ማዝሙርያ 106

ጾሳይ ባረ አሳዉ በስያ ኬካተ

1መና ጎዳ ጋላትተ!1

እ ኬካ ግድያ ድራዉነ፥

አገና አ ሲቁ መናዋ ግድያ ድራዉ፥

መና ጎዳ ጋላትተ።

2መና ጎዳይ ኦዳ ዎልቃማ ኦሱዋ ኦዳናዉ፥

ዎይ አ ጋላታ ኡባ ቆንጭሳናዉ፥ ዳንዳይያዌ ኦኔ?

3ፕርዳ ናግያዋንቱነ፥

ኡባ ገደ ጽሎባ ኦያዋንቱ አንጀቴዳዋንታ።

4አቤት መና ጎዳዉ፥ ኔን ነ አሳዉ ኬክያ ዎደ፥

ታናካ ቆፓ፤

ኡንቱንታ ኔን አሽያ ዎደ፥

ታዉካ አላ።

5ሄዌነ፥ ነ ዶሬዳ አሳዉ፥

ሳአይ ሎእና፥ ታን በአናዳና፤

ነ አሳ ናሸቻ ታንካ ናሸታናዳንነ

ነዋንቱና እትፐ ታንካ ጋላታናዳና።

6ኑን ኑ አዎቱዋዳን ናጋራ ኦዶ፤

ባይዞባነ ኢታባ ኦዶ።

7ኑ አዎቱ ግብጼን ደእያ ዎደ፥

ነ ማላልስያ ኦሱዋ ቆፕበይክኖ።2

አገና ነ ሲቁዋ ዳሮተ ኡንቱንቱ ሀሳይበይክኖ፤

ዞኦ አባ ላንቂያን ነ ቦላ ማካሌድኖ።

8ግዶፐካ እ ባረ ሱን ድራዉ፥

ባረ ዎልቃማ ዎልቃ ኤርሳናዉ ኡንቱንታ አሼዳ።

9እ ዞኦ አባ አዛዝና፥ አባይ መሌዳ፤3

ባዙዋን ካለያዋዳን፥

ጪማ ግዱዋና ኡንቱንታ ካለደ ፕንዳ።

10እ ኡንቱንታ እጽያዋንቱ ኩሽያፐ አሼዳ፤

ሞርከቱዋ ኩሽያፐ ኡንቱንታ ዎዜዳ።

11ኡንቱንቱ ሞርከቱዋ ሃይ ምቴዳ፤

ኡንቱንቱፐ እቱነ አትቤና።

12ሄ ዎደ እስራኤላቱ አ ቃላ አማኔድኖ፤4

አ ሳቤድኖ።

13ግዶፐነ፥ ኡንቱንቱ እ ኦዳዋ

ኤለካ ዶጌድኖ።

አ ዞርያ ናገናን ባረንቱ ኮዬዳዋ ኦድኖ።

14ባዙዋን ደኢድ፥ ኡንቱንቱ

ዳሮፐ አሞቴድኖ፤5

ቃይ መላ ቢታን ጾሳ ፓጬድኖ።

15ሄዋዳን እ ኡንቱንቱ ዎሴዳዋ እሜዳ፤

ሽን ኡንቱንቱ ሸምፖ ግልቃተ ኪቴዳ።

16አሳቱ ባዙዋን ባረንቱ ዱንካንያን ደኢድ፥

ሙሳነ መና ጎዳዉ ዱማቴዳ፥

ቆማ አሮና ቃናቴዳ ዎደ፥6

17ቢታይ ዶየቲደ ዳታና ምቴዳ፤

አቤሮና አ ጎልያ አሳቱዋና ሞጌዳ።

18ቃይ ኡንቱንቱ ማባራ ግዶን ታማይ ኤጽና፥

ላጩ ሄ ኢታ አሳቱዋ ጹጌዳ።

19ኮሬባ ደርያን ደኢድ፥

ዎርቃ ሙሽሲደ ማራ ምስልያ መድኖ፤7

ሄ ምስልያዉ ጎይኔድኖ።

20ኡንቱንቱ ባረንቱ ቦንቾ ጾሳ

ማታ ምያ ሚዛ ምስልያን ላሜድኖ።

21ኡንቱንቱ ባረና አሼዳ ጾሳ ዶጌድኖ፤

እ ግብጼን ዎልቃማ ኦሱዋ፥

22ካመ ቢታን ማላልስያባነ፥

ዞኦ አባን፥ “ሆላ!” ጊስያባ ኦዳ።

23ሄዋ ድራዉ፥ ጾሳይ ኡንቱንታ ይሳና ጌዳ፤

ሽን ይሰና ማላ፥ አ ሀንቁዋ ዛራናዉ፥

ጾሳይ ዶሬዳ ሙሴ ግዱዋን ኤቄዳ።

24ሄዋፐ ጉይያን፥ ኡንቱንቱ

አ ቃላ አማነና ድራዉ፥

ሄ ሎኦ ቢታ ካድኖ።8

