निर्गमन 5

फिरोन का सामने मूसा अरु हारुन

1तब मूसा अरु हारुन ने जईखे फिरोन से बोल्यो, “इस्राएलीहोन का यहोवा यो बोलस हई, ‘मरी प्रजा का दुनियाहोन खे जान दे, कि वे जंगल में मरा लिये तिव्हार मनाये’.” 2फिरोन ने बोल्यो, “यो यहोवा कौन हई कि मी ओको वचन मानीखे इस्राएलिहोन खे जान दियु? मी यहोवा खे नी जानु, अरु मी इस्राएलिहोन खे नी जान देयु.” 3मूसा अरु हारुन ने बोल्यो, “इब्री होन को परमेश्वर ने हम से भेट की हई; येकालिए हम खे जंगल में तीन दिन का रस्ता पर जान दे, कि अपना प्रभू परमेश्वर का लिये बलिदान करा, असो नी हुये कि वह हम में महामारी फैलाए या तलवार से मारी दिये.” 4मिस्र का राजा ने उनका से बोल्यो, “हे मूसा, हे हारुन, तु क्यु दुनिया से काम कायबर छुडइ रो हई? तुम जईखे अपनो अपनो काम कर.” 5अरु फिरोन ने बोल्यो, “सुन, यो देश मे दुनिया भोत कम हुई गा हई, फेर तुम उनखे उन मेहनत से अराम देनो चास हई?”

6फिरोन ने उ दिन उन परिश्रम करवानेवालों को जो उन दुनियाहोन खे उपर थे, अरु उनखे सरदार खे या आज्ञा दी, 7“तुम जो अब तक ईट बनान का लिये दुनिया खे भुसो दियो करतो थो उ आगे से नी देनु; वे खुद ही जइ खे अपना लिये भुसो जमा करनु. 8ते भी जित्ती ईट अब तक उन खे बनानु पड़ती ओत्ती ही आगे भी उनखे बनानु, ईट की गिनती कुछ भी कम नी होनु; क्योंकि वे आलसी हइ; यो कारण वे यो बोली खे चिल्लास हइ, ‘हम जइ खे अपना परमेश्वर का लिये बलिदान कर्या.’ 9उ दुनियाहोन से अरु भी कठिन काम कि वे उनमे मेहनत करते रहें अरु झुठी बात पर ध्यान नि देनु.”

10तब दुनियाहोन खे काम करान आला ने अरु मुखिया ने बाहर जैइखे उनसे बोल्यो, “फिरोन यो प्रकार बोलस हई, ‘मी तुमखे भूसो नी देउ. 11तुम ही जैइखे जहा कहीं भूसो मिल्ये वहाँ से ओखे समटी खे ली आनु; परन्तु तुम्हारो काम कुछ भी कम नी हुये’.” 12येकालिए वे दुनिया सब मिस्र देश में तितर-बितर हुए खे भूसा का बदला मे घास समटी लेनु. 13काम करन आला यो बोलि-बोलीखे उनखे जल्दी करता रिह्य कि यो प्रकार तुम भूसो पइखे कर्यो करता था यो प्रकार अपनो रोज को काम अब भी पूरो करनो. 14अरु इस्राएलिहोन में से जो सरदाहोन खे फिरोन का काम करान आला ने उनखे अधिकारी ठहरायो थो, उन्हने मार खायो, अरु उनसे पूछ्यो गयो, “का कारण हइ कि तुमने अपनी तय हुइ ईटहोन की गिनती का अनुसार पहले का जसो कल अरु आज पूरी नी करी?”

15तब इस्राएलिहोन का सरदाहोन ने जैइखे फिरोन की दुहाई यो बोलीखे दी, “तू अपना दासहोन से असो बर्ताव क्यों करस हइ? 16तरा दासहोन खे भुसो तो दियो ही नी जातो अरु वे हम से बोलता रेतो हइ, ‘ईट बनानो, ईट बनानो,’ अरु तरा दासहोन ने भी मार खायो हइ; परन्तु दोष तरा ही दुनियाहोन को हइ.” 17फिरोन ने बोल्यो, “तुम आलसी हो, आलसी; योहि कारण बोलस हइ कि हमखे यहोवा का लिये बलिदान करन खे जान दे. 18अब जैय खे अपनो काम करनु; अरु भुसो तुम खे नी दियो जाये, परन्तु ईटहोन की गिनती पूरी करनु पड्ये.” 19जब इस्राएलिहोन को सरदाहोन ने या बात सुनी कि उनकी ईट की गिनती नी घट्ये, अरु प्रतिदिन फिरोन उतना ही काम पूरा करना पड़ेगा, तब वे जान गए कि उनखे संकट खे दिन आ गए हई. 20जब वे फिरोन का सामने से बाहेर निकली खे आया तब मूसा अरु हारुन, उनका से मिलन का लिये खडा था, उन्हखे मिल्या. 21अरु उन्हने मूसा अरु हारुन से बोल्यो, “यहोवा तुम पर नजर करी खे न्याय कर्ये, क्योंकि तुमने हमखे फिरोन अरु ओका कर्मचारिहोन की नजर में घृणित ठहरइ खे हमखे मारन का लिये उनका हाथ में तलवार दी दी हई.”

मूसा की परमेश्वर से शिकायत

22तब मूसा ने यहोवा का पास वापस आयो बोल्यो “हे यहोवा, तोने या प्रजा का साथ असी बुराई क्यों करी? अरु तोने मखे याहा क्यों भेंजो? 23जब से मी तरा नाम से फिरोन का पास बात करन का लिये गयो तब से ओने या प्रजा का साथ बुरो ही व्यवहार करीयो हई, अरु तोने अपनी प्रजा को कुछ भी छुटकारो नी करीयो.”