Dawro Full Bible Ethiopic
ኢስያሳ 47
ባብሎነ ቦላ ይያ ፕርዳ
ጾሳይ ሀዋዳን ያጌ፤1 “ሀነ ባብሎነ ዎዶራተ፥ ዱገ ዎ፤ ባናን ኡታ። ሀነ ካላዳዌቱዋ ናተ፥ ነ ካተቱዋ አራታ አጋደ ሳኣን ኡታ። አያዉ ጎፐ፥ ሀዋፐ ስንናዉ ኔን ኦቶሮትያኖነ ሹጋቶ ጌተታካ። ዎጻ አካደ ካ ጋጫ። ነ ጉለ ቃራ፤ ነ አዱሳ ማዩዋካ ከሳ። ነ ጸፕያ በሳ፤ ያታደ ሻፋቱዋ ፕና። ነ ካሉ ቃረታና፤ ነ ፖኩካ ቤታና። ታን ሀሉዋ ከሳና፤ ኦስካ ቃረትከ” ያጌ።
ኑና ዎዝያዌ፥ አዉ ሱንይ ኡባፐ ዎልቃማ መና ጎዳ ግድያዌ፥ እስራኤልያ ጌሻ።
ጾሳይ ሀዋዳን ያጌ፤ “ሀነ ካላዳዌቱዋ ናተ፥ ባ፤ ማን ጮኡ ጋደ ኡታሻ። አያዉ ጎፐ፥ ሀዋፐ ስንዉ ኔን ካዉተቱዋ ካታቶ ጌተታካ። ታን ታ አሳ ሀንቀታድ፤ ታ ላታካ ቱንሳድ፤ ታን ኡንቱንቱ ነ ኩሽያን አደ እማድ። ኔን ኡንቱንቶ ቃረታባካ፤ ጭሜዳዋንቱ ቦላንካ ነ ሞርገ ምን ሎይ ዴጸታዳ። ኔን፥ ‘ታን መናዉ ካታቶ ግዳና’ ያጋዳ። ሄዋ ድራዉ፥ ሀ የዎቱዋ ነ ዎዛናን ቆፓባካ፤ ኡንቱንቱ ዉርሰካ ሀሳያባካ።
“ኔኖ ዎፑ ጋደ ኡቴዳነ እሻሉዋ ዶስያነ፥ ስሳ።2 ነ ዎዛናን፥ ‘ታና፤ ታፐ አትና፥ ሀራይ ባዋ። ታን አምኤ ግድከ፤ ዎይ የላደ ናእ ባይና ማይነ ግድከ’ ያጋዳ። ሀ ላኡ የዎቱ እት ጋላስ አይፊ ልጳናዉ፥ ነ ቦላ ያና። ነ ብታይ ዳራ፥ ነ ሙሩኑካ ዎልቃማ ዎልቃማ ግዶፐነ፥ ኔን ነ ናናቱዋፐ መላ አትያዌነ አምኤተይ ነ ቦላ ኩመንን ይያዌ አተና።
“ኔን ነ ኢታተን አማነታ ኡታዳ፤ ቃይ፥ ‘ታና ኦንነ በኤና’ ያጋዳ። ነ አዳ ኤራተይነ ጭንጫተይ ኔና ዎራ ካለና፥ ኔን ነ ዎዛናን፥ ‘ታና፥ ታፐ አትና፥ ሀራይ ባዋ’ ያጋዳ። ሽን ኔን ዋታ ሙሩኑዋን ሃሳንንቶ ኤረና ኢታይ ነ ቦላ ያና። ኔን ጋትያ ጭጋናዉ ዳንዳየና ቦሻይ ነ ቦላን ዎና፤ ቃይ ኔን አያነ ኤረና ባሻይ ቆፐናን ነ ቦላ ያና።
“አነ ኔን ነ ናአተደፐ ኦደ ደኤዳ ነ ብታነ ነ ሙሩኑዋ ሀእካ አጎፓ። ኦን ኤሪ፥ ነ ጎዋዳን ሀናነንቶ፤ ዎይ ኔን አን ዳጋንንንቶ። ዞረ ጻላላን ነ ዳቡራዳ። ሳሉዋ ጾልንትያ ፓይድያዋንቱ፥ አ ጼሊደ ትምቢትያ ኦድያዋንቱ፥ ቃይ፥ አግና ጼሩዋን ጼሩዋን ነ ቦላን ያናዋ ኦድያዋንቱ አነ ኔና አሽኖ። በአ፥ ኡንቱንቱ ዱርጫ ማላ፤ ታማይ ኡንቱንታ ማና። ኡንቱንቱ ታማ ላጩዋፐ ባረና አሻናዉ ዳንዳይክኖ። ሄዌ አሳይ ባረ ቦላ ሆኤናዉ ሆእያ ቦንቆ ዎይ ቃይ አሳይ አ ስንን ኡታናዉ ዳንዳይያ ታማ ግደና። ኔን ኡንቱንቱና ዳቡሬዳዋንቱ፥ ነ ናአተደፐ ዶሚደ፥ ኔናና ዛልኤዳዋንቱ ነዉ ሄዋ ማላ። ኡንቱንቱ ኡባይካ ባረ ባጋና ባጋና ላለታና፤ ኔና አሽያዌካ እቱነ ባዋ።
Source notes (2)
- Cross-reference ኢሳ. 13:1—14:23፤ ኤር. 50:1፤ 51:64
- Cross-reference ሳፃ 18:7-8
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.