परमेश्वरन सत्य वचन
योहेजकेल 32
मिसर देसोन राजान बोराबोरी मोगर सी
बारवे सालोन बारवे मोहनेन पेहले दाहड़े योहोवान यो बुल मारें यां पुग्यो: हे मानसोन ओवलियाद, मिसर देसोन राजा फिरोनोन वाराम दु:खन गीत बोनावीन हेनाक सोमवाड़: देस देसोम तुसेक जुवान नाहार सोमज्या, पुन तु दोरीयान मोगोरोन तोसु छे: तु आपसी नोंदिम जुरे पोड़े, आरु हेंदरा पानीन पायो सीं रोंदवीन डोहवो कोर देदु।
परमेश्वर योहोवा ओसु कोवे: हांव बेसका मानसोक एकठा कोरलु छे। हेमी हांव तारे उपोर आपसी जाळ नाखीस। तोत्यार होये मानसे तुमुक मोटली जावीम हापकी लेसे। तोत्यार हांव सुकला जागाम पाड़ दीस। हांव तुमुक खेतोम नांख दीस। हांव आखा चिल्लाक तुसेक खाने जुगु बुलावीस। हांव होरीक जागे सी जोंगली जोनवारीयाक तुसेक खाने आरु पेट भोरीन खाने जुगु बुलाविस। हांव तारा मांस काजे बोयड़ा पोर खोव्वी दीस। हांव तारा धोड़ सी घाटीक भोर दीस। हांव तारा डीलोन उहुवतेला लुहुय सी बोयड़ा आरु खोयड़ाक पानी वावे ओसु वाय दीस, आरु नोंदी ने खुदरा तारा लुहुय सी भोराय जासे। जेने टेमे हां तुसेक सार दीस, तेने टेमे हांव वादळाक ढाक दीस आरु ताराक धुंदरो कोर दिस; हांव दाहड़ाक वादळाम सी साताड़ दीस, आरु चांदोक आपसो विजाळो नी आपे। हांव आखी चोमेकन्या विजावा काजे वादळाम, तुमरे उपोर काळ्ळो बोनावीस। हांव तुमरा आखा देसोम आंदारो कोर दिस। पोरबु योहोवान यो बुल छे।
जोत्यार हाव तारा विनासोन खोबोर देस देसोम आरु तारा ओनजान्या देसोम खोव्वी दिस, तोत्यार मोटा मोटा देसोन मानसोन मोनोम रीस उपजाड़ीस। हांव बेसकी जाति तारे कारण बिहता कोर दिस, आरु जोत्यार हांव हेंदरा राजान ओगोळ आपसी तोलवार मुकलीस, तोत्यार तारे कारण हेंदरा डीलोन झोटा उबा होय जासे, आरु तारे पोड़नेन दाहड़े होये आपसा आपसा जिवो जुगु कापता रोवसे।
काहाकी परमेश्वर योहोवा ओसु कोवे: बेबीलोनोन राजान तोलवार तारे पोर चालसे। हांव तारी गोड़दीन ओसा लोड़ायन्याक तोलवारोन लारे पाड़ीन जे आखी जातिम घोनजुरे छे। होये मिसर देसम घाड़ाय काजे तुड़से, आरु हेरी आखी गोड़ सी नास होयसे। मिसर देसोन नोंदिन आसरे बेसका जोनवारे छे। हांव एनु जोनवारोक वी नास कोरीस! मानसोन ओगला जीवोन मा, आपसा पायो सी पानीक भुंडो नी कोरसे। गायोक खुर्या ओगला दाहड़ाम पानीक डोहवो नी कोरसे। ऐर वाद हां हेंदरो पानी आछो कोर दिस, आरु हेंदरी नोंदीन पानीक तेलोन तोसो उहवाड़ीस, परमेश्वर योहोवान यो बुल छे। जोत्यार हांव मिसर देसोक उजाड़ कोर दिस आरु जेरेसी होयो भोरपुर छे, हेरेसी हेनाक छेटो कोर दीस, जोत्यार हांव हेरा आखा रोवने वाळाक मारीस तोत्यार होये जान लेसे की हांव योहोवा छे।
मानसोन विलाप कोरने जुगु विलापोन गीन यो छे; देस देसोन पुरायटा इना गीत काजे गावसे; मिसर देसोन आरु हेरी आखी गोड़दीन वाराम चे योत विलापगीत गावसे, परमेश्वर योहोवान यो बुल छे।
मोरलान कोळ
