ዬ ማጻፋ 147

1ጎዳይ ጋላቴቶ!

ኑ ጾሳ ዬን ሳቦይ

ኣይ ማላ ሎኦ!

ኢዛ ጋላቲዛይሲ ኡፋይሴስ፤

ሄሲካ ኢዛስ ቤሴስ።

2ጎዳይ ዬሩሳላሜ ኦራጺሳና፤

ኢስራኤሌፔ ቤቲዳይታካ

ሺሻና።

3ዎዚናይ ሜቂዳይታ ኢዚ ኮሌስ፤

ኢስታ ማዱንካ

ኢዚ ፓስ።

4ኢዚ ሳሎ ጾሊንቴታ ቆዳ ኤሬስ፤

ኢሳ ኢሳ ኢዛ ሱንን

ሱንን ጼይጌስ።

5ኑ ጎዳይ ጊታ፤

ኢዚ ኬሂፔ ዎልቃማ፤

ኢዛ ኤራቴስ ዛዋይ ዴና።

6ጎዳይ ካቲዳይታ ቦንቼስ፤

ጊዶ ኣቲን ኢታታ ካዉሼስ።

7ጎዳስ ጋላታ ማዛሙሬ ዬጺቴ፤

ኑ ጾሳስ ማሲንቆ

ሾጪሼ ጋላቲቴ።

8ኢዚ ሳሎ ሻራ ማይዜስ፤

ሳኣስ ኢራ ቡኪሴስ፤

ዙማታ ቦላካ ማታ ሞኪሴስ።

9ሜዶሳሲኔ ቁሮ ዬሎታስ

ሚዛ ሚሽ ኢዚ ኢሜስ።

10ኢዚ ኡፋዬቲዛይ

ፓራታ ዎልቃኒኔ

ቶራንቻታ

ሚኖቴን ጊዴና።

11ጎዳይ ባስ ያዪዛይታኒኔ

ኢዛ ሲቆን

ኣማኔቲዛይታን ኡፋዬቴስ።

12ዬሩሳላሜ ካታማዬ!

ጎዳ ጋላታ!

ሃኔ ጺዮኔ! ኔ ጾሳ ሳባ!

13ኢዚ ኔ ፔንጌ ኮላታ ሚንስ፤

ኔ ጊዶን ዲዛ ኔ ናይታ ኣንጄስ።

14ኢዚ ኔ ዛዋ ሳሮቴን ናጌስ፤

ኔና ኬሂፔ ሎኢዛ

ጊስቴ ካልሴስ።

15ኢዚ ባ ኪታ ሳኣስ ኪቴስ፤

ኢዛ ቃላይካ ኤሶን ጋኬስ።

16ኢዚ ሻች ኣፋላ ማላ ሚጬስ፤

ኬንቾካ ቢዲን ማላ

ላሌስ።

17ኢዚ ሻች ሹቻ ማላ

ዱጌ ዬዳና፤

ሄ ሞጬዛን ኤቃናስ

ኦኒኔ ዳንዳዬና።

18ኢዚ ባ ቃላ ኪቲዲ

ሻቻ ማዪሴስ።

ኢዚ ጫርኮ ጫርኪሲን

ሃ ጎጌስ።

19ኢዚ ባ ቃላ ያቆቤ ዜሬስ

ባ ማራኔ ዎጋ

ኢስራኤሌ ኣሳስ ቆንጪሴስ።

20ኢዚ ሄሳ ማላ

ሃራ ካዎቴታስ

ኦቤና፤

ኢስቲ ኢዛ ዎጋ ኤሬቴና።

ጎዳይ ጋላቴቶ!