ዬ ማጻፋ 76

ኣሳፌይ ዛማሬታ ካቦስ ዲታን ዬጺዳ ማዛሙሬ

1ጾሲ ዩሁዳን ኤሬቲዴስ፤

ኢዛ ሱንካ ኢስራኤሌን ጊታ።

2ኢዛ ዱንካኔይ ሳሌሜን ዴስ፤

ኢዛስ ዱሳሶይካ ጺዮኔ።

3ኢዚ ሄሳን ዱኪዛ

ዎንዳፌ ዪሻ፥

ጎንዳሌ፥ ጊ ማሻታኔ

ሃራ ኦላ ሚሻታ

ሜንሬ ዬጊዴስ።

4ኣቤት ጾሳዉ!

ኔኒ ቦንቾ ማይኣዳ

ጶላሳ፤

ኔ ቴማቴ

ጊታ ዙማታፔካ ኣስ።

5ጎባ ኦላንቻቲ ቦንቄቲዳ፤

ኢስታፌ ኢሶይካ ባ ኩሼ

ዴንና ዳንዳይቤና፤

ኢስቲ ዎልቃማ ስኮ ስኪዳ።

6ኣቤት ያቆቤ ጾሳዉ!

ኔ ሃንቆ ጋሶን ቶጋ ኣሳቲኔ

ቶጋ ፓራቲ ኩንዲ ኣቲዳ።

7ኣቤት ጾሳዉ! ኔኒ ያሻሳ!

ኔ ሃንቆይ ሱሊዳ ዎዴ

ኔ ሲንን ኦኔ ኤቃናይ?

8ኔኒ ሳሎፔ ፒርዳ ሲሳዳሳ፤

ቢታይ ያያዳ ሲርጲ ጋዱስ።

9ኣቤት ጾሳዉ!

ሃይሲ ሳኣ ቦላ

ኡንኤቲዳይታ ኣሻናስ

ኔኒ ፒርዳስ ዴንዲን ሃንዴስ።

10ኔኒ ኣስ ሃንቂኮካ

ሄሲ ኔ ቦንቾስ ጊዴስ፤

ኦላፔ ኣቲዳይቲ

ኔ ባኣሌ ቦንቻና።

11ጎዳ ኢንቴ ጾሳስ ኣዲኒቴ፤

ሄ ኣዲኔቲዳይሳካ ጋቴ፤

ኢዛ ዩሾን ዲዛ ኡባቲ

ኢዛስ ያሺሲዛ

ኢሞታ ኤኪ ዪቴ።

12ኢዚ ኦቶሬቲዛ ዳናታ ካዉሻና፤

ዎልቃማ ካዎታካ ኢዚ ያሺሳና።