परमेश्वरन सत्य वचन
योहेजकेल 29
मिसर देसोन विरुद् भोगवानो वोगे गोथी वात
दोसवे सालोन दोसवे मोहनेन बारवे दाहड़े परमेश्वर योहोवान यो बुल मारे यां पुग्यो: हे मानसोन ओवलियाद, आपसो मुख मिसर देसोन राजा फिरोन भेनी कोरीन हेरा आरु मिसर देसोन विरुद् भोगवानो वोगे गोथी वात कोर; ओसु कोव, परमेश्वर योहोवा ओसु कोवे: हे मिसर देसोन राजा फिरोन, हांव तारे विरुद् छे, हे मोटला मोगोर, तु आपसी नोंदीन इचमा पोड़ रोवे, जु कोवलु छे, मारी नोंदी मारे जुगु हांव यी नोंदी बोनावलु छे। हांव तारा जोबड़ाक काट लिस; आरु तारा खालड़ा पोर तारी नोंदीन माछाक गुचड़ान ओसु चिपकाड़ीस। ऐरे वाद हांव तेनुक आरु तारे पुठी तारी नोंदिन आखा माछाक जे तारा खालड़ा पोर चिपेकली रोवसे, खोयड़े हापकी लिस। तोत्यार हांव तुसेक तारी नोंदीन आखा माछा भेळ जोंगोल मा निकाव दिस, आरु तु खोयड़ाम पोड़ला रोवसे; काहने वी रीते सी तुसेक फोम नी राखसे। हांव तुसेक जोंगोलोन जोनवारीया आरु वादळान चिल्लान खानो बोनाय देदलु छे।
तोत्यार मिसर देसोन आखा रोवन्या जान लेसे की हांव योहोवा छे। होये ते इसराएलोन घोराना जुगु कोमजुर लाकड़ान टेकु कोवाया। जोत्यार होये तारे पोर हातोन जुर देदु तोत्यार तु टुट गोयु आरु हेंदरा खांदा उखवीत गोया, आरु जोत्यार होये तुसेक टेकु देदा, तोत्यार तु टुट गोयु, आरु हेंदरा कोड़्यान आखी नोस चोहोड़ गोय। ओस कोरीन पोरबु योहोवा ओसु कोवे: देख, हांव तार पोर तोलवार चालाड़ीस, तारा मानसे आरु ढुरे, आखान नास कोरीस। तोत्यार मिसर देस उजड़लोत उजड़लोत होयसे; आरु होये जान लेसे की हांव योहोवा छे।
तु कोवलु छे, मारी नोदी मारी बोनावली छे, आरु हांव नोंदी काजे बोनावलु छे। ओस कोरीन देख, हांव तारे आरु तारी नोंदीन विरुद् छे आरु मिसर देसोन मिग्दोल सी लिन सोवेने लोगुन पुन कुस देसोन काकोड़ लोगुन उजाड़ुत उजाड़ुत कोर दीस। चावीस साल लोगुन हेरेम मानुस आरु ढुरोन पाय लोगुन नी पोड़से; आरु नी हेरेम काहीन वोससे। चावीस साल लोगुन हांव मिसर देसोन उजड़ला देसोन इचमा उजाड़ दिस; आरु हेरा सोहोर उजड़ला सोहोरोन इचमा उजड़लात रोवसे। हांव मिसर देसोन मुलुक मुलुकोम खोव्ली दिस, आरु देस देसो रिवन्या तिवन्या कोर दिस।
परमेश्वर योहोवा ओसु कोवे: चावीस साल वितनेम हांव मिसर देसोन तेनी जातिन इचमा सी एकठा कोरीस, जेरेम होये रिवन्या तिवन्या होये आरु हांव मिसर देसोन बांदवाय सी छुड़ावीन पोत्रोस देस मा, जे हेंदरी पोयदावारीन जागु छे, ओळी पुगाड़ीस; आरु होंया हेंदरो नानोस मुलुक होय जासे। होयो आखा मुलुक मा नानोस होयसे, आरु ओळी आपसो मुनको आरु जातिन उपोर नी उठसे; काहाकी हांव मिसर देसोक ओसु कोम कोरिस की होये राज राजो पोर ओली राज नी कोरे। होये ओळी इसराएलोन घोराना भुरसान कारण नी होयसे, काहाकि जोत्यार होये ओळी हेंदरे भेनी देखने लागे, तोत्यार होये हेंदरा ओधोरोम काजे फोम कोरसे। तोत्यार होये जान लेसे की हांव परमेश्वर योहोवा छे।
राजा नोबुकदनेस्सर मिसर काजे हारेवसे
ओळी सोत्तावीसवे सालोन पेहले मोहनेन पेहलो दाहड़े योहोवान यो बुल मारे यां पुग्यो: हे मानसोन ओवलियाद, बेबीलोनोन राजा नोबुकदनेस्सर सोर सोहोर काजे हारेवने कोरीन आपसी सेना काजे काठी मेहनोत कोरायो; होरीकोन मुनको टोरगो होय गोयो, आरु होरीकोन खांदान चामड़ो छुलाय गोयो; तेवी हेनुक सोर गोथो नी ते ऐनी काठी काम न दाहड़की जोड़ी आरु नी काय सेना काजे। कोरीन परमेश्वर योहोवा ओसु कोवे: देख, हांव बेबीलोनोन राजा नोबुकदनेस्सर काजे मिसर देस आपीस, आरु होयो गोड़दी काजे ली जासे, आरु हेरो धोन काजे लुटीन आपसो कोर लेसे; एने यी दाहाड़की आपसी सेना काजे जोड़से। हांव हेरा मेहनोतोन बोदले हेनाक मिसर देस ओस कोरीन आपलु छे कि हेये मानसे मारे जुगु काम कोरला, परमेश्वर योहोवान यो बुल छे।
तेने टेमे हांव इसराएलोन घोरानान एक सिंगड़ो उगाड़ीस, आरु हेंदरे इचमा तारो मुय उगाड़ीस। तोत्यार होये जान लेसे की हांव योहोवा छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.