Dawro Full Bible Ethiopic
ማዝሙርያ 46
ጾሳይ ኑናና ደኤ
ዛማረቱዋ ካፖ ቆረ ናናቱ እምና የጸቴዳ፥ ዎዶሮ ናና የ ሂላን ጻፈቴዳ የ.
ጾሳይ ኑን ናገት አትያ ሳነ ኑዉ ዎልቃ።
ኑና መቱ ጋክያ ዎደ፥
ማዳናዉ እ ኡባ ገደ ማታን ደኤ።
ሄዋ ድራዉ፥ ቢታይ ቃጽንቶካ፥
ዎይ ደረቱ አባን ኩንድንቶካ፥
ኑን ያዮኮ።
አባ ቤታይ ጉሚደ፥ ሆሙዋ ማይንንቶካ፥
አ ዎልቃማ ሆቢያን ደረቱ ዪቂዪቂንቶካ፥
ኑን ያዮኮ።
እት ሻፋይ ደኤ።
ሄ ሻፋይ ጎጊደ፥ ጾሳ ካታማ፥
ኡባፐ ቂያ ጾሳይ ደእያ ጌሻ ሳኣ ናሸቼ።
ጾሳይ አ ግዶን ደእያ ድራዉ፥
ሄ ካታማይ ቃጸና።
ዎንታ ጉራን ጾሳይ አ ማዳና።
ጋድያ አሳይ ሻባረቴ፤
ካዉተቱ ቃጺኖ።
ጾሳይ ባረ ቃላ ስሴዳ ዎደ፥ ሳአይ ሴሬ።
መተ ኡባ ጎዳይ ኑናና ደኤ፤
ያቆባ ጾሳይ ኑን ቆሰት አትያ ሳኣ።
ሃ ዪተ፤ መና ጎዳይ ኦሱዋ ጼልተ፤
እ ሳኣን አሄዳ ባሻ በእተ።
እ ሳኣ ጋጻ ጋካናዉ ደእያ ኦላ ተኤ፤
ዎንዳፍያ መን፤
ቶራ መን፤
ጎንዳልያካ ታማን ጹጌ።
ዎፑ ጊተ፤ ታን ጾሳ ግድያዋ ኤርተ።
ታን ካዉተቱዋ ግዶን ቃይ።
ቃይ ቢታ ቦላንካ ቃይ።
ኡባፐ ዎልቃማ መና ጎዳይ ኑናና ደኤ፤
ያቆባ ጾሳይ ኑን ቆሰት አትያ ሳኣ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.