Dawro Full Bible Ethiopic
ኢስያሳ 48
ጾሳይ ስንፐ ሀናናዋ ኤርያ ጾሳ
“ህንተኖ ያቆባ ዛረቶ፥ እስራኤልያ ሱንን ጼሰትያዋንቶ፥ ቃይ ይሁዳ ዘረፐ ዬዳዋንቶ፥ ሀዋ ስስተ። ህንተ መና ጎዳ ሱንን ጫቂታ፤ እስራኤልያ ጾሳ ጼሲታ፤ ሽን ቱማተንነ ጽሎተን ግደና። ህንተ ህንተና ጌሻ ካታማ ሱንን ጼሲታ፤ እስራኤልያ ጾሳን ዘምፒታ፤ አ ሱንይ ኡባፐ ዎልቃማ መና ጎዳ።
“ታን ካሰ ሀኔዳዋንታ ዳሮ ዎድያፐ ካሰ ኦዳድ፤ ታ ዶናፐ ኡንቱንቱ ከሴድኖ። ኡንቱንቱ ኤለካ ፖለታናዳን፥ ታን ኦድ። አያዉ ጎፐ፥ ኔን ኦድና ስሰናዋ፥ ነ ሞርጊ ብራታ ማላ ግድያዋ፥ ነ ሶምኢካ ናሃስያ ግያ ብራታዳን ሌቃመናዋ ታን ኤራድ። ሄዋ ድራዉ፥ ኔን፥ ‘ሀዋ ታ ኤቃይ ኦዳ፤ ቃይ ታ ማሰቴዳ ምስለቱነ ታ ሲልሲደ ኦዳ ምስሊ ኦዳ’ ጌናዳን፥ ታን ሄዋ ነዉ በንፐ ዶማደ ኦዳድ። ቃይ ኡንቱንቱ ሀናናፐ ካሰታደ፥ ታን ኡንቱንታ ነዉ አዋያድ።
“ኔን ካሰ ስሳዳ፤ ሀእ ስም ሀዋ ኡባ በአ። ያትና፥ ኔን ሀዋ ኡባ ቱማ ጊኪ? ሀእፐ ዶማደ ስንዉ ኔን ኦራባ ስሳናዳን፥ ታን ኦና። ኡንቱንቱ ሀእ መቴድኖፐ አትና፥ በን መትበይክኖ። ኔን፥ ‘በአ፥ ታን ኡንቱንታ ኤራይ’ ጌናዳን፥ ሀችፐ ካሰ ኔን ሙለካ ኡንቱንቱባ ስሳባካ። ኔን ሙለካ ስሳባካ፤ ቃይ ሙለካ ኤራባካ። ነ ሀይይ በንፐካ ዶየትቤና። አያዉ ጎፐ፥ ኔን ጭምያዋ ግድያዋ ታን ኤራይ፤ ቃይ የለቶደፐካ ኔን ማካላንቻ ጌተታደ ጼሰታዳ።
“ታ ሱን ድራዉ፥ ታን ታ ሀንቁዋ ዛራና፤ ታን ኔና ይሰናዳን፥ ታ ሀንቁዋ ተአና። በአ፥ ታን ኔና ፓጫድ፤ ሽን ብራዳን ግደና፤ ታን ኔና መቱዋ ታማን ፓጫድ። ታን ታ ድራዉ፥ ሀዋ ኦይ። አያዉ ጎፐ፥ ታ ሱንይ ቶሸታናዉ ታን ኮይከ። ታን ታ ቦንቹዋ ሀራዉ እምከ።
ጾሳይ ዶሬዳ ቆማ
“ኔኖ ያቆባ፥ ታን ጼሴዳ እስራኤልያዉ፥ ታን ግያዋ ስሳ።1 ታን አ፤ ኮይሩካ ታና ዉርሰይካ ታና። ቢታ ባሱዋ ታ ኩሺ ባሴዳ። ሳሎቱዋካ ታ ኡሸቻ ኩሺ ምጬዳ። ታን ኡንቱንታ ጼስያ ዎደ፥ ኡንቱንቱ እትፐ ኤቂኖ።
“ህንተ ኡባይ እትፐ ሺቂደ ስስተ፤ ኤቃቱዋፐ ሀዌ ሀናናዋ ካሰቲደ ኦዴዳዌ ኦኔ? መና ጎዳይ ዶሬዳዌ አ ቆፋ ባብሎነ ቦላ ፖላና፤ አ ቀሲካ ባብሎነ ቢታ አሳ ቦላ ግዳናዋ። ታን ታ ሁጲያዉ አ ጼሳድነ አዉ ኦዳድ፤ አ አሄዳዌ ታና። ቃይ እ ኦያባይ ኡባይ አዉ እንጀታና።
“ታኮ ሃ ሺቂደ፥ ሀዋ ስስተ፤ ታን ኮይሮፐ ዶማደካ ጌማን ሃሳያበይከ፤ ሄዌ ሀኔዳ ዎድያፐካ ዶማደ ታን ያን ደአይ” ያጌ።
ቃይ ኡባ ሞድያ መና ጎዳይነ አ አያናይ ሀእ ታና ኪቴድኖ።
ጾሳይ ባረ አሳዉ ሀልቼዳ ሀልቹዋ
መና ጎዳይ፥ ኔና ዎዝያዌ፥ እስራኤልያ ጌሻይ ሀዋዳን ያጌ፤ “ታን መና ጎዳይ፥ ነ ጾሳይ፥ ኔና ማድያዋ ታማርስያዋ። ኔን ባናዉ በስያ ኦግያንካ ኔና ካለያዌ ታና። ኔን ታ አዛዙዋ ስሴዳዋ ግድንቶነ፥ ነ ሳሮተይ ሻፋ ሃዳን ጎጋና ሽን፤ ነ ጽሎተይካ አባ ቤታዳን ሀናና ሽን። ነ ዛሪ አባ ሻፍያዳን፥ ነ ናናይካ ፓይዱ ባይና ሳኣ ባናዳን ጮራታና ሽን፤ ኡንቱንቱ ሱንይካ ታ ስንፐ የናን ዎይ ክቼናን አጋና ሽን” ያጌ።
ባብሎነ ጋድያፐ ከስተ፤ ባብሎነ አሳፐካ ባቃትተ!2 ቃላ ቁ ኦደ፥ ናሸቻን ሀዋ ሃሳይተ፤ ሳኣፐ ሳኣ ጋጻ ጋካናዉ፥ ሀዋ ኪትተ። “መና ጎዳይ ባረ ቆማ ያቆባ ዎዜዳ” ያጊደ ኦድተ። እ ኡንቱንታ መላ ቢታ ግዶና ካለዳ ዎደ፥ ኡንቱንቱ ሳመትበይክኖ። ዛላፐ ሃካ ኡንቱንቶ ፑልትሴዳ፤ ዛላ እ ጳልቂና፥ ሃይ ቄዳ።
መና ጎዳይ፥ “ኢታቶ ሳሩ ባዋ” ያጌ።3
Source notes (3)
- Cross-reference ኢሳ. 44:6፤ ሳፃ 1:17፤ 22:13
- Cross-reference ሳፃ 18:4
- Cross-reference ኢሳ. 57:21
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.