ማዝሙርያ 105

ማላልስያ እስራኤልያ ታርክያ

(1 ኦዱዋ 16:8-22)

1መና ጎዳ ጋላትተ፤ አ ሱን ጼስተ።

እ ኦዳዋ ካዉተቱዋ ግዱዋን ኤርስተ።

2አ ሳቢተ፤ ጋላታ የ አዉ የጽተ።

አ ማላልስያ ኦሱዋ ኡባባ ኦድተ።

3አ ጌሻ ሱንን ጬቀትተ፤

መና ጎዳ ኮይያ ዎዛናቱ ናሸትኖ።

4መና ጎዳነ አ ዎልቃ ጾሞስተ፤

ኡባ ገደ አ ስን ኮይተ።

5እ ኦዳ ማላልስያባ፥

አ ማላታነ እ ፕርዴዳ ፕርዳ ሀሳይተ።

6ህንተኖ፥

አ ቆማ አብራሃማ ዘረቶ፥

ዶረቴዳ ያቆባ ናቶ።

7እ መና ጎዳ ኑ ጾሳ፤

አ ቱሞ ፕርዳይካ ሳኣ ኡባ ቦላና።

8እ ባረ ጫቁዋ መናዉ፥

ባረ አዛዜዳ ቃላ ሻኡ የለታ ጋካናዉ ናጌ።

9ሄዌነ፥ እ፥ አብራሃማና ጫቀቴዳ ጫቁዋ፥1

ይሳቃዉ ጫቄዳ ጫቁዋ፥

10ያቆባዉ ዎጋ፥2

እስራኤልያዉካ መና ጫቁዋ

ኦደ ምንሴዳ።

11ሀዋዳን ያጌዳ፤

“ነዉ ካናነ ቢታ እማና፤

እ ነ ዘረቶ ላታ ግዳና” ያጌዳ።

12ጾሳ አሳቱ ፓይዱዋን ጺ ጉነ

ካናነ ቢታን በተ ግዲደ ደእያ ዎደ፥

13እት ጋድያፐ ሀራ ጋድያ፥

እት ካዉተፐ ሀራ ካዉተ ዩዬድኖ።

14ጾሳይ ኡንቱንታ ኦንነ ናቃናዉ እምቤና፤3

ኡንቱንቱ ድራዉ ካተቱዋ ሴሪደ፥

15“ታን ኦኬዳዋንታ ቦቾፕተ፤

ታ ትምቢትያ ኦድያዋንታ ቆሆፕተ” ያጌዳ።

16ጾሳይ ቢታን ኮሻ የዲደ፥4

ኡንቱንቱ ካ ኡባ ይሴዳ።

17ሽን እ ባረ አሳ አሻናዉ፥5

እት ብታንያ ግብጼ ኪቴዳ፤

ሄ ብታኒ አይለ ግዲደ ዛልኤቴዳ ዮሴፋ።

18አ ገደቱ ብራታን ቃሸቴድኖ፤6

ኡንቱንቱ አ ሳንሳላታን ቃቼድኖ።

19እ ካሰ ኦዴዳዌ ፖለታና ጋካናዉ፥

መና ጎዳ ቃላይ አ ፓጬዳ።

20ግብጼ ካቲ ኪቲደ ቃሾ ጎልያፐ ከሴዳ፥7

ጋድያ ሞድያዌ ብሌዳ።

21እካ፥ አ ባረ ጎልያዉ ጎዳ ኦዳነ።8

ባረዉ ደእያዋ ኡባ ቦላ ሱንዳ።

22ባረዉ ዋና ካፖቱዋ አዛዛና ማላነ

ባረ ጭማቱዋ ዞራና ማላ ማታዬዳ።

23ሄዋፐ ጉይያን፥ እስራኤሊ ግብጼ ገሌዳ፥9

ያይቆበ ካመ ቢታን በተ ግዲደ ደኤዳ።

