परमेश्वरन सत्य वचन
योहेजकेल 30
परमेश्वर मिसर देस काजे डोन आपसे
ओळी परमेश्वर योहोवान यो बुल मारें यां पुग्यो: हे मानसोन ओवलियाद, ओगावयती वात कोरीन कोव, परमेश्वर योहोवा ओसु कोवे:
हाय, हाय कोरु, हाय तेना दाहड़ा पोर!
काहाकी तेने दाहड़े मोतलोप योहोवान दाहड़ु सोतेत छे;
चो दाहड़ो वादळान, आरु जातीक डोनोन टेम होयसे।
मिसर देस मा तोलवार चालसे,
आरु जोत्यार मिसर देसोन मानसे तोलवार सी मोरीन पोड़से,
तोत्यार कुस मा वी काठो आय पोड़से,
मानसे मिसर काजे लुट ली जासे,
आरु हेरी नेव काजे उथलाय देसे।
कुस, पुत, लुद, आरु आखा दोगले, आरु कुब मानसे आरु वायदा बांदला देसोम रोवन्या, मिसरी देसो पुठी तोलवार सी मार नाख्या जासे।
योहोवा ओसु कोवे: मिसर देस काजे सोमावने वाळा वी हिट पोड़से, आरु आपसी ताकोत पोर मिसर देस सी घाड़ायतेला, चे टुटसे; मिग्दोल सी लीन सोवेने लोगुन हेरा रोवन्याक तोलवार सी मार नाखसे, परमेश्वर योहोवान यो बुल छे। होये उजड़ला देसोन इचमा उजड़ला रोवसे, आरु हेंदरा सोहोर उजाड़ कोरला सोहोर मा गिनाय जासे। जोत्यार हांव मिसर मा आगठो लागाड़ीस आरु हेरा आखा सात देन्या नास होयसे, तोत्यार होये जान लेसे सी हांव योहोवा छे।
तेने टेमे मारे ओगोळ सी दुत ढोन्डिया पोर चोहड़ीन विगुर बिहयेत निकोळसे आरु कुसीयक बीहाड़से; आरु तेन टेम पोर ओसी पीड़ा पोड़से जोसो कि मिसर देसोक डोनोन टेम; काहाकी देख, चो दाहड़ो आवेत!
परमेश्वर योहोवा ओसु कोवे: हांव बेबीलोनोन राजा नोबुकदनेस्सरन हातो सी मिसर देसोन गोड़दीक नास कोराय दीस। चो आपसा मानसो भेळ, जी आखी जातीन सी विनछेव्यो छे, तेना देसोन नास कोरने पुगाड़से; आरु होये मिसर देसोन विरुद् तोलवार हापकीन देसोक मोरला सी भोर देसे। हांव नोंदीक सुकाड़ दीस, आरु देसोन भुनला मानसोन हातोम कोर दिस; आरु हांव पारका देसोन लारे देसोक, आरु जो काहिन हेरेम छे, उजाड़ मांगीस; हांव योहोवात ओसु कोवलु छे।
परमेश्वर योहोवा ओसु कोवे: हांव नोप मा सी मुरतियाक नास कोरीस आरु हेरेम मुरतियाक रोवने नी दोम; ओळी कुदु डाहलो मिसर देसोम नी उठसे; आरु हांव मिसर देसोम बिक बोनावीस। हांव पोत्रोस काजे उजाड़ीस, आरु सोओन मा आगठो लागाड़ीस, आरु सोहोर काजे डोन आपीस। सीन सोहोर जो मिसर देसोन किलान जागु छे, तेना पोर हांव आपसी रीस भोड़कावीस, आरु नो काजे गोड़दी काजे सार दीस। हांव मिसर देस मा आगठो लागाड़ीस; सीन सोहोर बेसको थोरथोरो होयसे; आरु नो फाड़ नाखीस आरु नोप सोहरोन विरुद दिसुत उठसे। ओन आरु पीवेसेतोन जुवान तोलवार सी पोड़से आरु ये सोहोर बांदवाय मा जात रोहसे। जोत्यार हांव मिसर देसोन जुड़ाक तोहोपनहेस मा तुड़ीस, तोत्यार हेरेम दिसुत आंधारो होयसे, आरु हेरा दोमो पोर होयो घाड़ाय कोरे, चो नास होय जासे; हेरे पोर आंधारो छावाय जासे आरु हेरा पोरायटा बांदवाय मा जात रोवसे। ओस कोरीन हांव मिसर देस वाळाक डोन आपीस। आरु होये जान लेसे की हांव योहोवा छे।
मिसर देसोन राजा कोमजुर्यु होयसे
ओळतेन इग्यारवे सालोन पेहले मोहनेन सातवे दाहड़े योहोवान यो बुल मारें यां पुग्यो: हे मानसोन ओवलियाद, हांव मिसर देसोन राजा फिरोन काजे कोमजुर कोर देदु: आरु देख, नी ते होये जुड़ायली छे, नी हेरे पोर निपलान चोव लागाड़ली छे की होये बांदने सी तोलवार धोरनेन सारको बोने। कोरीन पोरबु योहोवा ओसु कोवे: देख, हांव मिसर देसोन राजा फिरोनन विरुद छे, आरु हेरा वारला आरु टुटला दुयु खांदाक तुड़ीस; आरु तोलवार हेरा हातोम गोथु पाड़ीस। हांव मिसर देसोन मुलुक मुलुकोम रिवन्या तिवन्या कोरीस, आरु देस देस मा वेरविस। हांव बेबीलोनोन राजान मजबुत कोरीन आपसी तोलवार हेरा हातोम आपीस; पुन राजा फिरोनोन खांदाक तुड़ीस, आरु चो हेरे ओगोळ ओसो आयेड़से जोसो मोरने वाळो घायेल आयड़े। हांव बेबीलोनोन राजान खांदाक सोमावीस, आरु फिरोनोन खांदा ढिली पोड़से, तोत्यार होये जानसे की हांव योहोवा छे। जोत्यार हांव बेबीलोनोन राजान हातोम आपसी तोलवार आपीस, तोत्यार होये तेना मिसर देस पोर तोलवार चालाड़से; आरु हांव मिसर देसन मुलुक मुलुकोम रिवन्या तिवन्या कोरीस आरु देस देस मा वेरवी दिस। तोत्यार होये जान लेसे की हांव योहोवा छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.