25ኡንቱንቱ ባረንቱ ዱንካንያ ግዶን

ዙዙሜድኖነ

መና ጎዳ ቃላዉ አዛዘትበይክኖ።

26ሄዋ ድራዉ፥ እ ኡንቱንታ ባዙዋን አጋናዋ፥

ባረ ኩሽያ ደንደ ጫቄዳ።

27ኡንቱንቱ ዘረ ካዉተቱዋ ግዶን አጋናዉነ

ቢታን ኡንቱንታ ላላናዉ ጫቄዳ።9

28ሄዋፐ ጉይያን፥ ኡንቱንቱ ፓኦራን ደእያ ባኣላ ኤቃዉ፥

ጎይንያዉንቱና እትፐ ጋከቴድኖ፤10

ሸምፑ ባይና ኤቃቶ ያርሸቴዳ ያርሹዋ ሜድኖ።

29ኡንቱንቱ ባረንቱ ኦሱዋን መና ጎዳ ሀንቀድኖ፤

ኡንቱንቱ ግዶን ኢታ ሀርጊ ዎዳ።

30ሽን ፒንሃስ ደንዲደ፥

ኡንቱንቱ ባይዙዋ ፕርድና፥

ኢታ ሀርጊ ኡንቱንቱ ቦላፐ ክቼዳ።

31ሄዌነ፥ የለታፐ የለታ ጋካናዉ፥

መናዉ አዉ ጽሎተ ግዲደ ፓይደቴዳ።

32ማሪባ ፑልቱዋ ማታን መና ጎዳ ሀንቀድኖ፤11

ኡንቱንቱ ጋሱዋን ሙሴ ቦላ መቱ ጋኬዳ።

33አያዉ ጎፐ፥ ኡንቱንቱ አ ሀንቀድኖ፤

ሙሴ ዶናፐ በሰና ቃላይ ከሴዳ።

34መና ጎዳይ ይስተ ጊና፥

ኡንቱንቱ ካናነ አሳቱዋ ይስበይክኖ።12

35ሄዋፐካ፥ ኡንቱንቱ ሄ አሳቱዋና

ገለት አከቲደ፥ ዋላከቴድኖነ፤

ኡንቱንቱ ደኡዋ ዎጋ ካሌድኖ።

36ጾሳ አሳቱ ኡንቱንቱ ኤቃዉ ጎይኔድኖ፤

ሄዌነ፥ ኡንቱንቶ ጲረ ግዴዳ።

37ኡንቱንቱ ባረንቱ አቱማነ ማጫ ናናቱዋ

ጻላሄቶ ያርሼድኖ።13

38ኡንቱንቱ፥ ጽሎ ሱ

ካናነ ኤቃቶ ያርሸድኖ፥

ባረንቱ አቱማነ ማጫ ናናቱዋ ሱ ጉሰድኖ፤14

ሄ ሱን ቢታይ ቱኔዳ።

39ሄዋዳን ኡንቱንቱ ባረንቱ ኦሱዋን ቱኔድኖነ፥

ሻርሙጻዳን ኡንቱንቱ ባረንቱ ጾሳዉ አማነተናን እጼድኖ።

40ሄዋ ድራዉ፥ መና ጎዳ ሀንቁ፥

አ አሳ ቦላ ኤጽ ከሴዳ፤15

እ ባረዋንታ ሸነቴዳ።

41እ ኡንቱንታ ሀራ ጋድያ አሳቱዋ ኩሽያን አደ እሜዳ፤

ኡንቱንቱ እጼዳዋንቱ ኡንቱንታ ሞዴድኖ።

42ኡንቱንቱ ሞርከቱ ኡንቱንታ ናቄድኖነ

ባረንቱ ሸንያዳን አይሴድኖ።

43እ ኡንቱንታ ዳሮ ገደ አሼዳ፤

ሽን ኡንቱንቱ ማካላዉ ዳንጭ ደንዴድኖ፤

ባረንቱ ናጋራ ጋሱዋን ዬድኖ።

44ግዶፐነ፥ እ ኡንቱንቱ ዋሴዳ ዋሱዋ ስሲደ፥

ኡንቱንቱ ዋይያ ቆፔዳ።

45እ ኡንቱንቱ ድራዉ፥ ባረ ጫቁዋ ሀሳዬዳ፤

አገና ባረ ሲቁዋ ዳሩዋዳን ኡንቱንታ ማሬዳ።

46ኡንቱንታ ኦሞዴዳ ኡባይ ኡንቱንቶ ቃረታናዳን ኦዳ።

47አቤት መና ጎዳዉ፥ ኑ ጾሳዉ፥ ኑና አሻ።16

ኑን ነ ጌሻ ሱን ጋላታናዳንነ

ነ ቦንቹዋን ጬቀታናዳን፥

ካዉተቱዋ ግዶፐ ኑና ሺሻ።

48መና ጎዳይ፥ እስራኤልያ ጾሳይ

መናፐ መና ጋካናዉ ጋላተቶ!

አሳይ ኡባይ፥ “አመንእ!” ጎ።

መና ጎዳ ጋላትተ!