ዬ ማጻፋ 77

ኣሳፌይ ዛማሬታ ካቦ ኤዶታኔስ ዬጺዳ ማዛሙሬ

1ታኒ ታ ቃላ ቁ ሂስታዳ

ጾሳኮ ዋሳይስ፤

ታና ሲያና ማላ

ታ ኢዛ ዎሳይስ።

2ታኒ ሜቶቲዳ ጋላስ ጾሳ ኮያይስ፤

ኦማርሲካ ሼምፖንታ

ታ ኩሼታ ኢዛኮ ሚጫይስ፤

ጊዲኮካ ታኒ ሚኔታናስ

ዳንዳያቤኬ።

3ኣቤት ጾሳዉ!

ታ ኔና ቆፓሼ ጬጫይስ፤

ታ ዩሻ ቆፓሼ

ኬሃ ዳቡርዴስ።

4ታ ኣይፌፔ ስኮ ይሳዳሳ፤

ታስ ጋናዚ

ያና ጋካናስ ጬጫዲስ።

5ታኒ ኣዳ ዎዴታ ቆፓዲስ፤

ካሴ ኣዳ

ላይታካ ሃሳኣዲስ።

6ታ ዬጺዳይሳ ጊዶ

ዩሻ ቆፓዲስ፤

ታኒ ዎዚናን ኣኬካዲስ፤

ታ ኣያናይ ታና ዴንን፥

7«ጎዳይ ኑና ሜርናስ

ዬጊ ኣጋኔ?

ሃይሳፌ ጉዬ

ኑና ሎኦ ቤሴኔ?

8ኑና ሲቂዛይሳ ሙሌራ ኣጊዴ?

ኢዚ ዮቲዳ ሂዶታይ ሻሬቲዴ?

9ጾሲ ባ ማሪዛይሳ ኣጊዴ?

ሃንቆን ባ ቃታ ኣጊዴ?»

ጋ ኦይቻይስ።

10ኡባፌ ቃ ጾሳዉ!

ታና ቆሂዳይ፥

ኔ ኡሻቻ ኩሼይ

ካሴይሳ

ኑና ማዶንታ ኣጎይሳ።

11ጎዳዉ! ኔ ኦሶታ

ታኒ ቆፓና፤

ኔኒ ቤኒ ዎዴ ኦዳ

ማላሊሲዛ ኦሶታ ኡባ

ታ ዩሻ ቆፓና።

12ኔ ኦዳ ኡባ

ታኒ ዛራ ዛራዳ ቆፓና፤

ኔ ዎልቃማ ኦሶታ ኡባ

ታኒ ኣኬካና።

13ኣቤት ጾሳዉ!

ኔ ኦጌይ ጌሻ፤

ኑ ጾሳ ማላ

ሃራ ጊታ ጾሲ ኦኔ?

14ኔኒ ማላሊሲዛዝ ኦዛ ጾሳ፤

ዴሬታ ጊዶን

ኔ ዎልቃ ቤሳሳ።

15ያቆቤኔ ዮሴፌ

ዜሬ ጊዲዳ ኔ ዴሬታ

ኔኒ ኔ ዎልቃን ዎዛዳሳ።

16ኣቤት ጾሳዉ!

ሃቲ ኔና ቤኢዳ፤

ሃቲ ኔና ቤኢዲ ያዪዳ፤

ጪማ ኣባቲካ ኮኮሪዳ።

17ሻራቲ ኢራ ኢሚዳ፤

ሳሎን ዳዳይ ጉሚዴስ፤

ዎልቃን ዋዋጪ ጊዴስ።

18ኔ ዳዳ ጉንይ

ጎቴ ጫርኮ ጊዶን ኮሺሚዴስ፤

ኔ ዎልቃን ጶሌ

ሳኣ ፖኢሲዴስ፤

ቢታይካ ቃጺ ኮኮሪዴስ።

19ኔኒ ኣባ ጊዶራ ሄሜታሳ፤

ጪማ ኣባ ጊዶራ

ካንሳ፤

ጊዲኮካ ኔ ቢዳ ጌዶይ

ኤሬቴና።

20ሙሴኔ ኣሮኔ ኩሼን

ኔኒ ኔ ዴሬዛ ዶርሳ

ዉዴ ማላ ካሌዳሳ።