Dawro Full Bible Ethiopic
ኢስያሳ 46
ባብሎና ኤቃቱዋ
ቤላ ግያ ባብሎነ ኤቃይ ጎይኔ፤ ናባ ግያ ኤቃይካ ሆኬ። ካሰ ህንተ ቶክያ ኤቃቱ ሀእ ጫና መህያ ቦላን ጫነቲደ፥ ኡንቱንቶ ዴጾ ቶኩዋ ግዴድኖ። ጫና መሄቱ ዴጹዋፐ ደንዴዳዋን፥ ጫናና እትፐ ኩንዴድኖ፤ ኤቃቱ ባረና አሻናዉ ዳንዳየና ድራዉ፥ ባረንቱ ሁጲያዉካ ኦሞደቲደ ቤድኖ።
ጾሳይ ሀዋዳን ያጌ፤ “ህንተኖ፥ እስራኤልያፐ አቴዳዋንቶ፥ ያቆባ ዛረቶ፥ ታን ኦድያዋ ስስተ፤ ህንተ የለቴዳ ዎድያፐ ዶማደ ታን ህንተና ቶካድ። ህንተ ጭማና ጋካናዉካ ታን ታናካ፤ ህንተ ፑሉማና ጋካናዉካ፥ ታን ህንተና ማዳና። ታን ህንተና መድ፤ ታን ህንተና ደንና፤ ታን ህንተና ቶካናነ አሻና።
“ታና ኦ ማላ ጊተ? ቃይ ኦናና ልኪቴ? ኑን እት ማላ ግዳናዳን፥ ታና ኦናና ጋ ጼሊቴ? ዎርቃ ባረንቱ ቃርጪታፐ ቆልያዋንቱነ ብራ ሚዛናን ዎደ ልክያዋንቱ ሄዋ ኡንቱንቶ ጾሳ ኦደ መና ማላ፥ ዎርቃ ትግያዋ ቃጻሪኖ። እካ ጾሳ ኦደ መ፤ ያትና፥ ኡንቱንቱ ሄ ኤቃ ስንን ሆኪደ ጎይኒኖ። ኡንቱንቱ አ ደንደ፥ ባረንቱ ሀሽያን ቶኪኖ፤ አ ሳኣን አ ዎኖ። ያቶፐ እ ሄዋን ኤቂ አጌ፤ ሄዋፐ ያ ሃ ቃጸና። እት አሳይ አዉ ዋሶፐካ፥ ዛሩዋ እመና፤ ቃይ አ መቱዋፐካ አ አሸና።
“ህንተኖ ናጋራንቻቶ፥ ሀዋ ሀሳይተነ ቆፕተ፤ ህንተ ዎዛናን ካሀን ዎተ። በን ዎደ ሀኔዳ የዎቱዋ ሀሳይተ። አያዉ ጎፐ፥ ታን ጾሳ፤ ሀራይ ባዋ። ታን ጾሳ፤ ታ ማላይ ኦንነ ባዋ። ‘ታ ቆፋይ ምናና፤ ቃይ ታንካ ታ ሀልቹዋ ኡባ ፖላና’ ያጋይ። ዉርሰን ትምቢትያ ዶመን፥ ቃይ ብሮ ሀንቤና የዎቱዋ በን ዎድያፐ ዶማደ አዋያይ። አዋይ ዶልያ ባጋፐ ቦንቂያ ካፉዋ፥ ሃኮ ጋድያፐ ታ ቆፋ ፖልያ አሳ ታን ጼሳደ፥ ታን ጌዳዋ ታን ፖላና፤ ታን ሀልቼዳዋካ ታን ኦና።
“ህንተኖ ዎዛናይ ሙሜዳዋንቶ፥ ጽሎተፐካ ሃኬዳዋንቶ፥ ታን ኦድያዋ ስስተ፤ ታን ታ ጽሎተ ማታ አያይ፤ እካ ሀሳኮ ግደና። ታ አቶተይ ጋምኤና፤ ታን ታ አቶተ ጽዮንዉ፥ ታ ቦንቹዋካ እስራኤልያዉ እማና” ያጌ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.