24መና ጎዳይ ባረ አሳ ዳሮ ጮራዬዳ፤10

ኡንቱንቱ ሞርከቱዋፐ ኡንቱንታ አደ ምን።

25እ ግብጼ አሳይ ባረ አሳ እጻናዳንነ

ባረ ቆማቱዋ ጭማናዳን ኦዳ።

26ሄዋፐ ጉይያን፥ ባረ ቆማ ሙሳነ11

ባረ ዶሬዳ አሮና ኡንቱንቱኮ ኪቴዳ።

27ኡንቱንቱ ግብጼ አሳቱዋ ስንን ጾሳ ማላታ፥

ካመ ቢታን ኦራባ ኦድኖ።

28ጾሳይ ማ ኪቲደ፥12

ሄ ቢታ ምሴዳ፤

ሽን ግብጼ አሳቱ አ አዛዙዋ እጼድኖ።

29እ ኡንቱንቱ ሃ ሱዉ ላሚደ፥13

ሞለቱዋ ዎዳ።

30ኡንቱንቱ ቢታ ኡባ፥14

ካትያ ጎልያካ ሸ ኩሜዳ።

31እ አዛዝና፥ ኡዱንጺነ ቢኒ15

ኡንቱንቱ ቢታ ኡባ ቦላ ሻምእሻምኤዳ።

32ኡንቱንቱ ቢታ ቦላን እራ ድራዉ

ሻቻ ዋልቃንና ቡክሴዳ።16

33እ ኡንቱንቱ ዎይንያ ቱራነ

ባላስያ ግያ ም ሾጬዳ፤

ኡንቱንቱ ቢታን ደእያ ምካ ክንቼሬዳ።

34እ አዛዝና፥ ቦሊነ

ፓይዱ ባይና ቡምቡረይ ከሴዳ።17

35ኡንቱንቱ ቢታን ዶሌዳ ካ ኡባ ሜዳ፤

ሳኣፐ እርጻባ ኡባካ ም ይሴዳ።

36ጾሳይ ግብጼ አሳቱዋ ጎለ ባይራ ናናቱዋ ኡባ ዎዳ፤18

ኮይሮ የለቴዳ ኡባ ይሴዳ።

37ሄዋፐ ጉይያን፥ እ እስራኤልያ አሳ

ዎርቃነ ብራ አሌቁዋና ከሴዳ፤19

ኡንቱንቱ ግዶፐ ኩንዲደ አቴዳዌ ኦንነ ባዋ።

38ግብጼ አሳቱ ኡንቱንቶ ዳሮ ያዬዳ ድራዉ፥

ኡንቱንቱ ከሴዳዋን ናሸቴድኖ።

39ጾሳይ ኡንቱንታ ካማናዉ ሻርያ ምጬዳ፤20

ቃማ ኡንቱንቶ ፖእሳናዉ ታማ ጊግሴዳ።

40ኡንቱንቱ ምያዋ ኦችና፥

አካ ማላትያ ካፎቱዋ ኡንቱንቶ የዴዳ፤21

ኡንቱንታ ሳሉዋ ቁማ ካልሴዳ።

41እ ሹቻ ጳልቂና፥

ሃይ ፑልቴዳ፤

ሻፋዳን ባዙዋን ጎጌዳ።

42እ ባረ ቆማ አብራሃማዉ፥

ገሌዳ ጌሻ ቃላ ሀሳዬዳ።

43እ ባረ አሳ ናሸቻን፥

ባረ ዶሬዳዋንታ እልልሳን ከሴዳ።

44እ ኡንቱንቶ ሀራ አሳቱዋ ቢታ እሜዳ፤22

ኡንቱንቱ ሀራቱ ዳቡሬዳ ጎሻ ላቴድኖ።

45ሄዋ እ ኦዳዌ ኡንቱንቱ አ ዎጋ

ናጋናዳናነ አ ህግያ ኦናዳና።

መና ጎዳ ጋላትተ!