योहेजकेल 28

सोर सोहोरक राजान विरुद् भोगवानो वोगे गोथी वात

1योहोवान यो बुल मारे यां पुग्यो: 2हे मानसोन ओवलियाद, सोर सोहरोन डाहला काजे कोव, परमेश्वर योहोवा ओसु कोवे: तु घाड़स्यु होयी कोवे, हाव भोगवान छे, हांव दोरीयान इचमा परमेश्वरोन जागा पोर बोसलु छे, पुन, कोदाम तु आपसु आपसाक भोगवान सारकु देखाड़े, तेवी तु भोगवान नी, मानुसुत छे। 3तु दानियेल सी जादा ओकोलवाळु ते छे: काहनलो वी भेद तारेसी सातायलो नी होयसे; 4तु आपसी ओकल आरु सोमोजोन लारे धोन हात कोर्यु, आरु आपसो गुदाम सोनो चाँदी मेकलु छे; 5तु मोटी ओकल सी लेनो देनो कोर्यु जेरेसी तारो धोन वोद्‌यो, आरु धोनोन कारण तु घाड़स्यु होय गोयलु छे।

6कोरीन परमेश्वर योहोवा ओसु कोवे; तु जो आपसा मोनोम परमेरश्वर सारकु देखाड़े, 7कोरीन देख, हांव तार पोर ओसा पारका देसोक लोड़ाय कोरावीस, जो आखी जाती सी जादा जुर्ये छे, होये आपसी तोलवार तारी ओकलन सुबा पोर चालाड़से आरु तारी चोमोक दोमोक काजे बिगाड़ देसे। 8होये तुसेक बिड़ाम उतार देसे, आरु तु दोरीयान इचमा मोरला जोसु मोर जायीस। 9तोत्यर, काय तु आपसाक मारनेवाळा ओगोळ कोवतु रोवीस, हांव परमेश्वर छे? तु आपसा घायेल कोरनेवाळान हातोम भोगवान नी, मानुसुत रोवीस। 10तु पारका देसोन हातोम सी विगुर फातोरकाती वाळा मानसोन जासकु मोर जायीस; काहकी हांव ओसु कोवलु छे, परमेश्वर योहोवान यो बुल चे।

सोरोन राजान खोतोम होयनो

11ओळी योहोवान यो बुल मारे यां पुग्यो: 12हे मानसोन ओवलियाद, सोरोन राजान वाराम विलाप गीत बोनावीन हेरेसी कोव; परमेश्वर योहोवा ओसु कोवे: तु ते वारु सी वी वारु छे; तु ओकल सी भोरायलु आरु बेसक घाटाळु छे। 13तु परमेश्वरन ओदोन नावोन वाड़ीम होतु; तारा जुल गोयनो, माणिक, पद्यराग, हीरा, फीरोजा, सुलेमानी मणि, यशब, नीलमणि, मरकद, आरु रातला आखा भातिन मणि आरु सोनान पेहेरन्यो होतो; तारा डोफ आरु बाँसुलियाँ तारेम बोनावली होती; जेने दाहड़े तु बोनाव गोयलु होतु, तेने दाहड़े होये वी तियार कोरला होता। 14हांव तारी गुवाळी जुगु एक इजावावाळो कोरुब दुत निवाड़ कोरलु। तु परमेश्वरन चुखला बोयड़ा पोर रोया कोरतु होतु। तु आगठा सारकु चोमेकनेवाळा मणिन इचमा हिंडतु फिरतु होतु। 15जेने दाहड़े तु बोनायु गोयलु, आरु तेने दाहड़े लोगुन तारेम घाड़ाय कुहराय नी होती, तेने टेमे लोगुन तु आपसी आखी चालचालोन मा विनगुनाकु नी रोयु। 16पुन लेनो देनो बेसको होयने तु कुहराय घाड़ाय सी भोरायीन पापी होय गोयु; एरेसी हांव तुसे विटोळ जानीन परमेश्वरन बोयड़ा पर सी उतार्यु, आरु हे गुवाळ्या कोरुब हांव तुसे आगठा सारको चोमेकने वाळा मणियोन इचमा सी नास कोरलु छे। 17तुसेक आपसा रुपो पोर घाड़ाय होती; तु आपसा इजुतोन कारण, आपसी ओकल काजे बिगाड़ लेदु। हांव तुसे तारा उचला जागा सी उतारीन भिमा आसटी देदु। हांव तुसेक राजान ओगोळ मेक्यु कि होये तुसेक देखे, आरु तारा वायकेड़ा उड़ावे। 18तारा पापन काम बेसका होयने सी आरु तारो लेनो देनो घाड़ाय कुहराय सी चुखलु जागु विटोळ होय गोयो; कोरीन हांव तारेम ओसो आगठो उपजाड़ीस की जेरेसी तु रुखड़ु होयु आरु हांव तुसेक आखा देखनेवाळा ओगोळ भिमा रुखड़ु कोर नाखलु छे। 19देस देसोन मानसो मा गोथा जोतरा तुसेक जाने आखा तारे कारण घाबराय गोया; तु बीकोन कारण होयु आरु ओळी जोलोम जुगु उलुप होय जायीस।

सीदोनन विरुद् भोगवानो वोगे गोथी वात

20योहोवान यो बुल मारें यां पुग्यो: 21हे मानसोन ओवलियाद, आपसो मुख सीदोन भेनी कोरीन हेंदरे वाराम भोगवानो वोगे गोथी वात कोर, 22आरु कोव, पोरबु योहोवा ओसु कोवे: हे सीदोन, हांव तारे विरुद् छे; हांव तारे इचमा आपसी मोहिमा कोरावीस। जोत्यार हांव हेरे इचमा डोन आपीस आरु हेमरे आपसका चुखलो कोवाड़ीस, तोत्यार मानसे जान लेसे की हांव योहोवा छे। 23हांव सीदोम मा रुग आरु मोत मुकलीस, आरु हेंदरी वाटो पोर लुहुय उहवाड़ीस; आरु हेरा च्यारु मेर तोलवार चालाड़ीस; तोत्यार हेरे इचमा घायेल मानसे पोड़से, आरु होये जान लेसे की हांव योहोवा छे।

इसराएलोक बोरकोत जोड़नो

24इसराएलोन घोरानान च्यारु मेरोन जोतरा देस हेंदरे पुठी कुहराय कोरे, हेनु मा गोथो कुदु हेंदरो गुपायन्यो काटो, काटास्यो ओळी नी रोवे; तोत्यार होये जान लेसे की हांव परमेश्वर योहोवा छे।

25परमेश्वर योहोवा ओसु कोवे: जोत्यार हांव इसराएलोन घोरानो हेनु आखा मानसो मा गोथा एकठा कोरीस, जेंदरे इचमा रिवन्या तिवन्या होयला छे, आरु देस देसोन मानसो ओगोळ हेंदरे लारे चुखो कोवाड़ीस, तोत्यार होये हेना देसोम रोवसे जे हांव आपसा दास याकुब काजे आपलु। 26होये हेरेम बेफिकरीया बोसला रोवसे; होये घोर बोनावीन आरु ओंगुरोन वाड़ी लागाड़ीन निरसा रोवसे; तोत्यार हांव हेन्दरे च्यारु मेरोन आखा मानसोक डोन आपीस जो हेनुसी कुहराय कोरे, तोत्यार होये जान लेसे कि हेंदरु परमेश्वर योहोवात् छे।