ዬ ማጻፋ 145

ዳዊቲ ዬጺዳ ጋላታ ማዛሙሬ

1ኣቤት ታ ካዎ ጾሳዉ!

ታኒ ኔና

ቁ ቁ ሂስታና፤

ኔ ሱን

ሜርናስካ ጋላታና።

2ታኒ ኔና ኡባ ጋላስ ሳባና፤

ኔ ሱንካ

ሜርናስ ጋላታና።

3ጎዳይ ጊታ፤

ጊታ ጋላታይ ኢዛስ ቤሴስ፤

ኢዛ ጊታቴይ

ኣሳ ቆፋፔ ቦላ።

4ኢሲ ዬሌታይ ካሊዛ ዬሌታስ

ኔ ኦዳ ኦሶ ዮቴስ፤

ማላሊሲዛ ኔ ኦሶታካ

ቆንጪሳና።

5ኢስቲ ኔ ቦንቾኔ

ኔ ጊታ ቴማ ሃሳያና፤

ታኒካ ማላሊሲዛ ኔ ኦሶዛ

ዛራ ዛራ ቆፓና።

6ኣሳይ ማላሊሲዛ ኔ ኦሶዛ

ጊታቴ ጊሻስ

ሃሳዬታና፤

ታኒካ ኔ ጊታቴ ኣዋጃና።

7ኢስቲ ኔ ኪያቴ ዳሮዛ ዮታና፤

ኔ ጺሎቴ

ኡፋይሳን ዬጻና።

8ጎዳይ ቃቲዛይሳኔ

ማሪዛይሳ፤

ኢዚ ሃንቄታናስ

ኤሶቶንታይሳኔ

ሲቆይ ኩሚዳይሳ።

9ጎዳይ ኡባስ ኪያ፤

ኢዚ ባ ሜዳ

ኡባስ ቃቲዛይሳ።

10ኣቤት ጎዳዉ!

ሜታ ኡባይ ኔና ጋላታና፤

ኔ ዴሬይ ኡባይካ

ኔና ሳባና።

11ኢስቲ ኔ ካዎቴ

ቦንቾ ጊሻስ ሃሳያና፤

ኔ ዎልቃ ጊሻስ ዮታና።

12ሄሳን ኔ ዎልቃማ ኦሶታኔ

ኔ ካዎቴ

ቴማ ቦንቾዛ

ኢስቲ ኤሪሳና።

13ዬሌታፔ ዬሌታ ጋካናስ

ኔ ሃራና፤

ኔ ካዎቴይ ሜርናሳ።

ጎዳይ ባ ጊዳ ቃላን

ኣማኔቲዛይሳ፤

ኢዚ ባ ኦሶ ኡባን ኪያ።

14ጎዳይ ጋንዲጋርዛይታ ካፌስ፤

ኩንዲዳይታካ ዴንስ።

15ኡባ ኣይፌይ ኔኮ ጼሌስ፤

ኢስታስ ኮሺዛ ዎዴን

ኔኒ ኢስታስ ቁማ ኢማሳ።

16ኔኒ ኔ ኩሼ ሚጫዳ

ሼምፖራ ፓጻ ዲዛ ኡባ

ኣሞ ኩንሳ።

17ጎዳይ ባ ኦጌ ኡባን ጺሎ፤

ኢዚ ባ ኦሶ ኡባን ኪያ።

18ጎዳይ ባና ጼይጊዛይታስ

ኡባስ ማታ፤

ዎዚናፔ ጼይጊዛ ኡባስ

ማታን ዴስ።

19ኢዚ ባስ ያዪዛ ኡባስ

ኣሞ ኩንስ።

ቃሴ ኢዚ ኢስታ ዋሶዛ ሲዪዲ

ኢስታ ኣሼስ።

20ጎዳይ ባና ሲቂዛይታ

ኡባ ናጌስ፤

ጊዶ ኣቲን ኢታታ

ኡባ ይሳና።

21ታኒ ታ ዶናን ጎዳ ጋላታና።

ሜታ ኡባይ

ኢዛ ጌሻ ሱን

ሜሪ ሜርናስ ጋላቶ!