ओळी बारवे सालोन पेहले मोहनेन पोंदरवे दाहड़े योहोवान यो बुल मारे यां पुग्यो: हे मानसोन ओवलियाद, मिसर देसोन गोड़दी जुगु हाय हाय कोर, आरु हेनाक ताकोतवाळी देसोन पोरायटा भेळ बिड़ाम गाड़लान चां नेहेड़ली कोळोम उतार। तु कुनी सी वारु छे। तु उतरीन विगुर फातोरकाती वाळा पुठी पोड़ रोव। होये तोलवार सी मोरलान इचमा पोड़से, हेनु जुगु तोलवार टाकली छे; कोरीन मिसर देसोक हेरी आखी गोड़दी भेळ रोगड़ीन ली जावु। ताकोत वावा सुरवीर हेरेसी आरु हेरा चेला सी नेहेड़ली कोवीम वात कोरसु; चे विगुर फातोरकातीन मानसे चां तोलवार सी मोर पोड़ला छे।
आपसी आखी सेना भेळ ओस्सुर वी चां छे, हेरा बिड़ा हेरे च्यारु मेर छे; आखा की आखा तोलवार सी मोर गोयला छे। हेरा बिड़ा खाडान खुनाम बोनला छे, आरु हेरा बिड़ान च्यारु मेर हेरी सोभा छे; होये आखा की आखा जे जीवायीन जागाम बिक उपजाड़ता होता, हेमी तोलवार सी मोरला पोड़ रोया।
होंया एलाम छे, आरु हेरा बिड़ान च्यारु मेर हेरी आखी गोड़दी छे; होये आखा की आखा तोलवार सी मोर गोयला छे, होये विगुर फातोरकाती नेहेड़ली कोळ मा उतरी गोयला छे; होये जीवायीन कोळ मा बिक उपजाड़, पुन हेमी बिड़ाम आरु गाड़ला पुठी हेंदरा मुयो पोर सी लाज छावायली छे। होये एलाम आरु हेरा सिपायड़ा जुगु, जे लोड़ाय मा मोर गोयला छे, गुदड़ो लागाड़ देदला छे। हेरा बिड़ान च्यारु मेर छे, होये आखा की आखा विगुर फातोरकाती वाळा तोलवार सी मार नाखला छे; होये जीवायीन कोळ मा बिक उपजाड़ता होता, पुन हेमी बिड़ाम आरु गाड़ला पुठी हेंदरा मुयो पोर लाज छे; आरु होये मोरलान इचमा मेकला छे।
होंया आखी गोड़दी मेशेक आरु तुबल छे, हेरे च्यारु मेर बिड़ा छे; होये आखा की आखा विगुर फातोरकाती वाळा तोलवार सी मोर गोयला, काहाकी जीवायीन कोळ मा होये बिक उपजाड़ता होता। पुन हेमी होये ताकोतवाळा मानसोन पुठी लुटला छे जे बेसका पेहलुन मोरला होता। होये आपसी लोड़ायीन होतीयार पुठी गाड़ला होता। हेंदरी तोलवार हेंदरा मुनका तोळे मेकसे। पुन हेंदरा पाप हेंदरा हाड़का पोर छे। काहा काहाकी जोत्यार होये जीवतेला होता, होये मानसोक बिहाड़्या।
कोरीन तु वी विगुर फातोरकाती वाळा पुठी होयीन तोलवार सी मोरला पुठी पोड़लो रोवसे।
होंया एदोम आरु हेरो राजा आरु हेरा आखा डाहला छे, जे बेसका ताकोतवाळा होयने पोर वी तोलवार सी मोरला पुठी मेकला छे; खाडा मा गाड़ला विगुर फातोरकाती वाळा मानसो पुठी वी पोड़ला रोवसे।
होंया बोखेवरे भेनीन आखा डाहला आरु आखा सीदोनी वी छे जे मोरला पुठी उतरी गोया; होये आपसा ताकोत सी बिहाड़ता होता, पुन हेमी होये लाजवाया आरु तोलवार सी आरु मोरला पुठी होये विगुर फातोरकाती वाळा पोड़ला छे, आरु बिड़ाम दिसरा गाड़ला पुठी हेंदरा मुयो पोर वी लाज छावायली छे। हेनुक देखीन फिरोन वी आपसी आखी गोड़दीन वाराम शांती जोड़से, हाव फिरोन आरु हेरी आखी सेना जी तोलवार सी मोर गोयली छे, परमेश्वर योहोवान यो बुल छे।
काहाकी हांव फिरोनोन कोरता जीवायीन कोळ मा बिहाड़तेला; कोरीन होयो आखी गोड़दी भेळ तोलवार सी आरु मोरला भेळ विगुर फातोरकाती वाळान इचमा लुटाड़से, परमेश्वर योहोवान यो बुल छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.