ዬ ማጻፋ 146

ኣሺዛ ጾሳስ ሺቂዳ ጋላታ

1ጎዳይ ጋላቴቶ!

ታ ሼምፖዬ፥

ጎዳ ጋላታ!

2ታ ዴኦ ላይ ኡባን

ታኒ ጎዳ ጋላታና፤

ታኒ ሼምፖራ ፓጻ ዲዛ ዎዴ

ኡባን ታ ጾሳ ሳባና።

3ዴሬ ኣይሲዛይታን ኣማኔቶፍቴ፤

ኣስ ኣሻናዉ ዳንዳዮንታ

ኣሾ ማይኢዳ

ሜታታን ጬቄቶፍቴ።

4ኢስታ ሼምፖይ ኬዚዛ ዎዴ

ኢስቲ ቢታን ሲማና፤

ኢስታ ሃልቾይ ኡባይ

ሄ ጋላስ ኣታና።

5ያቆቤ ጾሳይ ማዲዛ ኣሲ

ባ ሂዶታካ ባ ጎዳ ቦላ

ዎዳ ኣሲ ኣንጄቲዳዴ።

6ጎዳይ ሳሎኔ ሳኣ፥

ጊታ ኣባኔ ኢስታ

ጊዶን ዲዛ ኡባ

ሜዳይሳ፤

ኢዚ ባ ኣማኔቴ

ሜርናስ ናጊዛይሳ።1

7ኢዚ ቆሄቲዳይታስ ፒርዲዛይሳ፤

ጋፊዳይታ ሚዚ ካልሲዛይሳ።

ጎዳይ ቃሼቲዳይታ

ቢርሺ ዬዲዛይሳ፤

8ጎዳይ ቆቄታ ጼሊሴስ።

ጎዳይ ኩንዲዳይታ ዴንስ፤

ጎዳይ ጺሎታካ ሲቄስ።

9ጎዳይ ቤቴ ኣሳታ ናጌስ።

ኣምኤታኔ ዪኦ ናይታ ማዴስ፤

ጊዶ ኣቲን ኢታታ ኦጌ ይሴስ።

10ጎዳይ ሜርናስ ካዎ፤

ጺዮኔ! ኔ ጾሲ

ዬሌታፔ ዬሌታ ጋካናስ

ካዎታና።

ጎዳይ ጋላቴቶ!