ዬ ማጻፋ 75

ኣሳፌይ ዛማሬታ ካቦስ፥ «ይሶፋ» ጌቴቲዛ ዲ ጊጊሶን ሺሺዳ ማዛሙሬ

1ኣቤት ጾሳዉ!

ኔና ጋላቶስ፤

ኔ ኑስ ማታ ጊዲዳ ጊሻስ

ኔ ሱንስ ጋላታ ሺሾስ፤

ኣሳይካ ማላሊሲዛ

ኔ ኦሶ ኡባ ጊሻስ

ሃሳዬስ።

2ጾሲ፥ «ታ ባራ ዎዳ ዎዴን

ሱሬ ፒርዳ ፒርዳናይ ታና።

3ሳኣይኔ ኢዛ ቦላ ዲዛ

ሜታ ኡባይ ቃጺዛ ዎዴ

ሳኣ ቱሳታ ሚን

ኤሲዳይ ታና።

4ኦቶራንቻታ፥ ‹ኦቶሬቶፍቴ› ጋይስ፤

ኢታታካ፥ ‹ኢንቴ ማካሎፍቴ።

5ኔ ካጬ ኦቶሮን

ቁ ቁ ሂስቶፋ፤

ኔ ቆ ቃ

ሃሳዮፓ› ጋይስ» ጌስ።

6ቦንቾይ ኣርሼይ ሞኪዛሶፔ

ዎይኮ ዉሊዛሶፔ

ዎይኮ ባዞፌ ዬና።

7ጊዶ ኣቲን ሱሬ ፒርዲዛይ ጾሳ፤

ኢዚ ኢሳ ቦላ ፒርዴስ፤

ኢሳ ጺሊሴስ።

8ጎዳ ኩሼን ዋንጫይ ዴስ፤

ኢዛን ሆሞቲዛ ሃንቆ ዎይኔ

ኡሺ ኩሚ ኡቲዴስ፤

ሄ ኡሻዛ ጌዴ ካሬ ጉሲዴስ፤

ሳኣን ዲዛ ማካላንቻቲ

ሄሳ ኡዪዳ፤

ኢስቲ ኦርጮካ

ኣሾንታ ጮንጎርሲዳ።

9ታኒ ጊዲኮ ሃይሳ

ሜርናስ ኣዋጃና፤

ያቆቤ ጾሳካ ማዛሙሬን ሳባና።

10ታኒ ኢታታ ካጬ ኡባ ሜንና፤

ጺሎታ ካጬ ጊዲኮ

ቁ ቁ ሂስታና።