बोलनु, ‘तुम्हारा बापदादा अब्राहम, इसहाक, अरु याकुब को परमेश्वर, यहोवा ने मेखे दर्शन दियो अरु यो बोलियो कि मेने तुम्हारा पर अरु तुम्हारा से जो बर्ताव मिस्र में कर्‍यो जातो थो पर चिंत्त लगई हई; अरु मेने ठानी लियो हई कि तुमखे मिस्र का दुःख में से निकाली खे कनानी, हित्ती, एमोरी, परिज्जी हिव्वी, अरु यबूसी दुनियाहोन का देश मे ली जायु, जो असो देश हई जेमें दूध अरु मधु की धार बोहास हई.’ तबी वे थोखे मान्ये; अरु तू इस्राएली बापदादाहोन खे संग में लीखे मिस्र का राजा का पास लीजइ खे ओका से यो बोलनु, इब्री होन का परमेश्वर यहोवा, से हम दुनियाहोन से मिल्ई देनु; येकालिए अब हमखे तीन दिन का रस्ता पर जंगल में जान देनु कि अपना परमेश्वर यहोवा को बलिदान चढ़ानो. मी जानुस हई कि मिस्र को राजो तुम खे जान नी देन जब तक सामर्थ्य नी दिखाये तब तक जान नी देनको. येकालिए मि अपनो हाथ बढईखे वे सब आश्चर्यकाम से जो मी मिस्र का बीच करीयु उ देश खे मार्यु; अरु ओका बाद उ तुम खे जान दिहे.

“तब मी मिस्रिहोन से अपनी या प्रजा पर अनुग्रह करवायु; अरु जब तुम निकले तब चामडा हाथ नी निकलन दियु. परन्तु तुम्हारी एक-एक बईहोन अपनी-अपनी पड़ोसिहोन, अरु अपना-अपना घर में रेनवाली से सोन्नो चाँदी का बर्तन, अरु कपडा माँगी लेनु, अरु तुम उनखे अपना बेटा अरु बेटिहोन खे पेरानु; यो प्रकार तुम मिस्रिहोन खे लुटी लीये.”

Source notes (2)
  1. Footnote मै यहुवा हू
  2. Cross-reference प्रकाशन 1:4,8

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.