योहेजकेल 31

मिसर देसोन बोराबोरी देवदारोन झाड़ सी

1इग्यारवे सालोन तीसरे मोहनेन पेहले दाहड़े योहोवान यो बुल मारे यां पुग्यो: 2हे मानसोन ओवलियाद, मिसर देसोन राजा फिरोन आरु हेरा मानसो काजे कोव,

आपसी बोड़ाय मा तु कुनी सारकु छे।

3देख, ओस्सुर ते लोबानोनोन एक देवदार होतो जेरा

घाटाळा घाटाळा डाळ्या, झाजलो साहवो कोरे आरु मोटली उची होती:

आरु हेरी फुनगी वादळाम लोगुन पुगतेली।

4पानी हेनाक वोदाड़्यो,

आरु उंडला पानीन कारण होयो उचो होयो,

जेरेसी नोंदी हेरा जागान च्यारु मेर उहुवतेली;

आरु हेरा गोटार निकळीन खोयड़ान आखा झाड़ोन चा पुगतेली।

5ओस कोरीन तेरी उचाय खोयोड़ान आखा झाड़ो सी जादा होयी;

तेरा छिगा बेसका होया,

आरु डाळ्या नांबा होय गोया, काहकी जोत्यार होयी निकळी,

तोत्यार हेनुक बेसको पानी जोड़्यो।

6हेरा छिगाम आखे भातिन चिल्‌ला आवीन बोसतेला,

आरु हेरा डाळ्यान नेचा खोयड़ान आखे भातिन जीव उबेजतला;

आरु हेरा साहवाम आखा मोटली जाती रोवतेली।

7होये आपसी बोड़ाय आरु आपसी

डाळ्यान नांबायीन कारन घाटाळो होयो;

काहाकी हेरा मुवे बेसका पानीन धोड़े होता।

8परमेश्वरोन वाड़ीन देवदार वि हेनुक नी साताड़ सोकतेला,

सोनोबर हेरा छिगान जोसा वी नी होता,

आरु नी ओर्मोन झाड़ हेरा डाळ्यान जोसा होता;

परमेश्वरोन वाड़ीन वी काहनो झाड़ घाटाळाम हेरे बोराबोर नी होतो।

9हांव हेरा डाळ्याक बेसका घाटाळा बोनावलो होतो,

यां लोगुन कि ओदोनोन आखा झाड़े जे परमेश्वरोन वाड़ीम होता, हेरेसी घाड़ाय कोरता होता।

10ओस कोरीन परमेश्वर योहोवा ओसु कोवलु छे: हेरी उचाय जी वोद गोय, आरु हेरी फुनगी जी वादळाम लोगुन पुगली छे, आरु आपसी उचायीन कारण हेरो मोन घाड़ाय सी फुल गोयलो छे। 11कोरीन मुलुकोम जो ताकोतवाळो छे, हांव तेरात हातोम हेनाक कोर दिस, आरु होयो छाचिन हेरेसी भुंडोत वेवहार कोरसे। हेरा भुनला कामोन कारण हांव हेनाक निकाळ देदलु छे। 12पारका, जे जातिम भयानक मानसे छे, होये हेनुक काटिन छुड़ देसे, हेरा डाळ्या बोयड़ा पोर, आरु आखा तोराय मा पाड़ नाखसे, आरु हेरा डाळ्या देसोन आखा खुदराम टुटला पोड़ला रोसे, आरु देस देसोन आखा मानसे हेरा साहवाक छुड़ीन जात रोवसे। 13हेनु पोड़ला झाड़ो पोर वादळान आखा चिल्‌ला बोस्या कोरसे, आरु हेरा डाळ्या उपोर खोयड़ान आखा जिवे रोवने लागसे। 14यो ओतरान कोरीन होयो की पानी धोड़ेन आखा झाड़ो मा गोथो कुय आपसी उचाय नी वोदाड़े, नी आपसी फुनगीक वादळाम लोगुन पुगाड़े, आरु हेनुम सी जोतरा पानीक हात कोरीन वातड़ा होय गोयला छे, चे उचा होयनेन कारण मुनका नी उचा कोर्या; काहाकी होये वी आखा की आखा बिड़ाम गाड़ला मानसो सारका मोरलान होकोम कोरीन ओधोलोक मा नाख देसे।

15परमेश्वर योहोवा ओसु कोवे: जेने दाहड़े होयो ओधोलोक मा उतरी गोयो, तेनेत दाहड़े हांव विलाप कोरायु आरु उंडला दोरीयाक ढाक देदु, आरु नोंदिन बेसको पानी रुकाय गोयो: आरु हेरे कारण हांव लोबानोनोन पोर उदासी कोर देदु, आरु खोयड़ान आखा झाड़े चिमाय गोया। 16जोत्यार हांव हेनुक बिड़ाम गाड़ला धोड़े ओधोलोक मा नाख देदु, तोत्यार हेरा पोड़नेन बुल देस देसोम थोरथोरो होय गोया, आरु ओदोनोन आखा झाड़े मोतलोब लोबानोनोन वारु सी वारु झाड़े, जोतरा सी पानी जोड़तो होतो, हेनु आखाक ओधोलोक मा शांति जोड़ी। 17होये वी हेरे पुठी तोलवार सी मारलान धोड़े ओधोलोक मा उतरी गोया; होये जे हेरा खांदा होता, आरु देस दसोन इचमा हेरा साहवाम रोवता होता।

18ओतरान कोरीन मोहिमा आरु बोड़ायीन वाराम ओदोनोन झाड़ो मा गोथु तु काहना सारकु छे? तु ते ओदोनोन आरु झाड़ो पुठी ओधोलोक ना उतरी जासे, आरु विगुर फातोरकाती वाळा मानसोन इचमा तोलवार सी मारला पुठी पोड़ला रोवसे। फिरोन आपसी गोड़दी पुठी ओसोत होयसे, परमेश्वर योहोवान यो बुल छे।