ጌሻ ማጻፋ
ዬ ማጻፋ 148
ጎዳይ ጋላቴቶ!
ሳሎን ዴኢዛይቶ! ጎዳ ጋላቲቴ፤
ቦላ ቃን ዴኢዛይቶ!
ኢዛ ሳቢቴ።
ኢንቴኖ ኢዛ ኪታንቻቶ!
ኡባይ ኢዛ ጋላቲቴ፤
ሳሎን ዴኢዛ ኢዛ ኦላንቻቶ!
ኡባይ ኢዛ ጋላቲቴ።
ኣርሼይኔ ኣጊናይ ኢዛ ጋላቲቴ፤
ፖኢሲዛ ጾሊንቴቶ!
ኡባይ ኢዛ ጋላቲቴ።
ኢንቴኖ ኡባፌ ቦላ ቃን
ዲዛ ሳሎቶ! ኢዛ ጋላቲቴ፤
ሳሎ ጉፋንፌ ቦላራ ዲዛ
ሃቶ! ኢዛ ሳቢቴ።
ኢዚ ኣዛዚን ኢስቲ ኡባይካ
ሜቲዳ ጊሻስ
ኡባቲ ጎዳ
ሱን ጋላቴቶ!
ኢዚ ኢስታ ኢስቲ ዲዛሶን
ሜሪ ሜርናስ
ሚን ዎዴስ፤
ኢዚ ኢስታስ ላሜቶንታ
ዎጋ ኢሚዴስ።
ሳኣን ዴኢዛይቶ! ጎዳ ጋላቲቴ!
ኣባ ጊዶን ዲዛ
ጊታ ሜቴቲኔ
ዎጋ ጊታ ኣባ ጪማቲ
ኡባይካ ኢዛ ሳቢቴ።
ዎልቃንኔ ሻቺ፥
ኬንቾይኔ ጉባናይ፥
ኢዛ ኣዛዞ ፖሊዛ ጎቴ ጫርኮቲ
ኡባቲካ ኢዛ ጋላቲቴ።
ዙማቶ፥ ዙምቡላቶ፥
ኣይፌ ኣይፊዛ ሚቶ፥
ዚጋቶ ኡባቲካ ኢዛ ጋላቲቴ።
ሜሄቶ፥ ዶኣቶ፥
ሳኣራ ጎሼቲዛ ሜታቶ!
ፓሊዛ ካፎቶ ኡባቲካ
ኢዛ ጋላቲቴ።
ሳኣ ካዎቶ፥ ካዎቴቶ!
ዳናቶ፥ ዴሬ ሃሪዛይቶ!
ኡባቲካ ኢዛ ጋላቲቴ።
ፓንቶ፥ ጌላኦቶ፥
ጪማቶ፥ ናይቶ!
ኡባቲካ ኢዛ ጋላቲቴ።
ኢዛ ሱን ኡባ ቦላ ቃ፤
ኢዛ ቦንቾይ
ሳኣፔኔ ሳሎፔ ቦላ፤
ሄሳ ጊሻስ ሃይቲ ኡባይ
ኢዛ ሱን ጋላቴቶ።
ኢዛ ባጋ ጊዲዳ ኢስራኤሌ ኣሳቲ
ኢዛ ጋላታና ማላ
ኢዚ ኢስታ ካጬ ኬሲዴስ።
ጎዳይ ጋላቴቶ!
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.